"Улам мый Рве-зы-лык!" рубрик, 2016 ий, Теле тылзын 16-шо кечыже

Йӱдвелыште марий койышым ончыкта

Статьян авторжо Татьяна Айтова

%d1%80%d0%be%d0%ba%d1%81%d0%b0%d0%bd%d0%b0Пошкырт кундем Мишкан район Пӱрӧмучаш ялыште шочын-кушшо Роксана Аймурзина ынде ик ий наре Хант-Манси автономный округысо Югорск олаште ила. Ӱдыр — тысе «Ӱжара» мер организацийын чолга еҥже.

Роксанан аваж ден ачаже творческий шӱлышан улыт. Ачаже Евгений Ташбулатович – тале гармонист,  аваже Лима Михайловна кушташ-мураш мастар. Ӱдырланат Юмо кид-йол лывыргылыкым, яндар йӱкым пӧлеклен. Пӱрӧмучаш школышто тунеммыж годым Роксана художественный самодеятельность кружокыш коштын, пырдыжгазетым лукташ полшен.  Марий Элыш толмек, МарГУ-со Калыкле тӱвыра да тӱвыра кокласе кыл институтыш тунемаш пурен. Икымше курс гычак «Эрвел марий» ансамбльыш коштын.

«Ты коллективыште шуко йолташым муынам, – каласкала Аймурзина. – Нуно Мишкан район гыч улыт. Иквереш погынен, шке диалект дене мутланенна, эрвел марий сем почеш куштенна.  Икымше гана гастрольыш Марий Турек район Арборыш да Сардаялыш миенна ыле. Варажым Йошкар-Оласе ятыр мероприятийыште мурен-куштенна.  Гастроль дене Марий Эл мучко веле огыл, Татарстаныш, Карелийыш, Одо кундемыш, Киров областьыш миенна. Тунам жап моткоч веселан эртен».

Аймурзина университетысе «Голос юности», «Студенческая весна» мероприятийлаште, тӱрлӧ форумышто, семинарыште шке чолгалыкшым ик гана веле огыл ончыктен, чап  грамот дене палемдалтын.

«Тунемын пытарымек, умбакыже куш каяш манын шонкалаш тӱҥалынам, — ойла ӱдыр. – Хант-Манси автономный округысо Югорск олаште илыше кокам шкеж деке ӱжын. Тудо «Ӱжара» мер организацийым вуйлата. Чонем у верыш шупшын. Йӱдвелыште калык кузе илымым ончалмем шуын. Толмемлан йӧршынат ом ӧкынӧ. Шонымем шуктенам, чонлан келшыше пашам ыштем. Тысе пӱртӱс пеш келша. Теле моткоч мотор, луман, южгунам йӱдвел волгалтмашым (северное сияние) ужаш лиеш. А кеҥежым кече шичме сӧрал. Тыште  кече поснак кугу, йомакысе гай».

Яра жапыште Роксана «Ӱжара» коллективыш коштеш. «Тиде мер организаций 2012 ийыште шочын. Вуйлатышыже – София Бадамшина, - каласкала Аймурзина. — Тышке Советский ден Югорск олала гыч участник-влак коштыт. Утларакшым Марий Турек да Пошкырт кундем гыч толшо марий-влак улыт. Ешышт дене илаш кусненыт, тыштак пашам ыштат. Репетицийым тӱвыра пӧртыштӧ веле огыл, посна пачерлаштат эртарена.  «Эрвел марий» ансамбльыш коштмем моткоч пайдале лийын. Тӱрлӧ куштымашым шындыме, мурым мурымо годым каҥашым пуэм. У костюм-влакым ургаш шонена, теве шукерте огыл теркупшым ургыктенна. Икте-весылан тӱрлӧ мастер-классым эртарена, марий курчакым, кочкышым ямдылена. Тылеч посна тӱрлӧ пайремыште марий койышым ончыктена».

Тышке толмеке, ӱдыр национальный культур фестивальыште участвоватлен, коллектив дене пырля Шорыкйол пайрем йӱлам модын ончыктен.

«Самырык улам, садлан районысо, областьысе да округысо мероприятийлаште чӱчкыдын выступатлаш логалеш, — манеш тудо. — Шукерте огыл «Жемчужина русской культуры» фестивальыште марий сӱан костюм нерген каласкалышым,  тудым чиен, мурым муралтышым. Мыланна икымше верым пуышт. Тылеч посна «Согретые Севером» мероприятийыште марий йылме урокым эртарышна. Тыгак шовычым чын пидме мастер-классым ончыктенна, марий вургем дене подиумышто коштынна. Шарнымашеш «Страницы марийской литературы» мероприятий кодын. Тушко Югран тӱрлӧ луклаж гыч марий-влак  толыныт ыле. Марий Эл гыч ятыр студент лийын».

Йот мландыште кеч-мыняр сай гынат,  чон шочмо верыш шупшеш.

«Марий театрыш, дискотекыш кайымем чот шуэш, — мане ӱдыр. — Чонлан йокрок лийме годым шочмо кундемысе курыкышто, чодыраште погымо матрушка, писте пеледыш, вӱршудо чайым варене дене йӱам, чонем кандарем».

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: