"Шинчымаш кугорнышто" рубрик, 2016 ий, Кылме тылзын 11-ше кечыже

Школышто трактор дене кудалышташ туныктат

Статьян авторжо Анастасия Эманова

Медведево районысо Руш Кукмарий кыдалаш школ кажне кечын гаяк мӱкш омартала гӱжлен шинча. Тыште районысо тӱрлӧ мероприятий чӱчкыдын лиеда.

untitledШколым ятыр ий Волжский районын шочшыжо Александр Леонтьевич Иванов вуйлата. Школ нерген директорын туныктымо да воспитатлыме паша шотышто алмаштышыже Валентина Германовна Зыкова (снимкыште) каласкалыш.

Чолга ӱдырамаш 1986 ий годсек школышто пашам ышта. МарГУ-со историй да филологий факультетым тунем пытарен. Школышто ончыч тудо пионервожатый лийын, вара руш йылмым туныктен. Ынде 15 ий директорын алмаштышыжлан ышта.

«1900 ийыште школна 20 йочам парт коклаш икымше гана шынден. Тунам тудо ик туныктышын суртешыже верланен улмаш. Вара школ кандашияш лийын. А 1990 ийыште «Суртовский» совхоз директор Венедикт Иванович Тимохинын тыршымыжлан кӧра кудшӱдӧ веран у зданийым чоҥымо.

vadyptzgllsКызыт школыштына 177 йоча тунемеш, 20 туныктышо уло. 10-11-ше класс-влак агротехнологический профиль дене пашам ыштат. Тушто ӱдыр-влак технологий предметым утларак тунемыт, рвезе-влак – агротехнике ден агрохимийым, тыгак ялозанлык машина нерген шуко пален налыт. Ончыч рвезе-влак тракторым виктарыме, корно правилым палыме шотышто ГАИ пашаеҥ-влак ончылно экзаменым кученыт да правам налын кертыныт. Кызыт уке. Туге гынат йоча-влак корно правилым, ялозанлыкысе тӱрлӧ машинан мо гыч ышталтмыжым тунемыт. Школ кумдыкыштак практикым эртат, тракторым виктарат. Каласыман, «Суртовский» совхоз йоча-влакым туныкташ шонымаш дене шукертак тракторым мемнан школлан пӧлеклен.

Школ пелен пакча, пареҥге пасу улыт. Тӱрлӧ пакчасаскам шындена. Йоча-влак полышкалат. Нуно кунам да кушко могай пакчасаскам шындаш лийме нерген кугыеҥ-влак деч сайынрак палат.

Агротехнологический профилян классым тунем пытарымеке, 20-25 процент йоча ялозанлык дене кылдалтше специальностьлан умбакыже тунемаш кая. Руш Кукмарий ял Йошкар-Ола деч 15 меҥге тораште веле верланен. Садлан кандаш класс деч вара шуко йоча оласе лицейлаш тунемаш пура.   

Школыштына марий йылмым 2-11-ше класслаште туныктат. Кажне ийын марий йылме дене олимпиадыште участвоватлена. Кок ий почела районышто икымше верым налынна.   

Тений марте кажне класс ИКН предметым тунемын. Вич кече тунеммашке куснымо деч вара ИКН-ым 5-ше, 10-шо да 11-ше класслаште веле туныктат. 10-шо классыш коштшо йоча-влак марий калыкын георгафийже, историйже да культуржо интегрированный курсым эртат.

Икшыве-шамыч художественно-эстетический направлениян кружоклашке кошташ йӧратат. Тыгак пионербол, волейбол, баскетбол дене модыт. Медведево поселкысо йоча да самырык-влаклан спорт школын туныктышыжо Константин Андреевич Катьков икшыве-влакым дворовый футбол дене тренироватла. Школ команде кажне тылзын тӱрлӧ турнирыште участвоватла да призовой верым налеш», — ойла В.Зыкова.

Руш Кукмарий школышто класс-влак волгыдо, кумда улыт. Школышто тыгак краеведений тоштерым вераҥдыме. Чаманен каласыман, тушко пурен лекташ йӧн ыш лий.

Кумылым нӧлтышӧ пайрем

2-3 ноябрьыште Руш Кукмарий кыдалаш школышто тунемше-влакын «Стартинейджер» фестивальышт эртен. Тушто Медведево поселкысо 2-шо ден 3-шо номеран, тыгак Руш Кукмарий, Шойбулак, Знаменский да Новоарбанский школ-влакын командышт тӱрлӧ куштымаш-влакым ончыктеныт. Мероприятий Калыкын икоян улмо кечылан да Марий Эл Республикын кечыжлан пӧлеклалтын.

«Фестиваль Руш Кукмарий школын директорын воспитатлыме паша шотышто алмаштышыже Константин Юрьевич Деревяшкинын да педагог-организатор Марина Геннадьевна Николаеван тыршымыштлан кӧра эртаралтеш. Участник-влак фестивальын икымше кечынже школышто олыкмарий, курыкмарий, руш куштымаш-влакым ончыктеныт. А кастене ялысе клубышто калыклан гала-концерт лийын. Команде-влакым тӱрлӧ номинацийыште палемдыме, вет нуно чылан уста да чолга улыт. Ты мероприятий йоча-влакым творчествылан кумылаҥдаш, вашла палымым ышташ шонымаш дене эртаралтын.

Фестивальын кокымшо кечынже «Тунемше-влакын Российысе движенийыштын» марий отделенийжын координаторжо Лариса Вячеславовна Лоскутова дене вашлиймаш лийын. Тудо мер-кугыжаныш йоча организаций нерген каласкален. Тылеч посна тӱрлӧ кидпашам ыштыме шотышто мастер-класс-влак лийыныт», — палдарыш фестиваль жюрин членже, Медведево поселкысо йоча творчестве пӧртын методистше О.В.Царегородцева.

«Стартинейджер» фестивальыште Руш Кукмарий школын тунемшыже-влак чапле марий куштымаш номерым ончыктеныт. Нуно тӱрлӧ мероприятийыште чӱчкыдын участвоватлат, мурат, куштат, спорт дене заниматлат. Мутлан, Яна Пушкина марий йылме дене районысо да республикысе олимпиадыште участвоватлен. Республикыште призовой верыш логалын. Тудо музыкальный школышто хореографий классым тунем пытарен. Марина Яндулова спортым йӧрата. Физкультур дене районысо олимпиадыште эн шуко баллым поген. Волейбол да баскетбол дене талын модеш. Тений волейбол дене районысо турнирыште школын командыже икымше верым налын, а республикыште кумшо лийын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: