"Чон-кумыл паша" рубрик, 2016 ий, Кылме тылзын 25-ше кечыже

Мастар еҥым товарвондыжат пукша

Статьян авторжо Ирина Ямбаршева

%d0%b6%d0%b5%d0%bd%d1%8f5«Пидме кофтышто этнотӱс сылнын коеш. Тений африкан, мексикан да скандинав узор-влак модныйлан шотлалтыт. А мыланем марий тӱр келша. Пидме вургемыш тӱрлымаш – пеш оҥай кидпаша», — манын возымо Евгения Кошкинан «Одноклассники» сайтысе лаштыкыштыже ик фото йымалне. Тидыжак ӱдыр дене вашлийын мутланаш таратыш.
%d0%b6%d0%b5%d0%bd%d1%8f01Женя пидеш, марий тӱрым тӱрла, марий тӱр дене тӱрлӧ арверым сӧрастара. Матрешкыжо, курчакше, аралтышыже да моло арвержат ятырак погынен. Уло жапшым, манаш лиеш, чон-кумыл пашалан пӧлекла. А эше йӧратыме сомылжо оксам конда. Ӱдырын Волжск оласе «Лопатино» ужалыме рӱдерыште шке верже уло, тудо марий сувенир-влакым ужала, ятыржым шкеак ямдыла, икмыняржым, келшышыжым, еҥ дечат налеш.
«Марий тӱр деке коло ий эртымеке угыч пӧртылынам», — каласыш Женя. Ӱдыр Волжский район Приволжский поселкышто шочын. Тусо школышто тунемын. Сӱретлаш йӧратымыжым ужын, Йошкар-Оласе 1-ше номеран сымыктыш интернат-школыш тунемаш каяш темленыт. Женя тыште сӱретлыме мастарлыкшым утларак шуарен. Прикладной сымыктыш денат занятий-влак лийыныт. Тыштак тӱрлаш тунемын. Куэмын кок могырыштыжат икгай сӱрет лектеш, южгунамже ӱдыр шкежат кудыжо могай вел улмым огеш пале. Тыште интернат-школышто туныктышо А.А.Орлован суапше кугу. Школ деч вара Женя Озаҥыш куштылго промышленность техникумыш художник-модельерлан тунемаш каен. Но пытарен шуктен огыл, марлан лектын, йоча шочын, тудлан жапым ойыраш кӱлын. Варарак Волжск оласе целлюлозно-бумажный техникумышто тунемын, техник-технолог специальностьым налын.
%d0%b6%d0%b5%d0%bd%d1%8f06Женя ужалыме пашаште шым ий пӧрдеш. Интернет-кевытше лийын, ондак вургемым ужален, идалыкат пеле ончыч сувенирыш куснен. Марий тӱран арвер-влакымат поген. Ондак еҥыным ужален гын, вара шке ышташ пижын. «Ойыртемалтме, калыклан марий тӱвырам ончыктымо шуын, садлан марий сувенирым ужалаш тӱҥалынам. Заготовко-влакым интернетыште налам. Вара сӱретлем, тӱрлем. Вес олала гыч толшо-влак мӧҥгышкышт пӧлеклан налын каят», — ойла Женя. Ӱдыр портретым заказ почеш тӱрла, нуныжо чылт сӱретлымыла койыт. Фотом кондат, тудым калькыш, вара миллиметровый кагазыш кусара. «Ончыч ямде сӱрет почеш тӱрлен онченам, но йокрокын чучын. Тунам фото почеш тӱрлаш тӧчен онченам. Тыге Яльчик ерым сӱрет почеш тӱрленам. Вара портретыш кусненам. Южыжлан мел могыржо утларакат келша», — ойла Е.Кошкина.
%d0%b6%d0%b5%d0%bd%d1%8f2Женя кидпашалан ава-ковам ончен тунемын. Коважат тӱрлен, аваже пидеш, ачаже сӱретла. Кокажат сайын пидын, сӱретлен, тӱрлен. Ӱдыр икымше кофтым визымше классыште тунеммыж годымак пидын. «Моторын чийыме, ойыртемалтме шуын. Тунам эсогыл ачам воктекем пидаш шинчын ончен ыле. Шӱжаремат кидпашам ышта, тудо пеледыш-влакым ямдыла, ужала. Кумыл лиеш гын, кид-йол толеш», — каласыш ӱдыр.
Ончыкшым ӱдыр ассортиментшым эше утларак пойдарынеже, Волжскын, Йошкар-Олан гербыштым ковер куэмеш тӱрлынеже, шӱйырым кӱ гыч ышташ тӱҥалнеже. Тек чыла шонымашыже шукталтеш.
Ӱдырын альбомжо гыч налме фото-влак.

%d0%b6%d0%b5%d0%bd%d1%8f04 %d0%b6%d0%b5%d0%bd%d1%8f9

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: