"Сылнылык тӱня" рубрик, 2016 ий, Кылме тылзын 18-ше кечыже

Йоча спектакльым эре ончаш тӱҥалыт

Статьян авторжо Анастасия Эманова

Курчак театрын артисткыже Галина Ковалева 40 ий театрыште пашам ышта. Тудо «Аленький цветочек», «Чудо-чудное, диво-дивное», «Счастливого пути» да эше шуко-шуко остановкышто шыма, ушан, илышым умылен моштышо образ-влакым чоҥен. 20 ноябрьыште театрыште РМЭ-н калык артисткыже Галина Ковалеван бенефисше лиеш, «Котенок на снегу» спектакль ончыкталтеш.

%d0%b2%d0%b8%d0%bd%d0%bd%d0%b8-%d0%bf%d1%83%d1%85Постановкышто актрисе мудреч Коракын рольжым модеш. Тиде образ кызыт чонемлан лишылрак манын умылтарыш тудо. Палемдыман: Корак рольлан Галина Владимировна тений Йыван Кырла лӱмеш национальный театральный премийын «Курчак театрыште эн сай роль» номинацийысе лауреатше лийын.

Г.Ковалева Йошкар-Олаште шочын-кушкын. Изинек усталык шӱлышан лийын. Пионер-влакын полатышт пеленысе драме кружокыш вич ий коштын, телевиденийыште тӱрлӧ йоча передачым вӱден. Но артист лияш тунам шонен огыл. «Луымшо классыште кушко умбакыже тунемаш кайыме нерген йодыш лектын. Спектакльлаште модаш йӧратенам, да тиде паша мыйын сайын лектеш манын шоненам. Тыге артисткылан тунемаш пураш Горький олаш каенам. Но пурен кертын омыл. Тылеч вара ик ий заводышто ыштенам. А вара радиошто Курчак театрыш марий труппыш артист-влакым погымо нерген увертарымашым колынам. Марий омыл гынат, театрыш толынам. Тӱрлӧ номерым ончыктенам, почеламутым, басньым лудынам. Йӱкем вичкыж, ныжылге, кӱкшӧ лийын да театрын тунамсе режиссержо Игорь Емельянов «теве тудо Буратино» манын ойлен. Руш труппыш артист-влак кӱлын огытыл гынат, мыйым пашаш налыныт. Тыге 1976 ий годсек тыште ыштем. Пашаш пурымеке, эн кугу ролем лачак «Золотой ключик» спектакльыште Буратино лийын», - ойлыш артистке.

"Котенок на снегу"Пашам ыштыме годым Галина Владимировна заочно Ленинградысе театр, музык да кинематографий институтысо актер факультетыште (кызыт Санкт-Петербургысо сценический искусство кугыжаныш институт) тунемын. 1988 ийыште пытарен. «Кукольник-влакым шагал вере «ямдылат». Санкт-Петербургысо институт — тидын шотышто сай апшаткудо. Театрыштына пашам ыштыше шуко артист лачак тудым тунем пытарен. Тений, мутлан, артистна Максим Белецкий тушто курчак театрын режиссержо специальностьым налын. Мый тынар ий артистлан пашам ыштымаште тӱрлӧ курчак дене модын моштем. Садлан самырык артист-влаклан курчак-влак дене пашам ыштыме шотышто каҥашымат пуэн кертам. Тыгак шым ий наре республикысе тӱвыра да сымыктыш колледжыште курчак театрын артистше специальностьлан туныктем, ӱдыр-рвезе-влак дене театрыште мастарлык урокым эртарем. Чаманен каласыман, ятыр самырык еҥлан чытыш огеш сите. Вет курчак дене модмаш лачак тидым йодеш. Тыршен, шонен пашам ыштыман. Ончыч ме, пашам ышташ тӱҥалмеке, улан шке гыч тунемаш тыршенна. Репетиций деч ик шагат ончыч толына да воштончыш ончылно курчак дене модына ыле, тидын дене паша опытым, мастарлыкым погенна. Кызыт гын, чылан нерген, конешне, ойлаш огеш лий, но шуко самырык артистлан самостоятельность огеш сите, чыла ончыктыман, умылтарыман. Вашкыл шотыштат кызытсе тукым вестӱрлырак. Ме кугурак артист-влакым моткоч чот пагаленна, нунын деч каҥашым йодынна. Кызытсе самырык тукым утыждене шкалан ӱшаныше. Тиде, очыни, уда огыл, но пашаште мешая. Курчакат поро кумылым йӧрата. Кажне курчак — тиде ӱзгар. Актер курчакым тӱрлӧ семын кучылтшаш, тудым шижын моштышаш. Кумшо курсышто тунемше студентем-влак чылан тидым эше огыт умыло», — каласыш Г.Ковалева.  "Счастливого пути"

Курчак театр йоча пагытыш пӧртылта. Йоча спектакльым кугыеҥ-влакат ончаш йӧратат, шонем. Вет кеч-могай произведений негызеш шындыме постановко куан кумылым веле огыл луктеш, тыгак икшывымат, ача-аваштымат шонаш тарата. «Кумло, витле ий ончычат, кызытат курчак спектакльым калык ончаш йӧрата. Йоча тӱням спектакль гоч сайын умыла. Мыйын кок уныкам уло. Нуно Москошто илат. Уналыкеш толыт да эре спектакльыш коштыт. Мемнан элыште (Моско нерген тыге ойла) тендан гай чапле курчак спектакльым огыт ончыкто манын ойленыт. Кугыеҥ-влакланат йоча спектакль келша. Франций гыч палыме ӱдыр уло. Тудо икана Крупская лӱмеш пединститутыш стажировкыш толын ыле, француз йылмым туныктен. Театрышке кажне эрдене мый декем коштын.  Францийыште тендан гай театр уке, йоча спектакльым ончыде кушкынам, могай те пиалан улыда манын ойлен», - мут мундыражым умбакыже ронча артистка.

Галина Владимировна ятыр спектакльыште ик эн тӱҥ роль-влакым модын. Театрыш толмеке, тудлан вигак Буратином модаш ӱшаненыт. «Моткоч шуко йочм, принцессе-влакым модынам. Тыгак «илыше» планыштте образ-влакым чоҥенам. Ик эн йӧратыме спектаклем – «Мальчик Иисус из Назарета» постановко. Тушто мый Мариям модынам. Драматический, келге образ. Ава теме чонемлан лишыл. Шкемын кок йочам уло. Критик-влакат ты рольлан кӱкшӧ акым пуэныт.

"Остров сокровищ"Кызыт серьезный рольым моднем. Тиде, мыйын шонымаште, моткоч оҥай. Но курчак дене тыгай роль-влакым модаш неле. Очыни, тидын денак сымыстара.

Роль-влак тӱрлӧ лийын кертыт. Южыжым кумылын модат, а южо роль чонлан лишыл огыл. Адакшым курчакынат могай улмыжым шотыш налман. «Винни-Пух» спектакльыште тӱрлӧ жапыште тӱрлӧ рольым модынам. Пытартыш гана Кроликын образшым чоҥенам. Курчак моткоч шӱкшӧ ыле. Тудым «иландараш» пеш неле лийын. Но тӱрлӧ йӧным кычалын, курчакем иланен. Келша тудлан роль але уке, келша курчак але уке – артист кеч-могай ситуацийыште шке пашажым сайын ыштышаш. Ончыч гастроль дене чӱчкыдын коштынна. Мӧҥгыштӧ тылзе, пелий дене лийын огынал. Юмылан тау, авам пашамым умылен да йочам-влакым кушташ полшен. Тудо мыйын тӱҥ эҥертышем лийын. Гастроль годым кечеш южгунамже кум шагат веле маленна. 2006 ийыште кужу тур лийын. «Веселое путешествие» спектакльым Чебоксар, Озаҥ, Саранск, Ульяновск, Набережный Челна олалаште ончыктенна. «Чудо-чудное, диво-дивное» спектакль дене ятыр гана тора корныш лектынна. Чылажым ойленат от пытаре», — каласыш Г.Ковалева.

Галина Владимировна – уста артистке, туныктышо да режиссер-постановщик. Тудо «Принцесса на горошине», «Сказки Котика-мурлыки» да моло интермедиам шынден. Тудын творчествыжым йӧратыше да аклыше-влак кажне кечын ешаралтыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: