""Кугарня" газетлан - 25 ий" рубрик, 2016 ий, Кылме тылзын 18-ше кечыже

25 ийлан — 25 меҥге!

Статьян авторжо Эльвира Терентьева

21 августышто “Кугарня” газет 25 ияш лӱмгечыжым куржталаш йӧратыше-влакын “Айвика” клубышт дене пырля палемдыш. Йошкар-Олаште Ленин лӱмеш тӱвыра полат воктенысе паркыш спортсмен-влак погыненыт ыле. Тыгак тӱвыра полатын администрацийже, “Кугарня” газет редакцийын пашаеҥже да куржталаш толшо-влак верч азапланыше еҥ-влак ыльыч.

25 меҥге да тынарак кужытан эстафетым эрташ 36 легкоатлет лектын ыле. Эстафетыште (тидым эше экиден маныт) кум команде лийын. Кажныштыже — вич еҥ. Кажне спортсмен вич меҥгым эртен. Ты таҥасымаште эн писылан Марий машиностроитель заводын командыжым шотлымо. Тудо 25 меҥгым ик шагатат 51 минутышто эртен.

Ӱдырамаш-влак коклаште эн сай результат дене Т.Самойлова куандарен: 25 меҥгым 2 шагатат 3 минутышто куржын. 29 ияш Татьяна Петровна — МарГУ-м тунем пытарыме деч вара Марий радиомеханический техникумышто тренер. Пелашыже, 33 ияш Олег Юрьевич, МВД системыште пашам ышта. Тудат спорт дене кылым куча. 2003 ий годсек ече дене куржталмаш дене спорт мастер. Кум эргым ончен куштат. Тений Данил 4-ше классыште, Кирилл 3-шо классыште, а Илья 1-ше классыште тунемаш тӱҥалыт. Коктынжо куштылго атлетикылан шӱмаҥыныт гын, изиракышт самбо дене секцийыш коштеш.

Кокымшо ден кумшо верлам “Айвика” клубын еҥже-влак: Вера Ягдарова ден Анастасия Зотова — налыныт.

Пӧръеҥ-влак коклаште Денис Головин эн писе лийын. Тудат — “Айвика” клубын членже. 5 июньышто “Кугарня” газетын лӱмгечыжлан пӧлеклалтше Волжский районышто Мӱшыл ер воктене курыкыш куржталмаштат тудо абсолютный чемпион лӱмым сулен ыле.

Кокымшо верыш лекше Алексей Матвеев туддеч кок минутлан варашрак финишыш толын. А кумшо верыште – Виталий Воронцов. Тудо Д.Головин деч шым минутлан кодын. Но ончыкыжым сай результатлан ӱшана, вет тудо куштылго атлетике дене спорт мастер да тидланак Йошкар-Олаште йоча-влакым кумылаҥда, спортшколышто пашам ышта да куштылго атлетике дене федерацийын тренерже.

Александр Малеев ден Павел Кузнецов эн самырык участник улыт ыле. Нуно Марий радиомеханический техникумышто тунемыт, автомеханик лияш ямдылалтыт.

Спорт дене кылым 50 ий кучышо 71 ияш Вячеслав Талько денат палыме лийна. Сутка дене куржталмаш да куштылго атлетике дене спорт мастер. “Маригражданстрой” ОАО-што кузнечлан пашам ыштен. Шке ийготан-влак коклаште тудо чолгалыкым ончыктен.

Чыла сеҥыше-влаклан медальым пижыктыме, “Кугарня” газет редакций деч изирак пӧлекым да таумутым кучыктымо. Ты газетын тӱҥ редактор-директоржо Э.Иманаев Виче кундем гыч толшо Павел Михалевым спецприз дене палемдыш. Шке ийготан тӱшкаште сеҥыше-влакат изи пӧлекан лийыч.

“Айвика” клуб шотышто ешараш гын, тений 4 ноябрьыште икымше лӱмгечыжым пайремла. “Айвикалан” — 5 ий! Тиде дате лӱмеш спортсмен-влак 10 меҥгым куржаш палемденыт.

Эльвира Терентьева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: