"Илыш йогын" рубрик, 2016 ий, Кылме тылзын 25-ше кечыже

«Тихие зори» рӱдер ӱжеш

Статьян авторжо Ирина Ямбаршева

%d0%b7%d0%be%d1%80%d0%b81Оршанке кундемысе Ошла эҥер воктене «Тихие зори» каныме рӱдер верланен. Тысе вершӧрын моторлыкшо, Ошла эҥерын йыли-юли йоген эртыше вӱдшӧ Мамаевмыт ешым поснак куандарен, тышан пӧртым вераҥдаш кумылаҥден.
Леонид Анатольевич Мамаев Йошкар-Олаште шочын. Пелашыже Альбина Робертовна дене кум эргышт уло. Эрге-шамычлан пӧртым чоҥаш шонен, тымык, яндар южан пӱртӱс лоҥгаште, вӱд воктене верым ятыр кычалыныт. Оршанке кундемысе Изинур ял Леонид Анатольевичын чонжылан лишылрак чучын, садлан тыште ик гектар мландым налын, чоҥымо пашалан пижын. Тунам каныме рӱдер нерген шонымаш лийын огыл, эрге-шамыч ача-ава пелен иленыт. Но чоҥымо пӧрт-влак яра ынышт шинче манын, тушко еҥ-влакым канаш пурташ тӱҥалыныт. Тыге тыште «Тихие зори» каныме рӱдер почылтын.
%d0%b7%d0%be%d1%80%d0%b802017 ийыште «Тихие зорилан» вич ий темеш. Ты жапыште тыште шӱдӧ утла сӱаным эртареныт. Лу тӱжем утла еҥ яндар южым шӱлен, кайык мурым колыштын, кечым вашлийын але ужатен, чонжым луштарен. Тышке Моско, Озаҥ, Санкт-Петербург, Сыктывкар, Киров, Нижний Новгород, тора Йӱдвел кундем гыч каныше-влак коштыт.
Колызо, сонарзе-влаклан посна пӧрт-влак улыт. Уна пӧлемым айлен канаш лиеш. Эконом манме пӧрт-влакым утларакшым ешан-шамыч ойырен налыт. Кажне пӧртыштӧ тачысе кечылан келшыше чапле мебель, телевизор, мушкылтмо пӧлем да шондан улыт, интернет пашам ышта. Пӧрт пелен шылым тулышто кӱкташ мангал-влакым вераҥдыме. Йоча-влаклан модаш посна площадкым келыштарыме: Вувер куван пӧртышкыжӧ пурен лекде нигузе от чыте. Икшывын куаныме, йоҥгыдо йӱкшӧ торашке йоҥгалтше манын, мунчалташ курык-влак улыт.
Канаш толшо-влакын кумылыштым савыраш мончам ыштыме. Тудо пу дене олталтеш. Тумо, куэ выньык дене пайдаланаш лиеш. Тыгак сауно, хамам (турецкий монча) улыт, дизайнышт дене толшо-влакым ӧрыктарат. Хамамыш утларакшым ӱдыр-влак коштыт, тушто эн кугу температур нылле градус марте гына лиеш. Шокшо монча деч вара кеҥежым бассейныште йӱштылаш лиеш.
%d0%b7%d0%be%d1%80%d0%b8001Каныме верым пӱртӱс лоҥгаште келыштарыме, санаторийысе гай йӧным ыштыме, манаш лиеш: еҥ-влаклан тыште джакузи, гидромассаж, спа-процедур-влакым темлат. Кӧ каналтыме годым вийым погаш йӧрата, тудо тӱрлӧ модыш-влакым ойырен налын кертеш. Футболла, волейболла модаш площадке-влакым, теннислан лӱмын ӱстелым вераҥдыме. Кеҥежым вӱд ӱмбалне ийын кошташ пуш, квадроцикл улыт, телым ече, снегоход дене пӱртӱсыш лекташ лиеш. Пейнтболым йӧратыше-влаклан клубым ыштыме.
– Каныме рӱдерыш тора гыч толшо-влак Марий кундемым ончал савырнаш экскурсийым эртараш чӱчкыдын йодыт, — манеш Леонид Анатольевич. – Кумылыштым огына кодо, Йошкар-Олашке але моло вершӧрыш шкеак коштыктем.
Нуным марий калыкын ожнысо илемже дене палдараш тыште ик пӧртын икымше пачашыштыже ик пӧлемым тошто пӧрт семын келыштарыме. Тыште кужу теҥгыл, ӱстембал, коҥга шеҥгелне — кӱртньӧ койко, азам рӱпшымӧ шепка, ожнысо шифоньер койыт. Суртышто кучылтмо арвер-влакат тошто улыт, пурымек, чынак, тошто марий илемыш логалметла чучеш.
%d0%b7%d0%be%d1%80%d0%b801«Тихие зориште» каныше-влакым сайын пукшат. Менюшто — коҥгаште кӱктымӧ, коптитлыме, тушитлыме кочкыш, кӧ оксам аныкла гын, нунылан лӱмын ялысе менюм келыштарыме, тыгай кочкыш шулдынрак шога. Каныше-влак шкеат шолтен кертыт, кажне пӧрт пелен кухньо уло.
Каныме рӱдерыште сӱаным эртараш поснак йӧнан. Мондалтдыме сӱан лийже манын, лӱмын кугу беседкым ыштыме, ӱдыр-качылан войзалтме верым, аллеян коридорым келыштарыме. Шке жапыштыже тыште марий сылнымутын классикше С.Г.Чавайнын уныкажын сӱанже лийын, Л.А.Мамаев-лан тиде кугу чап. Тыгак ятыр сӱаным Моско, Питер гыч толшо еҥ-влак эртареныт.
%d0%b7%d0%be%d1%80%d0%b84Кеҥежым ку-дывечым ончен шер ок тем. Шӱдӧ тӱрлӧ пеледыш, вондер, пушеҥге-влак йомак тӱняште улмым шижтарат. Пеледышлан озымым тыште шкеак ямдылат, тидлан лӱмын теплицым вераҥдыме. Пакчасаскам, емыжым куштат, туддене каныше-влакым сийлат.
Л.А.Мамаевын ончыкылык шонымашыже кугу, канаш толшо-влаклан шылым ситараш манын, вольыкым шукырак ончынеже. Кызытеш шыллан лудо, кролик-влакым ашна, умбакыже тиде пашам вияҥдынеже, вӱта-влакым чоҥаш тӱҥалын.
Кызытсе илышлан келшыше, чыла шотыштат йӧнан пӧрт, пӧлем-влаклан, мончалан, хамамлан мотор, кумылым савырыше дизайным Леонид Анатольевич ден пелашыже Альбина Робертовна шоненыт. Нуно ятыр элыште лийыныт, ойыртемалтше чапле пӧрт-влакым шуко шымленыт, а вара Марий кундемыште йотэлысе дизайнан каныме рӱдерым почыныт. Тидым «Тихие зори» каныме рӱдерыште, канаш шонышо кажне кумылан еҥ ужын, шижын кертеш. Айдемын чонжым тичмашнек лач мотор пӱртӱс, тымык юж, эҥер вӱд, лыжга мардеж кандарен кертыт, а чапле, мотор пӧртыштӧ лийме канышым эшеат чот пайдалым ышта. Толза, «Тихие зори» каныме рӱдерыште ласкан чондам луштарен каналтыза!
Канаш пурымо деч ончыч договорым ыштат, залог шотеш оксам пуыман. Каныше-влак «Тихие зори» каныме рӱдерын условийже дене кӧнышаш улыт. Чыла тидыже рӱдерыште лӱдыкшӧ лийме деч арала.

Елена Годунова.
И.Речкинын фотожо-влак.

%d0%b7%d0%be%d1%80%d0%b807 %d0%b7%d0%be%d1%80%d0%b808

%d0%b7%d0%be%d1%80%d0%b809 %d1%82%d0%b8%d1%85%d0%b8%d0%b5-%d0%b7%d0%be%d1%80%d0%b81

%d1%82%d0%b8%d1%85%d0%b8%d0%b5-%d0%b7%d0%be%d1%80%d0%b82 %d0%b7%d0%be%d1%80%d0%b8002

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: