"Рубрик деч посна", 2017 ий, Шорыкйол тылзын 27-ше кечыже

Шинча чер авалтен гынат, куанен моштат

Статьян авторжо Эльвира Терентьева

юлия устюгМарий Турек ден Параньга районлаште илыше сокыр-влакын организацийыштым иктыш ушымо. Тудым Марий Турек посёлкышто илыше медицине образованиян чолга марий ӱдырамаш Нина Валентиновна Айшаева вуйлата. Тудо ты пашалан моткочак шӱмаҥын. Икмыняр ий ончыч туддене туткар лийын каен, пуреҥгаен да шинчаже эмганен. Инвалидностьым пуэныт, сандене ончычсо пашаж гыч каяш логалын да Сокыр-влакын обществышкышт эҥертен. Тушто кумылан еҥ-влакым вашлиймеке, паша веран лийын. Ынде Нина Валентиновна йодын толшо-влаклан шкеже 12 ий полшен шога. А вуйлатыме организацийыштыже шинча дене орланыше еҥ – 130 инвалид.

Н.В.Айшаева дене Россий ВОС-ын республикысе организацийжын ноябрьыште эртарыме КВН-ыштыже палыме лийым. Тунам вуйлатыше шкенжын ик чолга членже – Юлия Устюгова (снимкыште) — нерген каласкалыш. Устюговмыт еш Ӱлыл Турек ялыште ила. Ты марий ӱдырын тукымжылан сар кочо кышам коден: кочаже Кугу Отечественный сарыште сокыр лийын. Тидыже шочшо ден уныкаже-влакым ойгандара. Но тыглай ойгандара веле огыл…

 Устюгован

Ӱлыл Турек ялыште илыше Юлия Аркадьевнам Марий Турек районышто шукын палат. Тудо райрӱдысӧ больницыште массажистлан ынде индешымше ий пашам ышта. Еҥ-влак туддеке кумылын коштыт. Кидше пеҥгыде, да тӱрлӧ точкым темдыме (точечный) массажым сайын ышта. Массажистлан Кисловодскышто тунемын. Тушко каяш ВОС-ын Марий Элысе пӧлкаже полшен. Теве райбольницын тӱҥ врачше В.В.Свинин, Юлия дене кугешнен, “Молодец тиде ӱдыр” манеш ыле.

пашаже устюг

Устюговмыт моткоч пашаче да тыршыше улыт. Вольыкым шуко ончат: казам, кӱркам, чывым… Озавате Зоя Алексеевнан палемдымыж почеш, ик кӱркашт 19 килограммыш шуын. Юлия Аркадьевна ойгырен огеш шинче. Яра жапыште сымыктыш тӱняште ила: бисер да шӱртӧ дене тӱрла. Моткоч сылнын тидым шукта. Ты ешын пакчажымат ончен куанет! Нуно могай гына пеледышым огыт шынде! Кузе гына сурт-печыштым огыт сӧрастаре! Теве ик сорт киярым шындымеке, ик вондо гыч 400 наре киярым налыныт…

“Ме, Марий Турек кундемыште илыше шинча черан еҥ-влак, келшен илена. Ала ойго мемнам иктыш ыштымылан але шкеак весела улмылан. Икте-весым палена да полшена. Теве шукерте огыл районысо организацийналан 65 ий темме пайремым пырля палемдышна, выставкым эртарышна. Инвалид-влакын пашаштым ончен куанет”, — каласыш Нина Валентиновна.

Эльвира Терентьева.

ТӰРЫСНЕК МАТЕРИАЛЫМ «КУГАРНЯ» газетын 27 январьысе номерыштыже лудса.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: