"Чон-кумыл паша" рубрик, 2017 ий, Шорыкйол тылзын 13-шо кечыже

Тӱрлымӧ олалашке миен толаш шона

Статьян авторжо Ирина Ямбаршева

Анастасия Степанова — Морко ӱдыр. Изинек кидпашалан шӱмаҥ кушкын. Тӱҥалтыш класслаште тунеммыж годым чиян картон гыч тӱрлӧ аппликацийым ыштылаш йӧратен, вара нуным картине олмеш пырдыжыш вераҥдылын. Настян творчествыже моло дечын ойыртемалтше, шкешотан лийын. Тудо эре ала-мом уым шонен муын, да мотор арвер-влак пӧрт пырдыжлаште шке верыштым муыныт.
Ӱдыр тӱрлаш шуко жапым ойыра. Кугурак класслаште тунеммыж годым технологий урокышто тӱрлаш туныктеныт, Настя ты урокым поснак йӧратен. Школышто гладь, тыгак ырес дене тӱрленыт. Кызытат мӧҥгыштыжӧ школышто тӱрлымӧ солык-влак аралалтыт.
Настя степановаШкол деч вара Йошкар-Оласе технологический колледжыш коммерсантлан тунемаш пурен. Каныш годым олаште илыше Таня акаже деке унала коштын, тудыжо ырес дене тӱрлен. Тудым ончен, Настя ыресла тӱрлаш йӧратен шынден, акажын тӱржӧ-влак моткоч мотор, чоным савырыше лийыныт, ӱдырымат тиде сомыл шке векыже шупшылын. Тыге акаж дене пырля изирак тӱр-влакым тӱрлаш тӱҥалын. Ӱдырлан утларакше изи янлык, кайык-влакым тӱрлаш келшен. Тӱрым рамкыш моторын келыштарен, йолташ-влаклан шуко пӧлеклен.
Кызыт тудо Ямало-Ненецкий автономный округысо Приуральский районышто ила да пашам ышта. Шокшо игече тушто шагалрак лиеш, сандене жапым ӱдыр мӧҥгыштӧ эртара. Кидпаша деч посна ок шинче, парняже-влак эреак модыт. Ик эн кугу пашажым Таня акажлан тауштен пӧлеклен, тудлан кӧра Настя тиде пашам йӧратен шынден. Тигр ден кум имньым тӱрлен, рамкыш моторын сӧрастарен. Тиддеч вара ӱдыр ола-влакым тӱрлаш тӱҥалын. Тудынат шке историйже уло. Интернетыште тӱрлӧ элын рӱдӧ олалаштым коллажыште оформитлымым ужын, ӱдырын чонжым тыгай сӱрет сымыстарен. Иктаж гана тушко миен толаш шонен. Шонымашыже шукталтше манын, тӱрлымаш гоч шканже цельым шынден — могай олам тӱрла, тушко миен толеш.
KyX7nAYSZDUТыге Моском, Нью-Йорк, Рим, Париж, Лондон олаласе полатлам тӱрлен. Тидлан рамкым Чебоксар оласе «Мир рамок» кевытыште заказатлен, кызыт нине картине-влак пырдыжыште кечат. Жапым ончыкташ гын, ик олам тӱрлаш тылзе кая, паша деч вара, кажне кечынжак огыл гынат, ик тылзе жапыште тыгай шедевр шочеш. Ӱдырын мастар, пашалан кожмак улмыжо вигак шижалтеш.
rpujnhnKLXgТӱрлымӧ ола-влак кокла гыч кызытеш Настя Москош миен толын, ик шонымашыже шукталтын. Моском тӱрлымӧ картине воктек тушеч кондымо сувенирым сакалтен, тыге кажне вере миен толмек ышташ шона. Тудын ойлымыж почеш, тӱрлымӧ ола-влак шочыныт гын, тушко миен толаш кумыл утларак волгыдо да вучымо.
Ырес дене тӱрлымӧ картине-влак куштылгын огыт шоч, тидлан эн ончыч йӧратымаш кӱлеш докан. Пӱсӧ шинча да тӱрлымӧ техникым умылымаш. Адакшым мом тӱрлашат палыман, тӱҥжӧ — кумылым нӧлтыжӧ, шинчам куандарыже. Настян пашаже-влак чылт тыгай улыт, тӱржӧ картине деч нимыняр ок ойыртемалт.
Картине-влакым тӱрлаш «Мир вышивки» сайтыште набор дене заказатла. Наборышто картиным тӱрлаш чыла толеш, кевытлаште посна шӱртым, материалым кычалман огыл, тидыже пеш йӧнан. Шукерте огыл Настя эше ик чапле, мотор пашажым тӱрлен пытарен. Ачаж ден аважлан бисер дене Петр ден Февронийын юмоҥаштым тӱрлен. Святой Петр ден Феврония ешым, мужырым аралыше улыт. Нунылан ятырын кумалыт.
Умбакыжат Настян эше чапле деч чапле, мотор деч мотор, кумылым савырыше пашаже-влак шочыт манын, ӱшанена. Ӱдыр кидпашалан жапым ок чамане.
Елена Годунова.
Еш альбом гыч налме фото-влак.

Qo_xgqwvxnA

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: