"Сылнылык тӱня" рубрик, 2016 ий, Теле тылзын 23-шо кечыже

Шиялтыш дене шокташ шкевуя тунемын

Статьян авторжо Анастасия Эманова

Провой кундем Чакмарий селаште шочын-кушшо Анастасия Царегородцева Звениговысо краеведений тоштерыште пашам ышта. Тудо тӱрлӧ конкурсышто марий койышыжым ончыкта. Мутлан, октябрь мучаште эртыше «Ӱдырсий» конкурсышто «Мурызо ӱдыр» номинацийыште сеҥен.

r-51ihfdodoАнастасия Чакмарий кыдалаш школым тунем пытарен. Чолга тунемше лийын. Тӱрлӧ лудмаш конкурсышто участвоватлен да призовой верым налын. Сай дикцийлан кӧра А.Царегородцевалан школысо мероприятий-влакым вӱдаш эреак ӱшаненыт. Куштымаш кружокыш коштын. Фортепиано класс дене музыкальный школым тунем пытарен.  Тылеч посна «Чак» йоча фольклор ансамбльыште мурен да куштен. Ансамбль дене пырля республикысе конкурслаште шуко гана участвоватлен. Ансамблыште шиялтыш дене шокташ тунемын. Кызыт ты семӱзгар тудлан ик эн йӧратыме.

Чакмарий школ пелен «Маленькая страна» йоча организаций уло. Тушто Настя тӱвыра министр лийын. Школысо тӱвыра мероприятий-влакым эртараш полшен.

Ӱдыр тыгак спортлан шӱман. Школышто баскетбол секцийыш коштын. Спортын ты видше дене районысо турнирыште Чакмарий школ команде призовой верым ик гана веле огыл налын.

Латик класс деч вара МарГУ-ш тунемаш пурен. «Тӱвыра да сымыктыш факультетын (кызыт Калык культур да тӱвыра кокласе кыл институт) студенткыже лийынам. Изинек тӱвыра аланыште пашам ышташ шоненам. Студент годым шуко книгам лудынам, утларакше исторический произведений-влакым. Книгам йӧратымаш мыйым тоштерыш конден. Звениговысо краеведений тоштерыште икымше ий веле ыштем. Но тӱрлӧ мероприятийым эртарыме паша опытем лийын. Студентке годым тушто У ий пайремым, «Тоштерысе йӱд» акцийым эртаренам. Кызыт тоштерыште туризм шотышто специалистлан ыштем. Йоча-влак дене пырля тӱрлӧ мероприятийым эртарем. Тидыже паша кумылым эшеат чот нӧлта.

js_qu7brokgИкымше курсышто тунемме годым студент-влакын «Интердиалог: АПСНЫ.SU» конгрессыштышт лийынам. Тудо Абхазийын рӱдӧ олаштыже – Сухумиште — эртен. Шокшо кундемым ужмо деч посна вес национальностян ятыр ӱдыр-рвезе дене палыме лийынам», - ойла А.Царегородцева.

Настя пий ден пырысым моткоч йӧрата да нуным чамана. Мӧҥгыштыжӧ ныл пырыс ден кум пийым ашна. Тыгак суртдымо пырыс ден пийым кажне кечын гаяк пукшаш тырша.

Поро кумылан ӱдыр яра жапыштыже книгам лудеш, шиялтыш дене шокталта.

А.Царегородцева моторлык конкурсыштат шкенжым ончыкта. Ӱмаште МарГУ-што «Мотор марий ӱдыр» конкурсышто участвоватлен да «Талант мисс» лийын. Тений 26 ноябрьыште «Саскавий» ӱдырамаш ушемын эртарыме  «Марий солык» пайремыште тоштерын коллективше дене пырля мастарлыкшым ончыктен. Настя шиялтыш дене мастарын шоктен, пайремым ончаш толшо-влак шулен колыштыныт.

Марий шӱлышан ӱдыр шочмо йылмыжым йӧрата, калыкшын тӱвыра моторлыкшым шиялтыш дене шоктен, лыжган марла тавалтен, муралтен ончыкта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: