"Улам мый Рве-зы-лык!" рубрик, 2017 ий, Шорыкйол тылзын 13-шо кечыже

Журналистикыш пӱрымаш конден

Статьян авторжо Анастасия Эманова

Советский районысо «Вестник района» газетын возгалышыже Владимир Виногоров тӱрлӧ форумышто чӱчкыдын участвоватла. Марий самырык тукым слетыштат ик гана веле огыл лийын.

BjSAPhjY6kc

В. Виногоров Советский район Ӱшнур селаште шочын-кушкын, тыштак ила. Аваже Нина Гавриловна ты почто начальниклан ятыр ий ыштен, вара тыглай почтальонко лийын. Тудым ончен, Володя газет ден книгам изинек лудаш кумылаҥын. «Авам канымыла газетым але книгам эре лудеш. Садланак, очыни, изинек прессым, книгам лудаш йӧратем.  Авам  «У илыш» колхозышто дояркыланат ыштен, презымат ончен. Кызыт тудо пенсионерке. А ачам ятыр ий «У илыш» колхозышто ДТ-75 трактор дене пашам ыштен. Вара начар тазалыклан кӧра ты ялозанлыкыштак вакшоза лийын. Чаманен каласыман, 15 ияшем годым тудын ӱмыржӧ лугыч лийын.

Ӱшнур кыдалаш школышто тунемынам. Историй предметым моткоч йӧратенам. Ик жап историк лияш шоненам. Ты предмет дене олимпиадыштат участвоватленам. А руш литератур урокым эре шӱм вургыжын вученам. Школ программе почеш чыла манме гаяк произведенийым лудынам. Сочиненийым возаш йӧратенам. Школ деч вара МарГУ-со историй да филологий факультетыш историйым туныктышылан пураш шоненам. Но балл ситен огыл. Садлан Оршанке педколледжыш «Социальный педагог» специальностьлан тунемаш пуренам. Шижынам, тидыже чонемлан лишыл огыл да, ныл тылзе наре тунеммеке, колледжым коденам. А вес ийын Марий кугыжаныш университетыш историклан заочно пуренам. Но туштыжат ик семестрым веле тунемынам – армийыш наҥгаеныт. «Плесецк» космодромын территорийыштыже верланыше частьыште служитленам. Контракт почеш армийыш коднем ыле, но документем йоҥылыш весын дене лугеныт. Армий деч вара 2008 ийыште Совесткий районысо Вечын селасе аграрно-строительный техникумыш зданий ден сооружений-влакым чоҥымо шотышто специалистлан тунемаш пуренам. Плиточник, сварщик, штукатур, каменщик профессий-влакым сайын пален налынам. Техникум деч вара «Советский ПМК» производственный кооперативыште ик ий штукатурлан ыштенам. А вара «Вестник района» газетыш корреспондентлан пашаш ӱжыныт. Тӱрлӧ аланыште пашам ыштенам, но ала-могай вий мыйым виешак, манаш лиеш, журналистикыш конден. Возгалаш изинек йӧратем. Школ деч вара «Красный дракон. Второе пришествие» изирак икымше романем шочын. Фэнтези жанрыште возгалаш келшен да вара ты романым умбакыже шуенам, тылеч посна эше икмыняр произведенийым возенам. «Молодежная жизнь в Марий Эл» газетын электрон почтышкыжо «Любовь в сети» романем колтенам. Икмыняр жап гыч газетын редакторжо да «Марийская правда» газетын корреспондентше Василий Золотов мыланем йыҥгыртен, да «Молодежная жизнь в Марий Эл» газетыш умбакыже возаш йодын. «Блуждание впотьмах» хоррор повестем кок номерыште савыкталтын. Тыгак газетыш чолга ӱдыр-рвезе-влак, тӱрлӧ молодежный организаций нерген возкалем, оҥай теме-влаклан йодыштмашым эртарем.

Поэзий чонем луштара. Шкежат почеламут-влакым возкалем. Кызытеш 100 наре стихем уло. Но нуным эше лишыл еҥем-влак веле лудыныт.

«Вестник района» газетыш тӱрлӧ тематикылан статья-влакым ямдылем. Журналистын пашаже моткоч оҥай. Возкалымаште шкешотан, ойыртемалтше стильым кычалам. Псевдонимым шуэн кучылтам. Но икмыняр гана Михаил Смоленцев (икымше романемын геройжо тыгай лӱман) да Александр Лучик лӱм дене савыкталтынам.

Газетлашке веле огыл, тыгак «Кидшер» интернет-журналыш возкалем. Чолга еҥ-влак дене палдарем», — ойла самырык журналист.

В.Виногоров тӱрлӧ мероприятийыште участвоватла, мер илышыштат чолгалыкшым ончыкта. «Техникумышто тунемме годым чоҥымо паша дене веле огыл, тыгак информатике да обществознаний дене кылдалтше ятыр проект-презентацийым ямдыленам. Тунемме группын старостыжо лийынам. Кокымшо курсышто «Молодежь Советского района» мер организацийыш ӱжыныт. А ик ий гыч районысо Молодежный парламентыш сайленыт. Кызытат парламентын членже улам. Организацийна тӱрлӧ мероприятийым, флэшмобым, акцийым эртара. Самырык-влак дене уремым, шӱгарлам шӱк деч эрыкташ коштынна. Эн тӱҥжӧ Советский поселкышто ончычсо 1-ше №-ан школын зданийыштыже Молодежный рӱдерым почынна. Тидлан ме шуко пашам ыштенна. Каласыман: тыгай рӱдер республикыште тылеч посна ик районыштат уке. Тений шошым рӱдерым почмылан кум ий темеш. Кодшо кеҥежым рӱдерна районысо школлаште тунемше-влаклан «Молфест» фестивальым эртарен. Тӱрлӧ каныме да интеллектуальный конкурс, модмаш, мастер-класс лийыныт. Районыштына самырык тукым чулым. Мероприятийлаш кумылын ушна. Тӱрлӧ идей-влакым илышыш шыҥдараш тырша. Техникумышто тунемме годым икымше гана Марий самырык тукым слетышто лийынам. Тылеч вара кажне ийын манме гаяк тушто участвоватленам. Тыгай слет калыклан кӱлеш. Тудо ӱдыр-рвезе-влаклан марий улмыштым шарныкта, кугезе коча-кованан йӱлажым, культуржым палаш, пагалаш туныкта. 17-18 ноябрьыште Ижевскыште Удмурт Республикысе «Вместе» шуко национальностян молодежный образовательный рӱдерын регион-влак кокласе икымше тунемме сессийже эртен. Тушко Российын шым регионжо гыч мер ушем-влакын еҥышт толыныт. Марий Эл гыч нылытын миенна. Пеш оҥайын эртен. Участник-влак «Воспитание гражданской идентичности как способ профилактики экстремизма в молодежной среде» темылан лекцийым колыштыныт, занятийлаште лийыныт, «ЭТНОэксперт» модышышто модыныт. Ныл проектный группо пашам ыштен. Мый «Информационное сопровождение социальных этнокультурных проектов» группышто лийынам. Пеш шуко оҥай мероприятий эртен. Ижевск ӱмырешлан сай шарнымашым коден», — манеш Володя.

Самырык журналистым районыштыжо Ӱшнур ял шотан илемыште депутатлан сайленыт. Тудо «Единый Россий» партийын политикыж дене келша да ончыкшым ты партийын членже лияш ӱшана.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: