"Рубрик деч посна", 2016 ий, Кылме тылзын 11-ше кечыже

Йошкар-Олаште у тоштер да у проспект почылтыныт

Статьян авторжо Светлана Кушакова

4 ноябрьым, Калыкын икоян улмо кечыжым да республикым ыштымылан 96 ий теммым, республикыште кумдан пайремленыт.

Пайрем кажне районышто сайын эртен, поснак — Йошкар-Олаште.

Республик кучем олаште илыше-влаклан пӧлекым ыштен. Тиде кечын Православий историй тоштер да Сеҥымашлан 70 ий темме лӱмеш проспект почылтыныт.

Православий историй тоштер почмым Юмым Шочыктышо Ава Казанский юмоҥан шочмо кечыж дене кылдыме. Ты музей шкешотан, тыгай тоштер воктен улшо нимогай олаште уке, южо экспонатшымат моло вере нигушто ужаш ок лий. Тоштер Царьградский площадьыште Изи Какшан эҥер набережныйысе Троицкий храм воктене верланен. Зданий ончылно славян азбукым ыштыше Кирилл ден Мефодий святой-влаклан памятникым шогалтыме. Нунын нерген каласкалыше представлений лийын. Ончаш толшо-влакым республикым вуйлатыше Л.Маркелов ден Йошкар-Ола да Марий архиепископ Иоанн саламленыт.

Тоштерысе экспонат-влак гочын XVI курым гыч тачысе жап марте православий вияҥме корно нерген каласкалат. Ятыр тӱрлӧ фотокартычкым, книгам, черке арверым, священнослужитель-влакын вургемыштым ончыктымо.

Посна зал-влак тӱрлӧ темылан пӧлеклалтыныт. Иктыште православный храмын мо гыч ышталтмыже, службым эртарыме арвер ден вургем-влак, черке иерархий ончыкталтыт. Весыште марий кундемыште храм-влакым чоҥымо историйым пален налаш лиеш. Посна экспозиций Марий кундемыште XVIII-XX курымласе черке-влакын миссионерский да культурно-просветительский пашашт нерген каласкала. Тыште черкын совет жапысе да тачысе илышыжым ужаш лиеш.

Тиде кечынак Л.Маркелов, Правительствын еҥже-влак Сеҥымашлан 70 ий темме лӱмеш проспектым официально почыныт. Тудо Воскресенский проспектым Петров урем дене уша. Тыге Йошкар-Олан Заречный, Молодежный, Мирный да Спортивный микрорайонжо-влак ваш кылдалтыныт. Транспорт движенийым автопробег дене тӱҥалыныт. 20 легковой машина Российын, Марий Элын да “Единый Россий” партийын флагышт дене кудалын эртен.

Но тидын дене проспектыште паша пытен огыл, ынде олан ты ужашыжым тӱзаташ тӱҥалыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: