"Сылнымут алан" рубрик, 2017 ий, Пургыж тылзын 16-шо кечыже

«Огеш чыте чонем мурыдеже…»

Статьян авторжо Ирина Ямбаршева

Мурызо Алёна Яковлевам шукын палат. Тудо  тыгак почеламут-влакым воза. Сылнымут аршашыже мемнан газетыштат, «Ончыко» журналыштат савыкталтын. 2016 ийыште Вячеслав Абукаев-Эмгак лӱмеш «Ший памаш» фондын (вуйлатышыже В.Краснов) самырык автор-влаклан эртарыме конкурсышто «Эн сай поэзий» номинацийыште сеҥышыш лектын. Тиде номинацийыште тыгак Вера Гордеева палемдалтын.

AlenaМорко кундем Изи Корамас ялын ӱдыржӧ усталык шӱлышан ешыште кушкын. «Ешна кугу ыле. Ача-авамын шымше да межнеч икшывышт улам. Тукымыштына профессионал музыкант уке, но чылан гаяк мурылан шӱман улына: кок изам гармоньым шокта, весе гитарым перкала, мурымат шкеак воза. Ачам мураш тале лийын», — каласкала Алёна.

Почеламут-влакым школ жапыште возаш тӱҥалын. Шинчымаш тӱняшке икымше ошкылым шке ял школышто ыштен (кызыт тиде школ уке). 5-ше гыч 9-ше класс марте Чодыраялыште верланыше Арын кыдалаш школышто, вара Марий педагогический институт пеленысе лицейыште тунемын. Марий кугыжаныш университетысе марий отделенийым пытарен. «Арын школышто марий йылмым туныктышо Любовь Ивановна Александровалан кӧра шочмо йылмым йӧратен тунемынам. Моло жанр коклаште почеламут дене возымым лудаш мылам куштылгырак чучын. Наизусть каласкалашат йӧратем ыле», — ойла А.Яковлева. Алёна йӧратымаш, пӱртӱс, илыш нерген сера. Кок шочшан ава йоча-влакланат почеламут-влакым возкала.

Алёнан почеламут аршашыжым газетыште лудаш темлена.

Кыл

Шортеш аза, изи киза лоҥеш.

Йоча авам вуча, ӱжеш, йодеш.

Пала да кид-шепкам, пызна оҥеш –

Тыге илашлан вийым подылеш.

Ончет, чучеш, могай эше начар!

Огеш лий кынелаш, куржаш ок лий.

Но чылт ӧрмаш: пала авам, ачам,

А кормыжта парням – тынаре вий!

Изи тӱняштыже тудат – оза,

Мошта шонен, шке семын эскерен.

Ме манына: «Колой, чукай, аза…

Молан шортеш? Ала кылмен, нӧрен?»

Ала ыш йӧрӧ кочмо – йӧслана,

Ала шижеш – игече весемеш.

Но лач аван йӱк дене лыплана

Да нералта ласкан аван семеш…

Огеш лий тиде кылым умылаш,

Пиал – кӧлан палаш, шижаш пӱрен.

Но курым-курымешлан икте раш:

Ава лийшаш эре йоча пелен.

Алена Яковлева.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: