"Рубрик деч посна", 2017 ий, Пургыж тылзын 20-шо кечыже

Икымше сеҥымаш – икымше ийынак!

Статьян авторжо Эльвира Терентьева

артем2012 ий Артём Куклинын илышыштыже тура савыртышлан поян лийын: тунемаш пурен, ӱдырым налын да йӧратымашын саскаже – изи ньогашт – ош тӱням ужын. Ты ийынак “Про Федота-стрельца, удалого молодца” (Л.Филатов) йомакыште Посол-людоедын рольжылан “Эпизодысо эн сай роль” номинацийыште Йыван Кырла лӱмеш национальный премийын лауреатше лийын шуктен. Икымше сеҥымаш икымше ийынак толын!

Куклинмыт шочшыштлан суксо мут дене кылдалтше Ангелина лӱмым пуэныт. Марий Турек посёлкышто шочын-кушшо да бензозаправкыште операторлан пашам ыштыше пелашыж дене когыньыштым ныл ияш пачката ӱдырышт куандара, пашам устан шукташ да ончыкылыклан ӱшанаш тарата.

А кузе Артём тунемын? “8 класс марте ик “кумытан” отметкемат лийын огыл. Но 8-ше классыште “4” да “5” отметке коклашке черчений дене “2” отметке пурен шинче, — ойла артист. — Мыланем Юмо сӱретлаш талантым пуэн огыл. Карандаш дене чертитлем, йоҥылыш ыштем, а резинке нимом ок ӱшт, чыла кагазеш кодеш. Тиддеч вара изам ден шӱжарем полышкаленыт. Тыге сай отметке марте изиш шинчылташ логалын. Школым ик “кумытан” дене (физике дене) тунем пытаренам”.

Урокышто пуымо шинчымаш ушышкыжо вигак шыҥен, посна шинчылтын огыл, сандене шкем йогылан шотла. Чыла тидыже артистлан сай веле, шонем. Рольым писын тунемаш полша, а тудлан критике шомакым пелештат гын, весым колыштын мошта. Таче артист шке коллегыже-влакын, Игорь Актуганов ден Сергей Мамаевын, полшымыштым, йолташ семын туныктен ойлымыштым моткочак акла.

А статьям тичмашнек «Кугарня» газетын 2017 ий 10 февральысе номерыштыже лудса!

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: