"Кузе илет, ялем?" рубрик, 2017 ий, Шорыкйол тылзын 13-шо кечыже

Юзо лум капка, агытан да молат …

Статьян авторжо Татьяна Айтова

bWV9TC0L-g8Пошкырт кундем Калтаса район Павасола ялысе ик сурт кундемым кажне У ий вашеш юзо шӱлыш авалта. Гараевмыт лум гыч тӱрлӧ оҥай фигур-влакым ыштылыт, ялысе калыкым куандарат. Тидын нерген Олеся Айдонова каласкалыш.

Олеся Чорай ялыш шукерте огыл марлан каен. Шочмо суртыш чӱчкыдын унала коштеш. Олесян ачаж ден аваже вич икшывым ончен куштеныт.

- 2010 ийыште Алексей изам лум курыкым ышташ темлыш, — ойла ӱдыр. — Тыгай шонымаш уло ешлан келшыш. Пашалан рӱжге пижна. Тыге кок ий почела курыкым ыштышна. 2012 ийыште лум гыч йомакысе тӱрлӧ персонаж-влакым чумыраш шонымаш вуйышкем тольо. Нуным шкак коллер да гуашь дене чиялтем. Ялысе калык кажне ийын таум ышта, шукын курыкыш мунчалташ толыт, фигур-влак пелен войзалтыт. Теве тений курык пелен Йӱштӧ кугызам, Лумӱдырым, мужыр лумъеҥым, маймылым, агытаным келыштаренна. Курыкыш пураш ий гыч капкам ыштенна.

Теве тыге уста еш яллан У ий шӱлышым пурта.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: