"Айдеме да закон" рубрик, 2016 ий, Кылме тылзын 11-ше кечыже

Тудын участкыже – Курыкмарий район

Статьян авторжо Светлана Кушакова

Участковыйын кечыж вашеш кажне ийын “Калык участковый” Россий конкурс эрта. 1-10 ноябрь гутлаште “Комсомольская правда” савыктыш пӧртын информационный порталыштыже келшыше участковый верч кеч-кӧ йӱклен кертын. Тений ты конкурсышто республикын чапшым Курыкмарий район гыч участковый, полиций капитан Сергей Васильевич Ерошкин арален.

%d0%b5%d1%80%d0%be%d1%88%d0%ba%d0%b8%d0%bdТудын анкетыжым, пашаж нерген видеороликым республикысе МВД-н 12.мвд.рф сайтысе “Калык участковый” разделыште ончалаш лиеш.

31 ияш Сергей Ерошкин элгӧргӧ паша органышке 2009 ийыште служитлаш толын. Участковый профессийым ойырен налын. Тудын участкыже пел Курыкмарий кундем манаш лиеш.

Сергей Васильевич икымше кечыла гычак шке участкыжым ончен лектын, тушто криминал шотышто сӱретым шымлен. Эн ончыч самырык пашаеҥлан кугурак коллегыже Андрей Севодняев полшен шоген. Тудыжо ты пашаште 20 ий тырша. Самырык участковый серьезный да ответственный улмыжым ончыктен, шке сомылжым уло кумылын шуктен, верысе калык денат мутланен моштен. Тидланак кӧра еҥ-влакат тудын нерген сай шомакым веле ойлат. Сергей Ерошкин шке участкыштыже 98 процент ыштыме осал пашам тӱжвак луктеш. Южгунам тудо преступлений нерген уверым дежурный часть деч ончыч пален налеш.

Пырля ыштыме йолташыже-влакын каласымышт почеш, Сергей Ерошкин шке пашажлан шуко жапым ойыра, полыш кидым шуялташ эреак ямде. Калыкыштат тудым “урядник” манын порын лӱмдат. Тыге ожно правам аралыше, ялыште лийше чыла уверым ончылгоч пален налше, законым шуктымым тергыше еҥым маныныт.

Сергей Васильевич нелылык ончылно вуйым огеш саке. Кеч-могай осал пашам шонен, вискален терга. Шкетланжат преступникым кучаш логалын.

Пӧлемыште шинчен пашам ышташ ом йӧрате. Мыланем еҥ-влак дене мутланаш, эҥгекыш логалше еҥ-влаклан полшаш келша. Школлаште йоча-влак денат вашлиймашым эртарем. Нунылан шке пашам нерген каласкалем, эҥгекыш логалме деч шижтарем, ой-каҥашым пуэм”, — ойла участковый. Икманаш, закон дене келшышын илаш туныкта.

Ӱмаште Сергей Ерошкин республикысе генерал-майор Н.Ф.Попов лӱмеш премийым налын. Тудым республикысе ОВД ветеран-влак совет кучыктен. (Генерал-майор Н.Ф.Попов Кугу Отечественный сарын ветеранже, республикысе элгӧргӧ паша министрлан 23 ий пашам ыштен). Тиде премий С.Ерошкинлан шерге, сайын пашам ыштымыжым ончыкта.

Курыкмарий районысо участковый Сергей Ерошкинлан сеҥымашым тыланена. А конкурс Участковый-влакын кечышт годым 17 ноябрьыште иктешлалтеш. Тӱҥ приз – УАЗ внедорожник.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: