"Ӱшанем... Вучем..." рубрик, 2017 ий, Шорыкйол тылзын 13-шо кечыже

Омеш конча

Статьян авторжо Татьяна Айтова

Cалам лийже, «Ӱшанем… Вучем…» лаштыкым лудшо-влак. Газетыш серышым возаш омо таратыш. Чылажымат рат дене ойлем. Пытартыш жапыште эре ик сынан омым ужам. Изи годсек йºратен коштмо рвезе конча.

Ме ик ялыште кушкынна, ик школышто тунемынна, пырля модынна. А икана тудо мылам йºратымыж нерген ойлен. Мый шомакшым тӱрыснек умыленат шуктен омыл,  воштылынам гына. Жап эртымек, мыят тудым йºратен шынденам. Тольык шке шижмашем нерген иктыланат ойлен омыл. Вожылынам. А тудо эре пелен лийын. Рвезе, тӱрлº амалым муын, кидем гыч кучен, ӱпем ниялтен, модмо кокла гыч ºндалаш  тºчен. Кызытат тиде жапым шарналтен шыргыжалам. Икте-весынам шыпак йºратен коштынна. Вара Коля ºрдыж велыш тунемаш кайыш. Вич ий жапыште моткоч шуэн вашлийынна. А чонем тудын верч йӱлен коштын, кажне вашлиймашнам кызытат шарнем. Йºратымашем нерген ик ганат ойлен омыл гынат, Коля чыла шижын да умылен, шонем.

Ик кеҥеж каникул годым тудо воктекем йыштак толын шогале да вачышкем кидшым пыштыш. «Салам. Эре сылнештат. Изи падыраш гыч теве могай ӱдырыш кушкын шуыч. Кºн пиалеш пеледат гын?» — мане. А мый мом вашешташат ºрым…

Тылеч вара иктаж вич ий наре ышна уж. Коля кугу олаште пашам ышташ кодо. Ача-аваж деке толын коштын але уке — омат пале. Мыят олаш илаш куснышым. Институт, паша…

Икымше гана омешем март кыдалне кончыш. Ваштарешем, кидым шарен, йолгорно дене шыргыж толеш. Ала-молан моткоч куаныше помыжалтым. Чонемлан тугай куштылго лие! А вара трук шарналтышым: таче тудын шочмо кечыже. Окна ваштареш шогальым, кидем кече ваштареш шуэн шыргыжальым. Шочмо кечет дене, йºратымем манын, шыпак пелештышым.

Ялыште отпускышто улмем годым кокымшо гана омым ужым. Пуйто ӱмбакем йыштак ончале да ала-мом пелештыш. Почешыже кычкырлен  куржым — огеш савырне. Ты кечын Колям чынжымак ужым. Ялыш толын улмаш. Машина дене эртен кудалмыж годым кидым рӱзалтыш, салам мане. Воктеныже самырык ӱдыр койылалтыш. Ала келшыме ӱдыржº ала пелашыже. Такшым ӱдырым налмыж нерген шоктен огыл ыле да. Кумылем волыш…

Теве шукерте огыл кумшо гана омеш ужым. Чапле вургемым чиен, пеледыш аршашым кучен. Лишеммекыже, пеледыш кидешыжак лывыжгыш. Тудо мыйым шыргыж онча, но ала-молан чонлан неле. Лӱдын помыжалтым. Воктенем пелашем шыпак мала. Тудлан омо нерген ойлен омыл. Ынде ятыр ий пырля улына. Сергей моткоч сай, тыматле пºръеҥ.

Ончычсо йºратымаш молан кызытат омеш конча, нигузе умылен ом керт. Чонем, вуем пудыратылеш.

Олеся.

Йошкар-Ола.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: