"Айдеме да закон" рубрик, 2016 ий, Кылме тылзын 18-ше кечыже

Ужашын-ужашын пӧртылташ лиеш

Статьян авторжо Светлана Кушакова

ЖКХ услугылан парым шотышто республикысе сӱрет, парымым петырыме йӧн-влак нерген “Единый расчетный центрын” юристше Игорь Андреевич Исмагилов дене мутланышна.

- Игорь Андреевич, республикыште ЖКХ парым шотышто могайрак сӱрет палдырна?

- Чаманен каласаш логалеш, кажне ийын калыкын ЖКХ -услугылан оксам тӱлен кертме начарештеш. Тидыже тӱрлӧ амал дене кылдалтын. Но вет палемдыман: жилищно-коммунальный услугылан тӱлен шуктыдымо окса ты услугын качествыжымат локтылеш. Мутлан, окса ситыдымылан кӧра олтымо тургымлан шот дене ямдылалташ ок лий, инженерный сетьым, котельный да водозаборный оборудованийым олмыкташ ок лий. ЖКХ сферыште пашам ыштыше-влак жапыштыже пашадарым огыт нал. Тидыже мыланна нелылыкым луктеш.

Республикысе кажне еҥын парымже шотышто пеҥгыдын йодаш тыршена. Парым нерген ушештарыме серышым налмеке, молан тӱлен кертдыме нерген вик увертараш да тудым петырыме корным пырля кычалаш темлена. Тидыже суд марте пашам огеш шукто.

Каласыман, ЖКХ парымым пӧртылтымӧ паша ӱмашсе дене таҥастарымаште сай могырыш вашталтын. Йошкар-Олаштак парым нерген суд деч ончыч уведомленийым колтымылан кӧра, а тыгайже 13 тӱжем утла лийын, 50 млн теҥге парымым пӧртылтен кертме. Но южгунам потребитель-влак суд мартеат шуктат. Тений рӱдер республик мучко 1000 утла искым судыш пуэн. Тыге суд гочын 30 млн теҥге ЖКХ парымым пӧртылтымӧ.

- Парым улмо годым могай коммунальный услуго деч посна потребительым коден кертыда?

- Жилищно-коммунальный услугым темлыше организаций-влак (управляющий компаний ден ТСЖ) электровийым, газым да шокшо вӱдым пуымым чарнен кертыт.

- Парым шуко погынен гын, а тудым вик тӱлаш йӧн уке годым ужашын тӱлаш лийме нерген колынам. Тидлан мом ыштыман?

- Тыгай годым пачер оза але арендыш налше еҥ управляющий компанийыш але ТСЖ-ыш каен йодмашым возышаш. Парымым ужашын тӱлымӧ шотышто соглашенийым ыштышаш улыт. Тидлан пелен паспорт да пачерын собственникше улмо але арендыш налме шотышто документ-влак лийшаш улыт.

- Отпускыш але командировкыш кайыме але вес амаллан пачерыште илыдыме годым тиде жаплан квартплатым вес семын шотлышт манын, домоуправленийыш йодмаш дене лекташ лиеш мо?

- Илыме верыште вич кече деч шукырак лийдыме годым потребитель управляющий компанийыш але ТСЖ-ыш, тыгак республикысе единый расчетный рӱдерыш перерасчетым ыштыме нерген йодмашым возен кертеш. Тыгодым тидын шотышто документым ончыктыман. Перерасчетым ышташ индивидуальный учет прибор уке годым веле лиеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: