"Улам мый Рве-зы-лык!" рубрик, 2017 ий, Шорыкйол тылзын 13-шо кечыже

 Морко шӱшпык Мария

Статьян авторжо Анастасия Эманова

Морко район ӱдыр Мария Дементьева сайын тунемеш, тӱрлӧ олимпиадыште участвоватла, ансамбльыште мура да почеламутым возкала.

дементьеваӰдыр Октябрьский поселкышто шочын. Кокласола лицейыште биологий да химий направлений дене 9-ше «А» классыште тунемеш. Врач лияш шона. Биологий да химий дене шуко литературым лудеш. «Кажне тылзын Медведево район Руэм поселкысо шуко профилян лицей-интернатыш шкешотан сессийыш коштам. Тушто талантан йоча-влак дене пашам ыштыше рӱдер уло. Тушто кажне тылзын кок кече МарГУ-н туныктышыжо-влак йоча-влакым химий дене олимпиадылан ямдылат.

Кокласола лицейыште кажне кечын кандаш шагат кас марте тунем шинчем. Химийым туныктышо Раисия Александровна Новикова олимпиадылан, экзаменлан ямдылалташ полша. Ушан, шке пашажым йӧратыше туныктышо врач лияш кумылаҥденак шога. Пырля тыршен, мый ӱмаште самырык химик-влакын «День Моля» республикысе конкурсыштышт икымше верым налынам. Тылеч посна ты предмет дене районышто призер кок гана лийынам. Кызыт туныктышем дене шымлыме пашам возена да 1 да 2 февральыште МарГУ-што эртышаш Всероссийский олимпиадын регионысо этапшылан ямдылалтына. Раисия Александровналан полшен шогымыжлан кугу таум ойлыде ом керт», - каласыш М. Дементьева.

Маша чыла предмет денат кыртмен тунемеш. 7-ше классыште тунеммыж годым руш йылме, руш литератур, математике, физике, биологий дене олимпиадылаште районышто призовой верым налын. 8-ше классыште химий дене районысо олимпиадыште призер лийын, а биологий дене икымше верым налын. 9-ше классыште химий, экологий, руш литератур дене сай шинчымашым ончыктен.

Ӱдыр сылнымутлан шӱман. Изирак класслаште тунеммыж годым тӱрлӧ лудмаш конкурсышто чӱчкыдын участвоватлен. Калык ончылно шке возымо почеламутшымат лудын. «Кызыт стих-влакым шуэнрак возем. Почеламутлаштем утларакшым пӱртӱсым моктен мурем, тыгак ача-авамлан ятыр пашам пӧлекленам. Ончыкшым мурымат возаш шонымаш уло. Мый гитарым шоктен моштем. Гитар сем почеш марлат, рушлат мураш йӧратем. Ансамбльыш коштам. Ныл ӱдыр: мый, Екатерина Кошкина, Алена Мельникова да  Ольга Григорьева – марий муро-влакым мурена, утларакшым Валерий Петровын репертуарже гыч. Лицейыштына, Кокласола клубышто, Моркышто тӱрлӧ мероприятийыште мастарлыкнам ончыктена», — ойла марий ӱдыр.

М.Дементьева тӱрлӧ аланыште шкенжым терга. 2012 ийыште йолташыже Алиса Акпаева дене «Вожатенок» районысо конкурсышто икымше лийын. Маша ончыкылык вожатый-влакын «От Винта!» республикысе конкурсышто шуко номинацийыште призовой верым налын. Кажне ийын тӱрлӧ научно-практический конференцийыште участвоватла. Мутлан, Семеновка селасе 21-ше №-ан школышто «Моя Россия – Моя Страна», Йошкар-Оласе «Синяя птица» гимназийыште «Проблемы гуманитарных знаний» конференцийлаште лийын. Тунемше-влакын «Мой первый шаг в науку» научно-образовательный форумыштышт кажне ийын тӱрлӧ шымлыме пашаж дене участвоватла.

Ӱдыр тыгак лицейысе «Эр Вий» йоча организацийын да «Морко шӱшпык» волонтер объединенийын председательже. «Илышым порылык тӱзата. Ме коча-кова-влаклан полшена, йоча-шамыч дене пашам ыштена. Порылыкым ончыктымо акцийыш: «Сирень Победы», «Любимому озеру – чистые берега», «Улыбнись, ветеран!» да моло мероприятийыш кумылын ушнена. 30 декабрьыште Изи Шӱргӧ ялыш шкет кодшо шоҥгыеҥ-влак деке концерт дене миен коштынна. Мый тушто Лумӱдыр лийынам», — палдарыш Маша.

Тунемшым чолгалыкше Моско марте конден. 2013 ийыште тудо Кремльысе ёлкышто лийын, а 2014 ийыште тудым Морко районысо Молодежный Парламентын членжылан сайленыт.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: