"Кугарнягудо" рубрик, 2017 ий, Шорыкйол тылзын 10-шо кечыже

У ий – юзо пайрем

Статьян авторжо Ирина Ямбаршева

У ий – ик эн вучымо да йӧратыме пайрем. Тудо чонышто ала-могай умылтарен мошташ лийдыме куан тулым чӱкта, йомак шӱлышым пурта, сай ончыкылыклан ӱшаным пуа. А изи годым У ийым поснак чон вургыж вучет, эсогыл юж вес семын шижалтеш. Пӧлекым наледыме, маскарад вургемым ямдылыме татшак мом шога.

%d0%b0%d0%b2%d0%b3%d1%83%d1%81%d1%82%d0%b0-%d1%80%d0%be%d0%bc%d0%b0%d0%bd%d0%be%d0%b2%d0%b01Августа РОМАНОВА, диктор, артистке:
- Йоча годым ёлкылаште шукыж годым Лумпырче лийынам. Авам марле гыч тувыр гайым (тунам вет налаш пешыже лийын огыл) урга, крахмалыште кучена (формым пуаш), вара тӱрлын сылнештарена ыле. А вуйлан короным картон гыч ыштенна. Мамыкым клеитлет, вара тудым пудыргышо янда модыш дене сӧрастарет. Тушто творческий шӱлыш озаланен. Кызытсе тукым тидым огеш умыло! Тений оксат гына лийже — чыла кевытыште налат.
Мый иктаж 3-4-ше класслаште тунемам. Кастене школышто кугурак класслаште тунемше-влаклан бал-маскарад лиеш. Изи-шамычым огыт пурто. А пешак кайыме шуэш! Мом ышташ? Нина акам шукертак кужу ӱпшым пӱчкын. А шке ӱпем кӱчык. Кугун кояш манын, саде ӱппунеметым шке ӱпышкем шуен кылдышым, мотор шовычым пидым да йолташ ӱдырем дене школыш кайышна. Омса воктене дежурный-шамыч шогат. Кугуракын кояш манын, парня вуйыш шогална… Кеч-мо гынат, кӧргыш пуренна! Пеш куаненна! Коштына тыге да трук колам: «Кӧн ӱпшӧ?» Ой, мыйыныс! Пошкудо класс гыч рвезе шупшылын, хи-хи шога, шкеже мыйын могырыш онча. Вожылмашыш пуртыш! Ну ничево, мыят ӱчым шуктышым! Уремыште лум пешак шуко ыле, чот пунчалтарен нална! Алят шарна!
2016 ий удажак лийын огыл. Кризис манметым шижын омыл (тушеч лекмыжат огыл ала мо). Йомдараш нимом ыле. Эн тӱҥжӧ — чыла лишыл еҥем-влак таза улыт! Чонышто ласкалык лийын. Тургыжланымаш сценыш лекме деч ончыч веле ыле. Мый «Шым гана висе…» концерт-влак нерген ойлем. Тыгак лийшаш, шӱм вургыжмо деч посна сценышкат, микрофон ончыкат шинчаш язык! Мый тыге шонем.
2017 ий — Агытанын идалыкше. Агытан эр кынелеш. Калыкмутышто ойлалтеш: «Эр кынелшылан окса лектеш». Оксам погашыже вий-куат, тазалык гына лийышт! Эн тӱҥжӧ — агытанла чӱҥгедылаш огыл!
Йӧратыме «Кугарня» газетым лудшо-влаклан тыланымашем тыгай лиеш: чыла тендан кидыште, тендан ыштышаш пашам нигӧ толын огеш ыште. Чулым еҥын агытанжат писе. Таза лийза!

%d0%b1%d0%b0%d0%ba%d1%83%d1%82%d0%be%d0%b20Олег БАКУТОВ, мурызо:
- Изи годым, очыни, кажне йоча У ийым эн чот вуча. Школышто ёлко пайремыште шукыж годым Пират лийынам. Йӱштӧ кугызан толмыжым изин-кугун вученам, кидше гыч кампетке мешакым налаш кугу куан лийын. Ешыште куд икшыве кушкынна, мый эн кугу улам. Ачана лесниклан пашам ыштен. У ийлан эре куд пӧлекым конда ыле. Тидыже куан гын куан лийын. Тетла йочалан нимо кӱлын огыл.

%d0%bd%d0%b0%d0%b4%d0%b8%d0%bdНАДИН, мурызо:
- Изи годым ёлко пайремыште могай гына персонаж лийын омыл: Лумпырче, Снежная Королева. Но Мальвина лиймем поснак ушеш кодын. Ондак вет нимогай костюмым кевытыште ужален огытыл, чыла шке ургыман ыле. Авамын ургымо костюм тугай моторын чучын! Школ ныл меҥге тораште пошкудо ялыште лийын. Кочай мемнам кажне ийын имне дене наҥгая ыле.
Йӱштӧ кугызалан шке йочам-влак кызыт кузе ӱшанат, тыге нигунам ӱшанен омыл. Эре паленам: Йӱштӧ кугыза — костюмым чийыше туныктышо. Клубышто бал-маскарадыште ачам Йӱштӧ кугыза лиеш ыле, тудо клуб вуйлатышылан пашам ыштен. Кызытсе йоча-влак семын серышым возен да иктаж-мом йодын огынал. Кампеткым пуымыжланат моткоч пиалан лийынна.
У ий — юзо пайрем. Тыгай шижмаш лач йоча жапыште лийын. Ме, пелашем Олег Славин дене, Йӱштӧ кугыза ден Лумӱдыр лийын, йоча-влакым саламлаш коштына. Йоча-влакын куаныштым ужын, шкеат йывыртет.

%d0%b3%d0%b5%d0%bd%d0%b011Геннадий ГРИГОРЬЕВ, бард:
- Тӱҥалтыш класслаште тунемме годым Рывыж лийынам. Варажым военный форман костюмым ыштенам. Луымшо классыште плакат да пырдыжгазет-влаклан ответственный лийынам.
2016 ийыште Яльчик ерыште эртыше ЭКОКУЛЬТУРНЫЙ ФОРУМ ушеш кодеш. 2017 ийыште сайым да эше оҥайым вучем да чыла лудшо-влаклан сайым гына тыланем. Чолга лийза, тунам чыла паша воранен кая.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: