"Сылнылык тӱня" рубрик, 2017 ий, Шорыкйол тылзын 23-шо кечыже

“Шуматкече” тачат калык дене пырля

Статьян авторжо Татьяна Иванова

14 январьыште Марий Самырык театрын сценыштыже Морко кундем гыч «Шуматкече» ансамбль моткоч чапле концертым ончыктыш. Калык шыҥ-шыҥ ыле. Веран-верыште шинчен кертдымыже-влак кушташ лектыныт.

Ты коллектив калык чоным 27 ий утла куандара, тачат лӱмжым кӱшнӧ куча да тӱрлӧ верыш концерт дене лектын коштеш, мер илышыштат шуко сомылым виктараш полша. Ты гана нуным Йошкар-Олашке Морко землячестве ӱжын. Концертым ончаш толшо-влак Морко районысо Кесемлак черкым чоҥаш оксам пуэныт. Тыгак организатор-влак землячествым вуйлаташ у еҥым шогалтыме нерген сцене гыч увертареныт. Тымарте тудым Марий Эл Кугыжаныш Погын председательын алмаштышыже, мер пашаеҥ Анатолий Иванов шуктен гын, тудо шке сапшым Марий Элысе тӱвыра, печать да национальность паша шотышто министрын экономике йодыш дене алмаштышыже Александр Ивановлан виктараш ӱшанен, тидымак вуйвер пеҥгыдемден.

Концерт вӱдшор гай гӱжлыш. Тӱҥ состав дене пырля у лӱм-влак йоҥгышт. Ты гана у солист Руслан Никифоров да ондакысе мурызышт Надежда Алексеева (Богданова) усталыкыштым ончыктышт. Когыньышт дечат интервьюм нальым.

Руслан Никифоров Ердӱр ялыште шочын. Коркатово кыдалаш школым тунем лекмеке, Йошкар-Олашке тувыра да сымыктыш колледжыш тунемаш пурен. Калык семӱзгар пӧлкаште шинчымашым погымыж годым армийыш налыныт. Но угыч тунемаш каен огыл. Кызыт 24 ияш рвезе тӱрлӧ пашашке коштеш, а шӱм-чонжым луштараш муро-влак полшат. Гармонь, гитар дене шкеак тӱрлӧ семым луктеш, кызыт репертуарыштыже шке возымо почеламутшылан куд муро уло. «Ешыште вич йоча улына, мый — «мешак пундашыже», — шыргыжалын ойла рвезе. Ондак ачаже ош тӱня дене чеверласен, армийыште улмыж годым аважым йомдарен. Руслан ача-ава суртым куча. Мӧҥгыштыжӧ шкет ила. Телым пуым ямдыла, икманаш, чыла сомыллан вуйын шога. Ӧрдыжтӧ илыше кум изаже да ик акаже унала толын коштыт. «Мемнан ялыште пӱртӱс моткоч сылне. Ер, курык, чодыра — чылажат кумылемым кӱш нӧлтат, садлан мураш таратат, ял гыч кайыме ок шу», — ойлыш мылам. шум

Руслан ондак Коркатово клуб пеленысе «Куан памаш» ансамбльыш коштын, вара тудым «Шуматкече» шкеж деке ӱжын. Ончыкылык вий семын тудым куштат. Концерт кечынат рвезе залым иканаште авалтыш, чылалан вигак келшен шинче. «Коллектив дене весела, репетицийыш толам, тӱшкаште вийым шижам. Кузе шкет илаш йӧсӧ, мурашат шкетлан куштылго огыл, шонем», — каласыш Никифоров.

Русланлан муро аланыште шкенжым сай мурызо семын ончыкташ да усталык курыкышко кӱзаш тыланена. Марий эстрадыште, поснак вокал да семӱзгар ансамбльыште, тыгай рвезе моткочак кӱлеш.

Шке жапыштыже Надежда Алексеева (Богданова) ты ансамбльыште солистке Елена Гурьяновам алмаштен ыле. Вара тудат марлан лектын, кызыт Чебоксарыште ешыж дене ила. Кугу концерт годым ӱжыт гын, кумылын мураш толеш. “Кумшо классыште тунеммем годым ансамбльыште мураш тӱҥалынам, пырля шуко вере выступатленам. Коркатово школым тунем пытарымеке, Палантай лӱмеш тӱвыра да сымыктыш колледжыш эстраде пӧлкаш тунемаш пуренам. Дипломым налмек, Йошкар Эҥер ялыш, мӧҥгӧ велыш толынам да Коркатово клубышто методист лийынам”, — ойла Надежда. Тачысе илышыже тӱвыра дене ок кылдалт, тудо ужалыме пашашке куснен, кызыт икшыве дене шинча. “Шуматкече” ансамбль шкешотан ешыж гай, ты гана пырля лиймыж годым эртыше жап ушыштыжо угыч пӧрдын. Яндар йӱкшӧ дене концерт программым сӧрастарен, тудлан такшым сценыште пашам ыштыман.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: