"Сылнылык тӱня" рубрик, 2017 ий, Пургыж тылзын 27-ше кечыже

Курчак чонан, тудо чыла шижеш

Статьян авторжо Анастасия Эманова

Курчак спектакльым ончымо годым ӱмыл, ширме, силуэт, курчак-влак юзо тӱням шочыктат. Курчакым «иландарыше»-влак нерген газетыштына эреак палдараш тыршена.Fedorova_s_kukloyЙошкар-Оласе Курчак театрын самырык артисткыже Марина Федорова тышке шукерте огыл толын, кӱчык жапыште профессионал улмыжым ончыктен шуктен.

Морко район Кораксола ялын ӱдыржӧ изинек творчествылан шӱман кушкын. Шӱргыял кыдалаш школышто (кызыт тӱҥ школ) 9-ше классыште тунеммыж годым артист корным ойыраш шонен. Но шке шонымашыжым иктыланат каласен огыл. Школ деч вара М.Федорова И.С.Палантай лӱмеш тӱвыра да сымыктыш колледжыш Курчак театрын артистше специальностьлан тунемаш пура. Кумшо курс гычак Курчак театрыште модаш тӱҥалеш. «Колледжыште артист пашалан, курчакым чын кучаш, тудын дене йолташ лияш Галина Владимировна Ковалева туныктен. Тудо студент-влаклан кокымшо ава лийын. Курчак дене пашам ышташ куштылгыжак огыл. Эн ончыч поролон гыч ыштыме шариковый курчакым парняш чыкен кучылташ тунемынам. А вара моло тӱрлӧ курчакым пален нальым. Ик эҥерыш кок гана огыт пуро, маныт. Тидын дене ом келше. Мый Курчак театрыште кок ий пашам ыштенам, а вара Москош кусненам. Но чон театрыш ӱжын. Тышке мыйым угыч налмылан пеш куаненам, коллектив сайын вашлийын. Икымше ролем «Брат мой Каплик» спектакльыште Коля ава лийын. Пеш оҥай постановко. Тудым районласе йочасадлаште ончыктенна. «Принцесса на горошине» спектакльыште марионетке курчак дене Принцессам модынам. Живой планыштат икмыняр роль лийын, но эн чот тростевой курчак дене пашам ышташ йӧратем,  - манеш Марина. – Сай але осал персонаж нерген ойлаш гын, утларакшым отрицательный геройын рольжым модаш кумылан улам. Тыгай роль нелырак. Вет геройым тичмашын осал манаш огеш лий, тудын шке чынже, осал койышланат шке амалже уло. Тыгай персонажын чон шижмашыжым, тургыжланымашыжым умылаш, тудым шижын мошташ оҥайрак. Садлан тыгай роль-влакым шукырак моднем. Кызыт «Бедный Акакий» спектакльыште модам. Постановко шкешотан, шонаш таратыше. Ик курчак денак коктын-кумытын ик жапыште пашам ыштена. Ик артист курчакын вуйжым куча,  мый, мутлан, кидшым. Тыге модына. Курчак иланыже манын, персонажым, коллегем шижын моштыман. «Морозко» спектакльыште Пийым модам. Тудым садиклаште кызыт ончыктена». Артисткын творчествыжым сайын палыше да аклыше еҥ – аваже. «Пытартыш курсышто тунемме годым пырля тунемше йолташ-влак дене Моркыш «Любопытный слоненок» спектакль дене толынна ыле. Постановкышто Бегемотым модынам. Авам тунам икымше гана модмем ужын. Тудлан пеш келшен да ойырен налме профессием чын манын ойлен», — палдарыш М.Федорова. Марина театр илыш дене ила. Тудо курчакше-влакым пеш йӧрата да перега. Йоҥылыш камвозеш гын, курчакше деч нелеш налаш огыл манын йодеш. Марина ӱшана: курчак илыше, тудо чыла шижеш да шарна. Артистке ятыр жапшым творчествылан пуа. Детектив произведений-влакым лудаш йӧрата. Ончыкылык планже кугу, эшеат сай да шукырак роль-влакым модаш шона. Тачылан эн йӧратыме рольжо-влак «Айболит» спектакльыште – Чичи Маймыл да «Щелкунчикыште» — Клара.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: