"Ӱшанем... Вучем..." рубрик, 2017 ий, Шорыкйол тылзын 13-шо кечыже

Ял але ола?

Статьян авторжо Татьяна Айтова

Поро кече лийже, «Кугарня» газетым лудшо йолташ-влак. Чоным тургыжландарыше шонымаш-влакым каласен пуынем.

Ирина дене студент жапыште палыме лийна. Оласе ӱдырлан ялысе рвезе келшен кертеш манын, пешыжак ӱшанен омыл. Тудо лыве гай шыма, сылне, а мый кожласе маска гай. Туге гынат поро чонем дене Иринан кумылжым савырен кертым. Шукат ыш лий, ӱдырем мӱшкыраҥе, сӱаным ыштышна. Пелашемын ача-аваже ялысе веҥылан  утыжым  ышт куане гынат, чаракым ышт ыште. Нуно мыланна посна пачерым пӧлеклышт. Икманаш, ракатланен веле иле, чыла йӧн уло, но…

Ик ий наре олаште илымек, уэш ялыш пӧртылмӧ шуо. Туге шыгыр чучын, кӱ пырдыж-влак пуйто вуем гычак темденыт. Тыге кеҥеж каникуллан ялыш илаш каяш темлышым. Пелашем ик жап торешланыш, вара келшыш. Ача ден ава гына тидлан пешыжак ышт куане. «Пычкемыш ялыштет ӱдырна ден уныкана мом ыштат? Пашам кушто ышташ тӱҥалат? Ешым кузе пукшаш шонет?» манын вурсышт. Мый, чыла чытен, садыгак шке шонымаш деч шым кораҥ. Тыге пелашем ача-авамын суртыш конден пуртышым.

Авам ден Ирина икте-весылан полшен, умылен илаш тӱҥальыч. Чыла шке верышкыже шичме гай чучо. Пашаш пурышым. Тольык пытартыш жапыште пелашем шӱлыкаҥаш тӱҥале. Шижам, тудлан жапым шагал ойырем. Южгунам поро шомакым пелешташ ушем, тептерем огеш сите. Эре паша дене аҥыргылам. Окса шукырак лийже, ешем улан илыже манын шонем. Но тыгодым лишыл еҥем-влаклан йӧратымашем огеш сите. Кече мучко нунын йыр пӧрдам гын, пашалан жап огеш код. А пелашем оласе илышлан тунемше. Тудо театрыш, тоштерыш кошташ йӧрата. Ик верыште шинчаш тудлан моткоч йӧсӧ дыр. Чыла умылем, шижам, а кузе лияш ом пале. Мый олаште илен ом керт, тудлан ялыште  йокрок. Икте-весе деч поснат илаш огеш лий. Олаш чӱчкыдын лектын кошташ йӧн уке. Мом ышташ?

Михаил.

Кужэҥер район.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: