"Сылнылык тӱня" рубрик, 2016 ий, Кылме тылзын 11-ше кечыже

Шке возат, шке мурат

Статьян авторжо Анастасия Эманова

У Торъял район Кузнеч ялысе «Весела кова-влак» ансамбль кеч-могай мероприятийым мастарлыкше дене сӧрастара. Тудо тӱрлӧ фестивальын лауреатше да дипломантше.

%d0%ba%d1%83%d0%b7%d0%bd%d0%b5%d1%871Ансамбльыш шым ӱдырамаш коштеш. Нуно чылан пенсионер улыт. «Весела кова-влак» коклаште лидер уке, мероприятийлаш тӱрлӧ номерым ваш келшен, каҥашен ямдылат. А муро-влакым Александра Григорьевна Ермакова воза. Тудо У Торъял район Кандашплак ялеш шочын-кушкын. Кузнеч ялысе рвезылан марлан лектын. Музыкым йӧратымаш тудын вӱрыштыжак. Самырыкше годым артисткылан тунемнеже улмаш. «Тукымыштем музыкальный еҥ-влак шукын улыт. Ачамын шольыжын эргыже Станислав Михайлович Элембаев уста семмастар лийын. Изамын эргыже Анатолий Куклин – палыме мурызо. Авамын могырымат шукын семӱзгар дене шоктен моштеныт, мураш-кушташ тале ыльыч.

Кандаш классым Кузнеч школышто тунемынам. Школысо мероприятийлаште изинек муренам. Туныктышо-влак яндар йӱкан улам маныныт да артистлан каяш темленыт. Авамлан тидын нерген ойленам, да тудо мыйым колтен огыл. Артист-влак чыган гай арня дене корнышто улыт манын каласен. Школ деч вара Козьмодемьянск оласе ялозанлык техникумыш зоотехниклан тунемаш пуренам. Дипломым налмеке, мӧҥгӧ пӧртылынам да Ленин лӱмеш колхозышто профессием дене пашам ышташ тӱҥалынам. 19 ияшымак тӱҥ зоотехниклан шогалтеныт. Тунам колхоз пеш кугу да виян лийын: кок сӧсна ферме, тынарак ушкал ферме. Паша опытем лийын огыл, вуйлатенжат моштен омыл, но эркын тунемалтын.  

Ешыште кандаш икшыве кушкынна. Ача деч посна ондак кодмо. Тунам мый кум ияш веле лийынам. Ачам Григорий Федорович Элембаевым районышто пагаленыт. Тудо Кугу Отечественный сарыште тушман ваштареш кредалын. 1943 ийыште мӧҥгӧ пел кидан пӧртылын. Инвалидностян лийын гынат, Сталин лӱмеш колхозын председательжылан шогалтеныт. А авам Анна Мокеевна фермыште имньым ончен, шала пашашкат коштын», — шке илышыж нерген кӱчыкын палдарыш ӱдырамаш.

«Ансамбльна 2004 ийыште шочын. Тылеч ончычат ӱдырамаш-влак мураш погыненыт ыле, но «Весела кова-влак» лӱмым лач 2004 ийыште пуэнна. Кажне кугу пайремлан ялыште концертым ончыктена, кертме семын гастроль денат коштына. Тӱрлӧ фестивальыште участвоватленна да эреак, манаш лиеш, призовой верым налынна. Мутлан, 2013 ийыште Удмуртийысе Бурановышто калык тӱвыра фестивальыште участвоватленна. Тылеч ончыч Угарман кундем Тоншаево ялыште эртыше «Тошто марий пайрем» фестивальыште мастарлыкнам ончыктенна. Дипломант лийынна. Тыгак ӱмаште Пеледыш пайрем годым «Сӱан пайрем» фестиваль-конкурсышто У Торъял районысо сӱан йӱлам модын ончыктенна, тушто кумшо верым налынна.

Марий тувырым шке ямдылена. Тӱрлена, пидына, межым шӱдырена, икманаш, ялысе вате мом ыштен моштышаш, чыла кертына. Кажне кугарнян ялысе клубыш погынена да номер-влакым ямдылена. Тыгак клуб пелен «Илыш мундыра» кружок уло. Тушто тӱрлӧ темылан мутланена.

Ансамбльнан репертуарже поян. Муро-влакым 2007 ий годсек возем, кызытеш 60 наре мурем уло. Ончыкшым муро дискым да книгам лукташ шонымаш уло», — ойлыш Александра Григорьевна.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: