"Рубрик деч посна", 2017 ий, Пургыж тылзын 20-шо кечыже

“Арбор ӱдыр, Кукмор рвезе, ваш келшалын илыза”

Статьян авторжо Эльвира Терентьева

 

Тыгай тыланымашан сӱан муро дене 1993 ийыште Марий Турек посёлкышто Изергинмыт еш шочын. Кызыт Лариса Геннадьевна ден Владимир Саитович Коми Республикысе Инта олаште илат да вич йочам ончен куштат. Кок ий ончыч Изергинмытым шуко шочшан эн сай ешлан шотленыт да кокымшо премийым кучыктеныт.

Шӱм-чон кумылым налын моштышо Лариса ден Владимирым йолташышт-влакат жаплат. Нуно ешге тӱрлӧ пашам пырля ворандарен да канен моштат. Тидлан вате-марийын илышыштышт кажныжын шке амалже уло. Нуно коктынат шуко шочшан еш гыч улыт, но йоча годсо жапышт ойыртемалтше.

инта гыч

Кок корно…

Ларисан ачаже, Марий Турек район Арбор школышто 42 ий музыкым туныктышо Г.К.Васинкин, еш ансамбльым чумырен. Тушко чыла гаяк родо-тукымышт коштыныт, вара моло-влакат ушненыт. Ларисат тушто куштен. “Арбор вел” ансамбльын йӱкшӧ торашке шергылтын: финн-угор калык-влакын фестивальыштыже участвоватлен, Российысе да тӱнямбалсе калык усталык фестивальлаште лауреат лийын.

Лариса Лӱсэҥер ялыште шочын. Аваже Зоя Александровна Васинкина кызыт воктенысе Лоп ялыште ила. Тудо шуко жап тысе озанлыкыште да школышто поварлан пашам ыштен.

Лариса Оршанке педколледжыште “Учитель начальных классов, воспитатель” специальностьым налын да шке паша корныжым Марий Турек посёлкышто тӱҥалын. Ныл ий гыч Владимир Изергинлан марлан лектын.

А суртозан йоча жапше йӧршеш вестӱрлӧ лийын. Вич эрган да кок ӱдыран кугу марий ешыште шочшо Владимир ача-аваж деч кандаш ияш тулыкеш кодын. А ешышт Новосибрскыште илен, Владимират туштак шочын. Ачаже Татарстан район Кукмор, аваже Киров кундем Малмыж район гыч лийыныт. Татарск оласе школ-интернатыште илен гынат, сайын тунемын. “Тракторист-машинист” профессийым Киров кундем Вятскополянский районысо 17-ше №-ан ялозанлык училищыште налын. Трактористлан да комбайнерлан кок ий ыштымеке, армийыш налыныт. Тунамак организатор улмыжо палдырнен, тудым, прапорщикым, батальонын старшинажлан шогалтеныт. А вара Инта олашке илаш каен. Тушеч отпускышко толмыж годым Марий Турекыште палыме лийыныт да келшаш тӱҥалыныт.

Сӱан кечышт нерген тачат шыргыжалын шарналтат. Тунам Лариса Марий Турек школышто тӱҥалтыш класслам туныктен, “Рвезылык” ансамбльыште куштен. Самырык мужыр Пеледыш пайрем кечын загсыш коктын каен гына возалташ шонен. Но Ларисан шкеж гаяк лӱман йолташ ӱдыржӧ ансамбльын участникше-влаклан тидын нерген каласен. Тунам Владимир ден Ларисалан сюрпризым ыштеныт: автобусыш загс пӧлка вуйлатышым ӱжын конденыт да тӱшкан загсыш кудалыныт, а варажым – пӱртӱсышкӧ кол шӱрым кочкаш!

Инташте – марла кушташ да кутыраш

…Тыгак Л.Г.Изергина Инта олаште илыше марий ача-аван икшывышт Марий кундемым йӧратышт да пагалышт манын, нунылан марий йылмым туныктен. “Изергинмыт национальный культур рӱдерыште лийше кажне гаяк мероприятийыш ешге вашкеныт, ансамбльыш да кружокыш коштшо-влакат вашлиймашке кумылын толыныт, — ойла ты рӱдерын директоржо Н.В.Канева. — Тӱрлӧ калыкым “От колыбельных до былин” фольклор кас ден “Национальный модыш” цикл ушен шоген. Кажне калыкын тӱвыраж гыч эн волгыдыжым, сайжым да шергаканжым ойырен налын, калык-влакым келшен илаш чумырышо символ. Тыште Лариса Геннадьевна Изергинанат надырже уло”…

Пел миллион теҥгем муын гынат…

…Тылеч посна Владимир Саитович – шке порысшым кеч-куштат шуктышо еҥ. 2013 ийыште тудлан Москосо Рӱдӧ административный округын МВД управленийже таумут ден шергакан пӧлекым кучыктен. Тудо элнан рӱдолаштыже мланде йымал переходышто кайымыж годым кийыше вӱдылкам муын. А туштыжо пел миллион теҥге окса улмаш! Владимир Саитович, шонкален шогыде, тидым полицийыш наҥгаен пуэн. Оксан озажым полиций муын, тиде тыглай еҥ лийын. Тудо банкыште оксам налын, но йомдарен коден улмаш…

ТИДЕ МАТЕРИАЛЫМ ТИЧМАШНЕК «КУГАРНЯ» ГАЗЕТЫН 2017 ий 17 ФЕВРАЛЬЫСЕ НОМЕРЫШТЫЖЕ ЛУДСА,

ЭЛЬВИРА ТЕРЕНТЬЕВА (ЕНДЫЛЕТОВА).

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: