"Сылнылык тӱня" рубрик, 2017 ий, Ӱярня тылзын 24-ше кечыже

Калыкын кӧ улмыжым палынет гын, илымыжым ончал, йылмыжым тунем

Статьян авторжо Анастасия Эманова

15 мартыште ПГТУ-н тӱҥ корпусыштыжо эртыше «Келшымаш кӱвар» Vнациональный культур фестиваль тидым сайын пеҥгыдемден. Тушто шуко национальностян ӱдыр-рвезе-влак шке калыкыштын культурышт дене палдареныт, ваш келшен, пагален илен, икоян улмыштым ончыктеныт.

20170315_120802ПГТУ-што 25 эл гыч 800 утла студент тунемеш. Тений интернациональный студент ешыш Индий, Африкысе элла гыч самырык еҥ-влак ушненыт. Таклан огыл шке жапыштыже ПГТУ калык-влак кокласе келшымаш орден дене палемдалтын. Фестивальыште Марий Элысе тӱвыра, печать да калык-влакын пашашт шотышто министрын алмаштышыже В.И.Актанаев университетын ректоржо В.Шебашевлан калык-влак да конфессий кокласе вашкылым вияҥдаш полшымылан министерствын таумутшым кучыктен.

«Келшымаш кӱвар» фестивальыште 19 калыкын представительышт мастарлыкыштым ончыктеныт. Нунын деке Чуваший да Татарстан гыч студент-влак ушненыт. Фойеште шкешотан выставке лийын. Тӱрлӧ национальностян студент-влак национальный кочкыш-влакым ямдыленыт. Уна-влак шорык шыл гыч ямдылыме туркмен фитчи когыльым поснак чот моктен тамлышт. Тылеч посна шке калыкыштын сӧрастарыме ӱзгарыштым, вуйчиемыштым, книгаштым ончыктеныт.

JK4c2XwyquQФестиваль концерт дене пытен. Студент-влак калык мурым муреныт, куштеныт. Киргиз ӱдыр-рвезе-влак шке калыкыштын «Манас» эпос гыч ужашым модын ончыктеныт, национальный семӱзгар дене пеш чаплын шоктеныт. Нунын номерышт мыланем эн виянла да эн оҥайла чучын. Тыгай номерым иктат ыштен огыл. Кыргызстаныш миен толаш, эпосыштым лудаш кумыл лектын. Каласыман: тений фестиваль годым «Эн сай видеоролик» конкурс эртен. Интернет-йӱклымаш почеш Кыргызстан гыч толшо студент-влак сеҥеныт.

Национальный культур фестивальын вес кечынже Волгатехыште Российысе калык-влакын Ассамблей ушемын председательжын алмаштышыже, ассамблей исполкомын председательже Назиржон Абдуганиев дене вашлиймаш лийын. Тудо «Развитие культуры гражданского участия, межнационационального и межконфессионального взаимодействия в социокультурном развитии российских регионов и укрепления единства российской нации» научно-практический семинарыште участвоватлен. Тудо калык-влак кокласе кыл тӱрлӧ аланыште лийшаш манын ойлен. Калык-влак духовный культур могырым вашла пойдаралтшаш, но тыгодым национальный ойыртемыштым арален кодышаш да вияҥдышаш улыт. Но эн тӱҥжӧ – элыште чын йылме политике лийшаш. Национальный йылме-влакым арален кодаш чыла ышталтшаш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: