"Улам мый Рве-зы-лык!" рубрик, 2016 ий, Теле тылзын 9-ше кечыже

“Эр Чолпанын” у шӱдыржӧ

Статьян авторжо Светлана Кушакова

Айда, йолташ, мурена,

Айда, йолташ, куштена.

Мурен-куштен, пашам ыштен,

Веселитлен илена.

Тыгерак эрвелмарий такмак-влакым муралта Марий Эл радион увертарыме “Эр Чолпан” конкурсын участницыже Наталья Сидоркина. Ты конкурс марий эстрадыште у шӱдырым чӱктымӧ, у мурызым кычалме шонымаш дене эртаралтеш. “Эр Чолпан” конкурсышто куд еҥ таҥаса. Наташа – нунын кокла гыч иктыже.

%d0%bd%d0%b0%d1%82%d0%b0%d1%88%d0%b02Наталья Сидоркина У Торъял районысо Кугу Лумарий ялыште шочын-кушкын. Ты школым тунем пытарен. 2005 ийыште ешыж дене пырля Волжский район Кӱсола ялышке илаш куснен. Марий ӱдырын музыкальный образованийже уке гынат, мураш, марий мурым колышташ эреак йӧратен. Марий эстраде шӱдыр-влакат тудым сайын палат. Наташа Волжский районысо Памар селасе ик кафеште “Юл сер” марий дискотекым вӱда. Марий мурызо-влак дене кылже сай, кажне арнян кӧм-гынат касым сӧрастараш ӱжеш. Тыгак кевытыште пашам ышта.

Эр Чолпан” конкурс нерген колмеке, тушто участвоватлаш кумылаҥым. Кок мурым колтенам ыле, но эрвелмарий такмак калыклан лишылрак, садлан тиде муро мураш сайрак манын шонем. Конкурсым 24 декабрьыште У ийлан пӧлеклалтше концертыште иктешлат. Кызыт “Вконтакте” социальный сетьыште йӱклымаш кая. Сеҥемак манын каласен ом керт, но ӱшан тул чонышто ила. Мыйын верч йӱклышӧ-влаклан таум каласем”, - манеш Наталья.

Наташалан муро аланыште икымше ошкылым ышташ самодеятельный композитор Вячеслав Осипов, мурызо Влад Николаев полшен шога.

Самырык мурызын У ий каныш кечылаштат пашаже лыҥ. Тудо моло мурызо-влак дене пырля Пошкырт кундемыш гастроль дене кая. Концертлаште у муро-влак дене калыкым куандара. Икымше гана “Вучем шуматкечым”, “Йӱкет колнем”, “Ит кӧране”, “Торъял такмак-влак” йоҥгалтыт.

Наташа Сидоркина йӱклымӧ почеш кызыт — кокымшо верыште. Тудлан 652 еҥ шке йӱкшым пуэн. Но теле тылзын 24-ше кечыж марте эше жап уло, садлан сӱрет сай могырыш вашталтеш манын ӱшанена. Теат,

лудшо йолташна-влак, йӱкдам ида чамане, конкурсын 4-ше №-ан участницыже Наталья Сидоркиналан йӱклыза!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: