"Воштылаш товатат сулык огыл" рубрик, 2017 ий, Ӱярня тылзын 27-ше кечыже

«Воштылаш, товатат, сулык огыл!»

Статьян авторжо Ирина Ямбаршева

«Кугарня» газет редакций кажне ийын «Воштылаш, товатат сулык огыл!» мыскара конкурс-фестивальым эртара. Тений тудо 1 апрельыште М.Шкетан лӱмеш национальный драме театрыште лиеш. А тиддеч ончыч, эн оҥай мыскараче-влакым муаш манын, районлаште отборочный турым эртара.

DSC_487410 мартыште Шернур посёлкысо тӱвыра полатыште «Воштылаш, товатат, сулык огыл!» фестиваль-конкурсын икымше отборочный этапше эртен. Тушко Шернур, Параньга, Марий Турек да У Торъял районла гыч мыскараче-влак толыныт.

Чаманен каласаш логалеш, тений участник-влак ӱмашсе деч шагалрак лийыныт. Но шукынжо икмыняр номер гыч ямдыленыт. Параньга район Усола тӱвыра пӧртын пашаеҥже-влак газетна дене пеҥгыде кылым кучат. Нуно ялысе илышым ончыктышо кум номерым ямдыленыт. Мыскара такмак-влак DSC_4927дене Шернур район гыч Н.Танеров выступатлен. Сылне гармонь сем почеш оҥай куплет-влак йоҥгеныт. Морко район гычат участник-влак лийыныт. «Унчо вий» мыскараче команде калыкым воштылтен кертын. Тудат кум сценкым ямдылен. «Пенсий» да «Рвезылыкым шарналтен» номер-шамычым ойыренак палемдаш лиеш. Шернур посёлкысо тӱвыра полат пеленысе театральный кружок выступатлен.

Концертым шке сылне мыскараже-влак дене мемнан журналистна Татьяна Пчёлкина вӱден. Газетын корреспондентше-влак жюри член лийыныт, тыгак моло участник-влак семынак сценыш мыскара дене лекме. «Кугарнян» йолташыже-влак мурызо Татьяна Умурбаева да «Йорга каче-влак» группо шке мурышт дене калыкым куандареныт.

Чыла выступлений-влакым ончен лекмеке, ме «Унчо вийын» «Рвезылыкым шарналтен» сценкыжым да Усола тӱвыра пӧртын «Депутат» номержым Йошкар-Олаште ончыкташ келшышна.

17 мартыште Волжский районысо Приволжский, 22 мартыште Оршанке районысо Тошто Крешын  клублаште лийыныт. «Вара кузерак эртыш?» — йодмылан «Чаплын, кертыт», — манын вашешташ лиеш. Тичмаш ончымаште туге чучеш, а мыскаран жаплан келшышыжым, пӱсылыкшым, тидын дене мом ончыкташ шонымыжым «шӱгынчаш» тӱҥалат гын, шанчашыже ятыр погына.

_DSC1644Конкурсышко ты ганат Карай клубысо театрын участникше ден Сотнур йочасадыште пашам ыштыше-влак толыныт. Тыгак Провой вел гыч лийыныт. Жюри ныл номерым Йошкар-Олаште 1 апрельыште лийшаш мыскара пайремышке кондаш палемдыш. Нунын кокла гыч иктыжым  Сотнур йочасадын коллективше ямдылен. Тусо пашаеҥ Вера Акпатырева редакцийышкына йодмашым пуэн ыле. Весела акай-влак «Тулартымаш» сценкым ончыктышт. Мыскара оҥайын чучын, модмышт годым артист семынак койыныт, костюмышт рольыштлан келшен.

Провой вел Эсмекпляк гыч Ольга Архипова ден Диана Николаева «Пляж» сценкым намиеныт. Кок самырык ӱдыр ончаш толшо-влакын кумылыштым савырен. У мыскараче-влакым муынна, адакшым самырык улыт, тидыжак конкурсышко у шӱлышым пуртен.  Провой вел гыч Светлана Гаврилова, Алексей Дружинин да Геннадий Васильев  «Мыжер дене» муро номерым ончыктеныт. Тӱмыр да гармонь сем почеш мурен куштымашым рӱдолашке кондаш ойырен нална. Но нине участник-влак толын огыт керт, Венгрийыш тӱнямбал фестивальыш каят. «Ме тендам иканаште йотэлыш колтена», — манын каласышна. Тыгак Карай театрын муро да куштымаш номержым сайлан шотлымо.

Участник-влак мыскара тематикым кумдаҥденыт, шала, йыгыжге койышым пеш ышт ончыктыл. Туге гынат сценыште выступатлыме годым йытыра огыл мутым коклан ойлен колтеныт. Провой вел Красногорский гыч Нина Зорина ден Зоя Иванова «Косметике салонышто» сценкым шонен муыныт. Марий ӱдырамашлан тӱрлӧ косметический процедурым ышташ темлат…

Красногорский библиотеке пеленысе «Мушмарий сескем» клубын активисткыже Таисия Смирнова «Воштончыш ончылно» монологым каласкалыш. Нине кок номерым уда манаш ок лий, но изишак «ачалкалаш» кӱлеш.

«Кугарня» газетын тыгай мероприятийжым аклен да пагален, Волжский районысо администрацийым вуйлатышын алмаштышыже Э.Муравьёва да тусо специалист-влак толыныт ыле. Тидыже вашкыл улмым пеҥгыдемда.

Приволжский клубын вуйлатышыже Елена Афанасьевалан да тудын вуйлатыме моло пашаеҥлан организатор да участник-шамычым шокшын вашлиймыштлан кугу таум каласена. Калык дене вашлиймашке поэтессе Мардан Рая миен.

Волжский районышто такшым мыскараче-влак ятырын улыт. Теве Чодыраял Корамас гыч «Чоткар тукым» коллективак мом шога! Но кызыт пӱтӧ кая, садлан ынде кокымшо ий почела весела акай ден ковай-влак конкурсыш огыт ушно. Чоныштым эрыктат.

Ӱшанена, ончыкыжымат районлаште тыгай конкурсна эрташ тӱҥалеш, а ойырен налме эн сай номер-влак 1 апрельыште чотак куандарат.

DSC_5732Оршанке район Тошто Крешын ялысе клубышто мыскара кас пеш веселан эртыш. Чылаже куд номер веле лийын гынат, кажныже оҥай ыле. Пуял гыч толшо участник-влак «Реве» сценкым ончыктышт. Клуб пашаеҥ Лиза Козлова шке йырже мыскараче-влакым чумырен моштен. Нуно клубышто тӱрлӧ сценкым шындат, ялысе калыкым куандарат улмаш. Алевтина Шанина ден Лидия Кудрявцева «Пазар» номерым ончыктышт, залыште шинчыше калыкым воштылтышт. Медведево район Арбан гыч Михаил Зуев тӱрлӧ оҥайым каласкалыш. Йошкар-Оласе мыскара фестивальыш Арбан Миша ден Пуял гыч участник-влак толыт.

Денис Очиев.

Татьяна Пчёлкина.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: