"Рубрик деч посна", 2016 ий, Кылме тылзын 25-ше кечыже

Чыла йодышым шотыш налме

Статьян авторжо Светлана Кушакова

Кугыжаныш Думын депутатше-влак кокымшо арня Марий Элыште пашам ыштат.

22 ноябрьыште, кушкыжмын, “Единый Россий” партий председатель Д.Медведевын приемныйыштыжо депутат В.Кидяев приемым эртарен. Чылаже шым еҥ толын.

Индивидуальный предприниматель Д.Мишин “Георгиевский сорта” патриотизм шӱлышан проектым илышыш шыҥдарыме йодыш дене толын. Проект почеш школлаште почмо урокым эртараш, депутат-единоросс-влак дене пырля сортам ышташ, йоча-влаклан сарысе герой-влакын подвигышт, медаль да орден-влак нерген каласкалаш темлалтеш. Д.Мишин ты проектым поддержатлаш ӱжын.

Йошкар-Ола воктенысе Якимсола ялыште илыше-влак федеральный автокорно гоч кошташ йолешке-влаклан вончакым йӧнештараш йодыныт. Кугорно ялым кок ужашлан шелын, садлан ик ужаш гыч весыш вончаш пеш йӧсӧ. Депутат тидын шотышто полшаш сӧрен. Федеральный корно озанлыкын автомобиль корно управленийжын вуйлатышыж дене мутланен, тиддеч вара юрист дене пырля ты ведомствыш йодмашым колтымо.

Йошкар-Олаште илыше шоҥго ӱдырамаш кредит организацийын ондалымыж нерген каласкален. Эргыжлан пачерым налаш манын, шоҥгыеҥ потребительский кооперативыш оксам ятыр ий колтеден. Оксам йодмыж почеш пӧртылташ тореш лийыныт. 2015 ийыште организаций петырнен. Суд лийын, организаций парымым пӧртылтышаш манын пунчалыныт. Но окса кызытат уке.

Вес ӱдырамаш пошкудыж ӱмбак вуйым шийын. Тудо кӱлеш ведомствыште кутырен келшыдеак пачерыштыже перепланировкым ыштен. Кум пӧлеман пачерым тӱшкагудыш савырен, икмыняр душ кабиным, санузелым ыштен шынден. Суд лийын гынат, тудын пунчалжым кызыт мартеат шуктымо огыл. В.Кидяев ӱдырамашлан олан мэрже Е.Маслов деке логалаш полшен.

“Йошкар-Ола” ола округ депутат-влак погынын депутатше М.Жирова коляскыште шинчыше ик инвалидын йодышыж дене толын. Тудо кудымшо пачашыште ила, лифт уке, весын полышыж деч посна пачер гыч лектын огеш керт. Инвалид пачерым вашталташ шона, но южо законышто улшо положений тидым ышташ огеш пу.

Туберкулез ваштареш кучедалме диспансерын йоча отделенийжын пашаеҥже-влак изи йоча-шамычлан пӱкеным налаш полшаш йодын толыныт. Ты йодышым республикысе тазалыкым аралыме министр В.Шишкинлан ончаш колтымо.

Килемар районышто илыше-влак районысо эмлымверым Медведево районысо дене ушаш палемдыме шотышто тургыжланат. Депутат медицине тӧнеж умбакыжат ончычсылак вашталтыш деч посна пашам ышташ тӱҥалеш манын ӱшандарен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: