"Айдеме да закон" рубрик, 2016 ий, Кылме тылзын 18-ше кечыже

Парым – куп: эре йымак шупшеш

Статьян авторжо Светлана Кушакова

Суд пристав-влак службын ик эн тӱҥ пашаже – парымым пӧртылташ. Южо еҥ тӱрлӧ амаллан кӧра шке парымжым жапыштыже пӧртылташ огеш вашке. Тыгай годым суд пристав-исполнительлан парыман еҥ деке илыме верышкыже рейд дене лекташ логалеш. Ик тыгай рейд кодшо арнян ЖКХ услугылан тӱлыдымӧ еҥ-влак шотышто эртен. Суд пристав да “Республикысе единый расчетный центр” АО-н пашаеҥже дене мыят икмыняр адрес дене миен коштым. Тыгай мероприятий тӱҥ шотышто кастене вич шагат деч вара тӱҥалеш да лу шагат марте шуйна. Южгунам эрденат лиеда. 

Кас рейд годым Йошкар-Олаште 10 адресым тергыме. Чылаже тушто 30 парыман еҥ ила. Нунын чумыр парымышт 3 тӱжем теҥге гыч 42 тӱжем теҥге марте шуэш.

Теве, мутлан, рӱдоласе Эшпай урем дене ик пӧртыштӧ парыман икмыняр еш ила. Суд пристав-исполнительлан кажныж дек миен шуман. Но чылаж годым нунылан омсам огыт поч, южгунам подъездышкат логалаш огеш лий. Ик пачерыш тӱкалтыме годым кӧ толмым умылаш омса воктеке изи йочам колтеныт. Тудо, шижалтеш, кажне йодышлан ала-кӧн ойлымыж почеш вашешта. Тиде пачерыш содыки логалын ышна керт.

Весе 13 тӱжем теҥге парымым поген. А. коммунальный пӧлемыште ила. Пого гыч ик диван, ӱстембал, шкаф, холодильник да телевизор гына улыт. Нылле ийым эртыше пӧръеҥ омсам почо. Мутланыме гыч пале лие: тудо — воктен пӧлемыште илыше пошкудыжо. Икте-весыштым йоча пагыт гычак палат. “Мый лач тудым вучем, вашке толшаш”, — мане. Пошкудо вигак йолташыжлан йыҥгыртыш. Тый декет суд пристав-влак толыныт, лият мо манын эше ик гана умылыш. “Таче Звездныйышто улам, мӧҥгӧ миен ом шу”, — вашмут шоктыш. Суд приставлан оза деч посна телевизорым арестоватлаш логале. А. шкеже нигушто пашам ок ыште, ончыкыжым парымым пӧртылта але уке пале огыл. Пошкудат йолташыжлан полшаш да парымжым петыраш ыш келше.

Вес коммунальный пӧлемыште илыше ӱдырамашым чаманышымат. Моло пӧлем дене таҥастарымаште тиде изирак. Тул уке, телевизор гына пӧлемым волгалтара. Ик койко, тошто изирак диван шогат. Шкаф ӱмбалне — ала-могай коробка-влак. Ужат да тыгай условийыште илаш лиеш мо, шоналтет. Ӱдырамаш кызыт окса уке, Чебоксарышке операцийым ышташ кайыман мане. Но суд пристав чамана гынат, пеҥгыде лийшаш. Тудымат телевизор да телефон деч посна кодаш логале.

Южо еҥым, чынжымак, нужна да начарын илышылан шотлаш лиеш гын, весышт куштылгын илен тунемше, пашам ышташ кумылдымо улыт. Нунылан тыге илаш келша веле манын шоналтет.

Мутлан, ик еш шотышто 42 тӱжем теҥгеаш парыман исполнительный производство уло. Пачерлан оза изак-шоляк улыт. Иктыжат ЖКХ-лан оксам ок тӱлӧ. Пачерым ончалаш лӱдат. Южшат тамак, лавыра пуш дене темше. Кид дене эсогыл омса кылым кучаш от тошт. Пырдыжыште ик тӱсан обой ӱмбач весе коеш. Кухньышто ны раковине, ны газплита уке, нуным пырдыжыш эҥертен рончен шогалтыме. Ик озаже Воркута олаште пашам ышта, весе – пашадыме. Суд пристав ончылно мутым кучаш начарын колшо шоҥго авалан логале. Тудо шушаш жапыште пашаш пураш да парымым эркын петыраш сӧрыш. А самырык таза эрге шоҥго авам тыге ашнаш огешат вожыл ала мо?

Вес пачер “куандарыш”. Прихожийыш пурымек, арулык, сай ремонт коеш. Ты пачерын кум озаже уло, туге гынат 23 тӱжем теҥге парымым погеныт. Тушто вате-марий гына илат. Ӱдырамаш, суд пристав-влакым ужмеке, “Мый шкет пашам ыштем. 10 тӱжем теҥге пашадарым налам. Эргым пелашыжын пачерыштыже ила. Адак чыла мыланем логалеш”, — манын шорташ тӱҥале. А марийже чыла тидым ончен шып колыштеш. Кузе тыгае чоным ок тарвате? Туге гынат плазме телевизорым, кум тӱжем теҥгелан аклен, арестоватлаш логале.

Чылаже машинаштына ныл телевизор погыныш. Умбакыже чыла арестоватлыме пого ужалалтеш, окса парымым петыраш колталтеш. Но тыгай погын акше пеш шулдо, садлан парыман-влаклан садикте оксам кычалаш логалеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: