"Илыш йогын" рубрик, 2017 ий, Шорыкйол тылзын 27-ше кечыже

А кӧ «Теремокышто» ила?

Статьян авторжо Анастасия Эманова

Звенигово район Красногорский поселкышто кум йочасад уло. Ик эн чаплыже – «Теремок». Ты йочасадым 1989 ий 4 ноябрьыште почмо. Кызыт тудым уста марий ӱдырамаш Валентина Ивановна Васюкова вуйлата.

Уста коллективЙочасадыш пурет да пуйто йомак тӱняш логалат. Пырдыжым марий да руш йомакла гыч сӱрет-влак сӧрастарат, луклаште Сур пире, Каза, Вувер кува да йомакысе моло герой-влакын курчакыштым вераҥдыме. «Теремокыш» йоча-влак куанен толыт.

«Куд группо уло. Мемнан деке 105 ньога коштеш. Йочасадыште икшыве-влаклан вияҥаш чыла йӧным ыштыме. Индеш воспитатель, туныктышо-логопед, музыкальный вуйлатыше да физический культур дене инструктор тыршат. Кугешнен ойлен кертам: коллективна творческий шӱлышан, вич пашаеҥна икымше категориян  специалист, а молышт кӱшыл категориян улыт, - манеш Валентина Ивановна. -  Мый Советский район Кужмарий селаште шочын-кушкынам. «Теремок» йочасадыште 1990 ий годсек ыштем. Эн ончыч воспитатель лийынам. Ынде 20 ий вуйлатышын пашажым ыштем. Марий кугыжаныш университетысе экономический факультетым тунем пытаренам. Чонем эре йоча пелен лийын. Школышто тунемме годым туныктышо лияш шоненам, но ачам Иван Яковлевич Албахтин (тудо шкеже бухгалтер лийын) экономистлан тунемаш колтен. Университетым 1986 ийыште тунем пытаренам. Звенигово район «Кожласолинский» совхозышто ик жап пашам ыштенам. Пелашемат тушто агроном лийын. А вара йочасадыш пашаш пуренам. Тыгодым Марий пединститутышто тӱҥалтыш класс-влак факультетыште тунемынам. А вуйлатышылан шогалмеке, менеджмент курсым эртенам».

День Респ ноябрь«Теремок» йочасад 2015 ий декабрь годсек этнокультурный направлений дене республикысе инновационный площадке семын пашам ышта. Йоча-влаклан тӱрлӧ калык-влакын тӱвырашт, йӱлашт дене палдарат. Мутлан, физкультурым  туныктышо икшыве-влакым ик урокышто руш калыкын модышыж дене модыкта гын, вес гана – марий, удмурт, татар але чуваш модыш-влак дене. «Тӱрлӧ калык куштымашыжым куштена, мурым мурена, модына, йӱлам тунемына. Йоча-влаклан моткоч оҥай. Шуко тӱрлӧ мероприятийым эртарена. Пашам виктарен колташ Надежда Витальевна Степанова полша. Тудо кугурак воспитатель, моткоч чолга», - каласыш вуйлатыше.

Надежда Витальевна йочасадыште 2005 ий годсек пашам ышта. Ондакше Тошнур школышто (кызыт тудым петырыме) завучлан ыштен да ИКН-ым туныктен. «Ме тыршен пашам ыштена. Тӱрлӧ конкурсыш, йӧн уло гын, эреак ушнена. Йочасад-влак коклаште районысо конкурсышто икымше верым чӱчкыдын налынна. Ялысе йочасад-влакын республикысе конкурсыштышт кок гана призовой верыш лектынна.

Этнокультурный направлений дене таклан огыл пашам ыштена. Ме йоча-влакым марла мутланаш туныктена. Но мемнан тыршымына эше шагал. Ешыште, школышто шочмо йылме дене мутланыман. Красногорский школышто икымше классыште марий йылмым огыт туныкто, кокымшо класс гыч веле йоча-влак марий йылмым кугыжаныш семын тунемыт. Йылме проблеме мемнан республикыште веле огыл. Шукерте огыл Петрозаводск олаште «Финляндий – Россий» обществын эртарыме «Финно-угорские языки и культуры в дошкольном образовании» семинарыштыже лийынам, а ӱмаште тыгаяк семинарыш Сыктывкарыш миен коштынам. Карелий да Коми кундемлаште йылме йодыш эшеат пӱсын шога.

Идалык мучко кажне арня могай-гынат темылан пӧлеклалтын, тидлан келшышын занятий-влакым эртарена. Мутлан, Шинчымаш, Чодыра арня-влак лийыныт, Марий йӱла арня эртышаш. Йоча-влак дене поселкысо библиотекыш, усталык пӧртыш, музыкальный школыш, тӱвыра пӧртыш коштына. Нине организаций-влакын специалистышт дене тӱрлӧ оҥай занятийым пырля эртарена. Тылеч посна республикысе йоча да самырык-влаклан марий театр-рӱдер, курчак театр, Я.Эшпай лӱмеш филармоний дене шкешотан договорым ыштенна. Марий филармонийын пашаеҥже-влак, мутлан, мемнан деке кажне ийын толыт. Ик гана тӱрлӧ калыкын семӱзгарже-влак дене палдарат, вес гана – куштымаш, калык муро-влак дене. А мартыште театр-рӱдерын артистше-влак мемнан деке, ик марий йоымакымрушыш кусарен, оҥай спектакльым кондышаш улыт.Йочасадыште - тоштер

Тений йочасадыште тоштерым почна. Тудо марий пӧртым ушештара. Экспонат-влакым шкеат, ача-ава-влакат погаш полшеныт. Нуным тӱрлӧ мероприятийыште кучылтына. Ик йочан кугезе кочаже, кийыме мландыже пушкыдо лийже, шке пидме йыдал-влакым пуэн. Нине йыдалым концертым ыштыме годым чиена. Тоштернам художник-оформительна Роза Геннадьевна Белкова сӧрастарен. Тудо сӱретла, урга, пидеш, курчакым ышта.

Йочасадын пашаеҥже-влак спортлан шӱман улыт. Ме волейболла модына, арняште кок гана тренировкым эртарена. Спортын ты видше дене икана районышто тӱрлӧ организацийын командыже-влак коклаште кумшо лийынна», — палдарыш Н.В.Степанова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: