"Кузе илет, ялем?" рубрик, 2017 ий, Шорыкйол тылзын 13-шо кечыже

«Йомакысе десант» У ий дене саламлен

Статьян авторжо Татьяна Айтова

eBfiV6q5NWYТатарстан кундем Актаныш район Йӱштӧ Памаш ялысе активист-влак калыкым У ий дене оҥайын саламленыт.

Пайремым эртарыме нерген ялысе калыклан ондакак увертареныт. Тыге У ий кечын Йӱштӧ кугыза, Лӱмӱдыр, Агытан, Вувер Кува, Маймыл, Имньызе, Рывыж кум имньым кычкеныт, ял мучко коштыныт. Пайремыш 22 йоча толын. Ондак Йӱштӧ кугыза  спортивный модыш-влакым эртарен. Вара йомакысе персонаж-влак сурт еда коштыныт. Ик пӧртымат ӧрдыжеш коден огытыл. Йоча-влак почеламутым лудыныт, мурым муреныт. Кажныжлан Йӱштӧ кугыза ден Лумӱдыр изирак пӧлекым кучыктеныт. Ялысе амалкалче-влак Кугу Отечественный сарын ветеранже Минтимер Арслановлан пӧлекым ямдыленыт. Тудым Йӱштӧ кугыза кучыктен. Саламлымашыш шешкыже ден изирак эргыже ушненыт. Шоҥгыеҥ куанымыж дене кушташ ямде лийын.

Тыгак кова-коча-влакын йодмышт почеш «Йомакысе десант» пошкудо ялыште илыше уныкаштым саламлаш миен коштын. Ты ялыште нуно вучымо уна лийыныт. Нуным пайрем сий дене сийленыт. Йомакласе персонаж-влак чылаштлан тазалыкым, пиалым, сеҥымашым тыланеныт.

Ты кечын Валерий Ахметзянов, Зинаида Усманова, Галина Михайлова, Тамара Султангалиева, Ильмар Халиуллин, Регина Ахмадиева шӱм-чон шокшыштым, весела кумылыштым калыклан пӧлекленыт. Нунылан ялысе калык лӱм дене тауштем. Тыгак тысе амалкалче ден «Марий ушем» мер ушемын еҥже-влаклан пайремым эртараш полшымыштлан вуйым савена.

А теве Евгений ден Константин Мусинмыт суртышт воктене тугай чапле агытаным ыштен шогалтеныт! Нунылан ялысе калык изи пӧлек дене тауштен. Кажне ялыште тыгай поро чонан да чолга еҥ-влак лийыт гын, ю шӱлышлан ӱшан лектеш.

 

Елена

Ирдуганова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: