"Кузе илет, ялем?" рубрик, 2017 ий, Шорыкйол тылзын 10-шо кечыже

Юасе йомак

Статьян авторжо Ирина Ямбаршева

Свердловск область Красноуфимск районышто илыше-влак лум гыч тӱрлӧ фигуркым да йомак олам эре уло кумылын ыштат. Тыге У ий пайрем кумыл вигак шижалтеш. Районысо комиссий яллашке да селалашке лектын коштеш, эн сайжым палемда.
image-4Юа селаште илыше еҥ-влак эн сай лум скульптурым ыштымаште эре участвоватлат. Ятыр сурт воктене лум курык-влакым ужаш лиеш. Тушеч йоча-влак ледянке дене юарлен мунчалтат. Тыгак лум гыч ыштыме йомак герой ден янлык-влак, моторын сӧрастарыме У ий кож-влак шогат.
Юа селан тӱҥ, Октябрьский, уремже дене кайыме годым корно воктене шогышо, тӱрлӧ тӱсан лум фигуро-влакым ончен куанет. Йӱштӧ кугыза ден Лумӱдыр, кит, пырыс, черепахе, маска, ужава, осьминог, коча ден кова, агытан ден чыве – авторын шонен луктын моштымыжлан да мастар кидшылан кӧранаш гына кодеш.
Шоналташат от тошт, но чыла 16 фигурым Ксения Изгагина, аваже Галина Алексеевна, ачаже Владимир Григорьевич да пошкудыжо Ольга Кошманакова ик касыште ыштеныт. Вара пульверизатор гыч вӱд дене варыме чиям шыжыктен сылнештареныт.
image-7Ӱмаште У ий йомакым Ксения шке суртшо воктене ыштен: иле кож, Йӱштӧ кугыза ден Лумӱдыр шогеныт. А тений мастар ӱдыр шке паша верысе, «Виват» кевыт турасе, кудывечым сӧрастараш шонен пыштен. «Мый моторлыкым шканем веле огыл, весе-влакланат ышташ йӧратем. Еҥ-шамычлан мыйын пашам келша, нуно шыргыжыт гын – мыйынат кумылем нӧлталтеш», — ойла Ксения.
Чынжымак, тыгай йомак олам ужмеке, кузе от куане! Эше ӱдыр шӧртньӧ колым да лум печым ышташ шона. Сурт воктенысе кумдыкат ӱдырын кидше логалмым вуча.
Ме, Юаште илыше-влак, ӱшанена: сылне да паша кумылан ӱдырын чыла шонымашыже шукталтеш. А тудын У ий йомакше селасе калыкым да тышке унала толшо-влакым куандараш тӱҥалеш.

Юлия ШАРАПОВА.
Свердловск кундем.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: