"Илыш йогын" рубрик, 2017 ий, Пургыж тылзын 16-шо кечыже

«Савыктыме газетда — поро йолташна»

Статьян авторжо Ирина Ямбаршева

У Торъял район Семисолаште илыше вате-марий Римма ден Анатолий Ивановмыт марла газет-влакым куанен лудыт. «Кугарня» газет — нунын эн йӧратыме савыктыш. «Газетым лекташ тӱҥалмыж годсек  налына, санденак, очыни, самырык улмына гай чучеш. Тудо мемнам пашалан да у сеҥы-машлан эре кумы-лаҥда», — палемдышт вате-марий.

a1Ведат Миклай Толя, армий гыч толмекыже, «Первый май» колхозышто водительлан пашам ышташ тӱҥалын. Ончычсо танкист техникым сайын пален. Сандене озанлык вуйлатыше тудлан кеч-могай машинам ӱшанен. Анатолий грузым шупшыктен, кӱчык жапыште колхозын сай водительже лийын шуктен. Икмыняр жап гыч пошкудо Чӱксола ялысе йочасадыште поварлан пашам ыштыше Єркансола ӱдыр Элыксандр Риммам вашлийын. Идалык наре гыч нуно ушненыт. Кум ий гыч Семисола ял покшелсе лап верым тӧрлен, тушан пӧртым ыштеныт. Толя ден Римма кумло ий утла пырля илат. Руслан эргышт ден Наташа ӱдырышт ешан улыт. Коча-ковам вич ияш Микит ден талукат пелаш Ули уныка-влак куандарат.

Кызыт Римма мӧҥгӧ пашам виктара, яра жапше годым тӱрла. Толя У Торъял энергосетьыште электромонтёр-водительлан пашам ышта. Пошкудышт тудым чулым, пашаче еҥлан шотлат да кожмак организатор улмыжлан пагалат. Арам огыл Анатолий армийыште взвод командирын алмаштышыже лийын. Вате-марий ушкалым, ӱшкыжым але тунам, ныл шорыкым, кум-ныл сӧснам, кеҥежым кайыквусым: комбым, лудым,  кӱркам, чывым — ашнат. Тылеч посна кумло-нылле сотыкышто пареҥгым куштат. Нӧрепыштышт кок тонн наре вожсаска аралалтеш. Шӱдӧ литр пурыман вочкышко ковыштам оптеныт. Поҥгым, киярым, помидорым шуко шинчалтеныт. Колым, коптитлыме шылым телылан шагал огыл ямдыленыт. Тыгак пакчаште латкок олмапу, вишне да тӱрлӧ емыжвондо кушкыт, нуно поян саскам пуат. Суртышто паша лыҥ гынат, Анатолий Николаевич  каныш жапыште Немда эҥерыште колым эҥыраш ик-кок шагатым муашак тырша.

Иван Речкин.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: