"Талвий" рубрик, 2017 ий, Пургыж тылзын 27-ше кечыже

Неле пагытыште шке ыштыме абажур-влакым ужален

Статьян авторжо Анастасия Эманова

Тале марий пӧръеҥ, А.Искандаров лӱмеш кугажынаш капеллын артист-вокалистше, Марий Эл Республикын калык артистше Александр Егошин 18 февральыште 55 ияш лӱмгечыжым палемден. Тудын мурымо «Уло чон ден йӧратем», «Шочмо вер», «Ош куэ» да моло мурыжо-влак чонеш логалыт, калыкыште йӧратыме улыт.

 Муро – калыкын чонжо

егошин1А.Егошин Кужэҥер район Одывлак ялыште шочын. «Ял моткоч сӧрал кундемыште верланен. Воктене кугу пӱя уло. Шочмо верем тӱтан мардеж деч Рошко, Кодомар чодыра-влак аралат. Ял воктене шуко корем: Кашка памаш, Лавушкан корем, Кӱсото корем – улыт. Изинек пӱртӱс лоҥгаште кошташ йӧратем, йолташем-влак дене йӱранигече годым пӱяш колым кучаш, чодыраш поҥгым, емыжым погаш коштынна. Кызытат кеҥеж шуэш да чодыраш вашкем, тушто чон кана», - ойла артист.

Александр Егошин Коҥганур кыдалаш школышто тунемын. Тушто хорышто мурен. Школ деч вара Йошкар-Оласе И.С.Палантай лӱмеш музыкальный училищыш вокал пӧлкаш опер мурызо Алина Крылован классышкыже тунемаш пурен. А дипломым налмеке, уста рвезым А.Искандаров лӱмеш Марий кугыжаныш капеллыш пашаш ӱжыныт. Тунам тудым кумдан палыме музыкант Михаил Капланский вуйлатен. Ынде 25 ий Александр Фёдорович капеллыште мура. «Йӱкем – лирический тенор. Музучилище деч вара Германийыште шогышо руш войскан военный ансамбльышкыже каяш шоненам, тушеч ӱжмашат толын ыле, но пӱрымаш вес векыла савырен. Тора кундемыште улмо годым чон шочмо велыш эре шупшеш. Тынар ий пашам ыштыме жапыште шуко гана гастроль дене йотэллаште, мутлан, Бельгийыште, Германийыште, Литваште, Францийыште –  лийынна. Лач шочмо вел деч тораште улмо годым веле умылет: йӧратыме эл, еш, родо-тукым, поро пошкудо, йолташ-влак деч шергыже нимо уке.

Гастроль дене БельгийыштеКапеллына – тӱрлӧ кундемыште эртыше конкурс да фестиваль-влакын дипломантышт да лауреатышт. Мемнам эре сайын вашлийыт, марий семым йӧратен колыштыт. Студент улмум годым «Марий Эл» ансамбльын тунамсе вуйлатышыже Михаил Мурашко мыйым Москошко ик отчет концертыш мураш ӱжын. Жюриште йотэлла гыч толшо еҥ-влакат лийыныт. Нуно марий калык нерген колынжат огытыл, очыни, но кунам марий сем йоҥгалтен, кажныже тӱткын колыштын, марий сем, муро чонлан эм гай манын ойленыт. А икана Яков Эшпай лӱмеш филармонийын коллективше дене гастроль дене Испанийыш миенна. Марий муро почеш мемнан семын испанец, негр-влак кушташ тӧченыт. Тидыже моткоч куандарен. Артистлан мурыжо вес еҥын чонжым тарвата гын, эн кугу ак. Тӱрлӧ конкурслаште участвоватлыме годым мурына гоч уло тӱнялан калыкна дене палдарена. Арам огыл ойлат: муро – калыкын чонжо, сынже, койышыжо, кумылжо», — каласыш А.Егошин.  

Александр Фёдорович академический йӱкан гынат, эстраде мурызо семынат палыме. Тудо, ӱжыт гын, концертыштат, лӱмгечыштат мура. «Кызытсе саманыште ик академический исполнений дене серлагаш огеш лий. А эстраде мурым калык утларак колыштеш. Конешне, академический гыч эстраде мурым мурымо годым йӱк вашталтеш. Вес семынрак мураш кӱлеш», — манеш мурызо.

Александр Егошинлан муро – илыш. Тудо армийыште служитлымыж годымат артист улмыж дене палыме лийын. «Украинысе Полтава областьыште служитленам. Мемнан частьым у танк дене пашам ышташ туныктеныт. Мо оҥайже: ме, салтак-влак, варажым офицер-шамычым у танк дене кошташ туныктенна. Мый танк дене кудалышташ туныктышо инструктор лийынам.

Армийыште тӱрлӧ конкурс чӱчкыдын лийын. Тушто мурен, я куштен, я эше иктаж-мом ыштен моштымым йодын огыт шого, выступатлет веле манын ойлат. Икана ик концертыште ик салтаклан мураш кӱштеныт. Тудо чот тургыжланымыж дене сценыште уш каен йӧрлын. Мыят тыгай мероприятийлаште марий койышем ончыктенам. Такшым армий илыш пеш оҥай да кажне пӧръеҥлан кӱлешан», — мут мундыражым умбакыже ронча А.Егошин.

 Сай суртоза, пелаш да ача

«Пелашем Любовь Алексеевна Марий Турек район Марий Купто кундем гыч. Ӱдырна уло. Тудо МарГУ-со юридический факультетыште кумшо курсышто тунемеш. Тений юристын полышкалышыжлан пашам ышташ пурен. Шӱм падырашна верч моткоч куаненна, — каласыш ача. – Ешем тамле кочкыш дене чӱчкыдын сийлаш тыршем. Шыл гыч ыштыме кочкышым йӧратат. Келге противеньыш оҥго дене пӱчкедыме шоганым, помидорым пыштем да изиш жаритлем. Вара ӱмбакыже луан чыве шылым пӱчкеден пыштем да коя лекмешкыже жЛитваштеаритлем. Пареҥгым кужу олым пырче семын пӱчкедем да майонез, шинчал, йоҥыштымо пурыс дене варем да шылыш пыштем. Ӱмбакше майонезым йыгалтем, тёрко гоч нӱжымӧ сырым шавалташ лиеш. 230-250 градусан шокшышто духовкеш кӱктем. Чот тутло лиеш.

Кеҥеж шуэш да эре садышке кудалыштам, чодыраш коштам. Ӱмаште моткоч шуко поҥгым, модым, турнявӧчыжым погенам. Поҥгым, жаритлен, пакетыш оптем да морозильникыште аралем. Телым тудым ырыктен кочкаш веле».

Александр Егошинын кид-йолжо чылалан толеш. Тудо мӧҥгыштӧ пӧръеҥ пашамат ышта, пелашыжланат полша. 90-ше ийлаште, неле пагытыште, ешартыш оксам ыштен налаш манын, тӱрлӧ йӧным кычалын. Шке гыч воштырым, йолвам, куэмым кучылтын, абажурым ыштен да районласе, тыгак Чебоксар да Озаҥ олаласе ужалыме пӧртлаш коштыктен. «Налыныт вет. Кызыт тыгай кидпашам ом ыште. Такшым пӧръеҥ  кеч-могай неле ситуаций гыч лекташ йӧным кычалшаш. Чын пӧръеҥ шкенжым кӱшкӧ шындышаш огыл. Тудо ӱдырамаш-влакым пагалышаш. Но эн тӱҥжӧ – элжым йӧратышаш да тудым, ешыжым, икшывыжым аралышаш», — манеш артист.      

Александр Егошиным «Кугарня» газет редакцийын коллективше лӱмгечыж дене шокшын саламла да шӱм-чон поянлыкым, пиал дене темше илышым тылана.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: