"Сылнылык тӱня" рубрик, 2017 ий, Ӱярня тылзын 24-ше кечыже

Курчак театрлан – 75 ий

Статьян авторжо Анастасия Эманова

Йошкар-Оласе Курчак театр йоча-влакым йомак тӱняш кажне кечын ӱжеш. Ты пашам шуктымыжлан вашке 75 лиеш. Тидын вашеш театрын пашаеҥже-влак ятыр мероприятийым эртарат.

20170319_125238Кодшо рушарнян театрыште лӱмгечылан да Кукольникын кечыжлан пӧлеклалтше йоча-влаклан кугу пайрем эртен. Тӱрлӧ модыш, мастер-класс-влак лийыныт. Икшыве-влак ӱмыл театрыште модаш, шар гыч пийым ышташ тунемыныт. Ты кечынак «Мый тиде курчакым йӧратем» йоча кидпаша конкурсым иктешлыме. Тушко республикысе 82 йочасад гыч участник-влак ушненыт. Сеҥыше-влаклан 1-ше, 2-шо да 3-шо степенян дипломым, шергакан пӧлекым да театрын эн сай спектакльлашкыже ӱжмашан билет-влакым кучыктеныт. Паша-влак моткоч моторын, чаткан ыштыме улыт. Коеш, йоча-влак уло моштымыштым, кумылыштым курчакым ыштымашке пыштеныт. Эн сай паша-влак театрын фойештыже 30 апрель марте ончыкталтыт.

«кондаковПайремыш ачам дене толынам. Мый ӱмыл театрыште модын ончышым. Кагаз гыч йомакысе персонажым пӱчкеденам, йӧратыме «Ну, погоди!» мультфильм гыч герой-влак, весела клоун дене войзалтынам. «Чудо-чудное, диво-дивное» спектаклят келшыш. Чылажым умылен омыл, но оҥай лийын», — ойла ныл ияш Марк Кондаков.

А 21 мартыште Т.Евсеев лӱмеш Национальный тоштерыште Курчак театрлан пӧлеклалтше экспозиций почылтын. Тушто ятыр фотографийым, документым, актёр, режиссёр-влакын биографийыштым, афише ден буклет-влакым, тошто курчак-шамычым чумырымо.

Курчак театр официально 1942 ий 15 майыште почылтын. Георгий Константинович Крыжицкий икымше художественный вуйлатыше лийын. Тунам тудо Маргостеатрын руш труппыжым вуйлатен. Курчак театрыште икымше спектакльым Сергей Преображенскийын «Петрушка у малышей» пьесыж почеш шындыме. Выставкым почмо годым театрализоватлыме выступлений лиеш. Артист-влак лачак ты постановко гыч ужашым модын ончыктеныт. У тургымышто ты спектакльым уэмдымым калык ончыко луктыт.

Мероприятийыш республикысе тӱвыра, печать да калык-влакын пашашт шотышто министр М.Васютин толын. Тудо Курчак театрын шкешотан улмыжо, кугу пашам шуктымыж нерген ойлен.

Выставке тылзе шуйна. Театр искусствым йӧратыше-влаклан, йоча-шамычлан тушко миенак толман.cwWwbC6OuVY

«Выставкыште театрын да Национальный тоштерын архивышт гыч налме экспонат-влак ончыкталтыт. Мутлан, тоштерын архивше гыч 30-60-шо ийласе фото-влак, «Ший памаш» спектакль гыч курчак-шамыч улыт. Тиде выставкым шкенан театрыштат эше шуко экспонатым ешарен ончыктена. Кызыт Марий Элысе аудиовизуальный документацийын кугыжаныш архивше дене пырля театрын историйже, артистше-влак нерген интерактивный дискым ямдылена. Лӱмгечылан (19 майыште пайремлена) тудым ыштен шуктена, шонем», — палдарыш театрын сылнымут ужашыжым вуйлатыше Ирина Суворова.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: