"Улам мый Рве-зы-лык!" рубрик, 2017 ий, Шорыкйол тылзын 27-ше кечыже

Усталык шӱлышан гид-экскурсовод

Статьян авторжо Анастасия Эманова

Самырык еҥлан тӱрлӧ нелылыкым сеҥен, эре ончыко кайыман, шонымашке, сеҥымашке шуаш тыршыман. Тыге ойла чолга ӱдыр Наталия Дудина.

M-wkaN0LXLcНаталия – Шернур район Купсола ялын шочшыжо. Тиде изи ял шагал огыл уста еҥым «шочыктен». Кумдан палыме киноартист да поэт Йыван Кырла тӱнялан марий «купан ял» нерген палдарен. Тыште южшак творчествылан кумылаҥдыше, очыни. «Олаште илем, но шочмо ялышкем кажне каныш кечын вашкем. Арам огыл ойлат: «Шочмо велыште вӱдшат шӱмым эмла». Купсола ялысе памаш вӱдым тамлен, уремыште ошкыл кайыме, поро пошкудо-влак дене саламлалтме годым кумыл нӧлталтеш, кап куштылемеш. Чон шижмашем почеламут гоч почам. Икымше почеламут корнылам Марисола школышто тунемме годым возенам. Чолга тунемше лияш тыршенам. Спортын тӱрлӧ видше дене таҥлалтынам. Мураш йӧратенам. Тӱрлӧ таҥасымаште, конкурсышто, фестивальыште мастарлыкем ончыктенам. Сеҥыше радамышке ик гана веле огыл лектынам. Тӱрлӧ еҥ дене вашлийме деч вара ик жап журналист лияш ямдылалтынам, но пӱрен огыл.

Изам уло. Ешыштына ача-ава мемнан ӱмбаке иканат йӱкым кугемден огытыл. Нуно мемнам умылаш тыршат. Йоҥылышым ыштена гынат, огыт вурсо, вет кажне йоҥылыш молан-гынат туныкта», - ойла Наталия.

Н.Дудина 2010 ийыште МарГУ-со Финноугроведений институтыш (кызыт Калык культур да тӱвыра кокласе кыл институт) филологлан тунемаш пурен. Икымше курсыштак университетын культур илышыштыже участвоватлаш тӱҥалын. «Голос юности» фестивальыште мурен. «Эльвира Курай тӱрлӧ мероприятийыште мураш коштыктен. Вара Татьяна Денисова дене палыме лийынам, тудо мыйым шке студийышкыже ӱжын. Татьяна Яковлевна шукылан туныктен, мурызо семын кушкаш полшышо каҥаш-влакым пуэн. Кугу тау тудлан. Поэтессе Зоя Дудинан вӱдымӧ литератур семинарлаш коштынам, мутым чын кучылташ тунемынам. Почеламутем-влак тӱрлӧ темылан возымо улыт, нуно икмыняр сборникыште савыкталтыныт.

Нылымше курсышто тунемме годым МарГУ-со «Мурсем» ансамбльым вуйлатыше Родион Алексеев Медведево районысо Нужъял тӱвыра рӱдерыш художественный вуйлатышылан пашаш ӱжын. Тыге тунемме деч посна тӱрлӧ мероприятийлан сценарий-влакым, шуко информационный отчетым возенам. Шкем могай организатор улмем тергенам. Кажне арнян манме гаяк сценыш лектынам. А университетым тунем пытарымеке, илыш корно «Чарла кремль» рӱдерыш пашаш конден. Кызыт мый кугурак научный сотрудник улам. Пырля пашам ыштыше специалист-влак дене ола мучко обзорный, пешеходный экскурсий-влакым, мастер-класс-влакым, тӱрлӧ мероприятийым эртарена. Пашам йӧратен ыштем. Кодшо тылзын Озаҥ олаште «Золотая сотка» пайрем-влакым вӱдышӧ да эртарыше-влакын тӱнямбал клубыштын президентше шкешотан мастер-классым эртарен. Тушко миен коштынам. А шукерте огыл гид-экскурсовод удостоверенийым налмеке, аккредитацийым эртенам», - каласыш ӱдыр.

Наташа яра жапыштыже книгам лудаш йӧрата, пытартыш жапыште йотэлласе писатель-влакын творчествышт сымыстарен. «Жапым муын, мурым возаш шонем. Икымше мурем «Луй модмо вер» (мутшо – Зоя Дудинан, семже – Вениамин Семеновын) кызытсе жаплан келшен толеш. Но тудым изиш тӧрлатыман. Ӱшанем: тений у муро-влак шочыт», — палдарыш Н.Дудина.

Чолга ӱдыр кызытсе самырык тукымым мокта. Тудын шонымаште ӱдыр-рвезе-влак саман дене тӧр ошкылыт, мобильный да виян улыт. «Информационный технологийлан кӧра чылажат писын вияҥеш. Шуко самырык еҥ ямдым вучен огыт шинче, а чыла шке вийже дене ышта. Шкеныштым культурно вияҥдаш огыт мондо, тоштерлаш, театрлаш коштыт. Но икте тургыжланадара: шукын тӱрлӧ нелылыклан йӱштӧ шӱм-чонан лияш тӱҥалыныт. Илышлан куанен моштыман, поро кумылым ончыкташ мондыман огыл, шонем», — манеш Наталия.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: