"Улам мый Рве-зы-лык!" рубрик, 2016 ий, Кылме тылзын 25-ше кечыже

Эре ончыко, ончыко!

Статьян авторжо Анастасия Эманова

Шукерте огыл Республикысе йоча да самырык-влаклан театр-рӱдерыште «Ӱдырсий» конкурс эртен. Тушто Гран-прим Кужэҥер район Шӱдымарий ялыште шочын-кушшо Полина Савельева (снимкыште) сеҥен налын. Тудо ӱдырсий пайрем йӱлам эн сайын модын ончыктен. Лывырге капкылже, яндар йӱкшӧ дене жюрим шке веке савырен. %d0%bf%d0%be%d0%bb%d0%b8%d0%bd%d0%b01

Полина марий семеш рӱпшалт кушкын. Тудын аважат, ачажат музык дек шӱман улыт. «Ешыште кок икшыве улына, мый  — изиракше. Авам — медпашаеҥ. Тудо мураш-кушташ йӧрата. Шке жапыштыже ялысе «Кӱдыроҥгыр» ансамбльыш коштын. Ачам – водитель. Тудо гармонь дене мастарын шоктен мошта. 9-ше класс марте Шӱдымарий тӱҥ школышто тунемынам, вара Кужэҥер кыдалаш школыш каенам. Школысо тӱрлӧ мероприятийыште мастарлыкем ончыктенам. Шӱдымарий школ пеленысе музыкальный школыш коштынам. Фортепиано дене шокташ тунемынам. Музыкым йӧратем гынат, туныктышо паша чонемлан лишылрак. Сандене школ деч вара МарГУ-ш марий йылме ден литературым, тыгак финн йылмым туныктышо специальностьлан тунемаш пуренам. Кызыт кокымшо курсын студенткыже улам. Марий калыкемын тӱвыраже, йӱлаж дене тӱрлӧ фестивальыште палдараш тыршем. Мутлан, ӱмаште «Мотор марий ӱдыр» региональный конкурсышто участвоватленам. «Артистизм мисс» лӱмым суленам. Тыгак «Ший памаш» муро фестивальыште участвоватленам. «Ӱдырсий» конкурслан арня утла кыртмен ямдылалтынам. Пайрем йӱлам почын пуаш, сценарийым возаш Шӱдымарий клубын художественный вуйлатышыже Алевтина Николаевна Филиппова полшен. Тудлан да клубын диреткоржо Маргарита Ивановна Пудовалан, тыгак йолташем-влаклан кугу таум ойлем», – манеш ӱдыр. Полина спортлан шӱман. Тудо волейбол да баскетбол дене модаш йӧрата. Геннадий Григорьевын «У муро» клубышкыжо коштеш, тыгак МарГУ-со «Марий мурсем» ансамбльыште кушта да мура. Тудо мастарлыкым кажне кечын погаш тырша. «Илыш корнышто ятыр нелылык вашлиялтеш, чыла шонымаш шукталт огеш керт, тидым умылыман да эре ончыко ошкылман», — ойлыш ӱдыр. Тудын девизшат тыгай – «Эре ончыко, ончыко!»

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: