"Рубрик деч посна", 2017 ий, Ӱярня тылзын 31-ше кечыже

Мастарлыкым шылташ огеш лий

Статьян авторжо Светлана Кушакова

Мартыште наказанийым шуктышо федеральный службын республикысе управленийжын тӧнежлаштыже шинчыше еҥ-влаклан ятыр оҥай конкурс эртен. Управленийын воспитаний паша пӧлкажын пашаеҥже-влакын шонымашышт почеш, тыгай конкурс-влак эрык деч посна кодымо еҥ-влаклан яра жапым пайдалын кучылташ, творческий кумылыштым лукташ, мастарлыкыштым вияҥдаш, талантан еҥ-влакым муаш полшат.

Пингвинат, маскат пырля илат

ИК-7 1 отряд - гран-при (1)  Тылзе тӱҥалтыште лум скульптур конкурс лийын. Тудо участник-влакын фантазийыштым почын пуэн. ТЫгак конкурс верысе кумдыкым сылнештараш полшен, шинчам куандарен.

Тений лум тидлан ситышын лийын. Икмыняр жап гыч режимный верлаште лум гыч ыштыме ятыр оҥай скульптур шочын.

Конкурсым жюри иктешлен. Икымше степенян диплом дене 6-шо №-ан пеҥгыде режиман колонийын 2-шо ден 3-шо отрядласе мастар-влак палемдалтыныт. Нуно лум дене колым кучаш кайыше пингвин мужырым ыштеныт. Кокымшо верыште — “Марий чодыра” композиций. Тудын авторжо-влак 7-ше №-ан исправительный колонийын 3-шо отрядше гыч улыт. Нунын участкыштышт ынде маска еш шулен пытымешкыже илаш тӱҥалеш. Кумшо верыште – 4-ше №-ан исправительный колонийын 3-шо отрядшын луммӧчыржӧ. Тудын деч посна ты конкурсшат конкурс огыл докан. А гран-прим 7-ше №-ан исправительный колонийын 1-ше отрядше налын. Тиде скульптур “Дарим шар земной детям” маналтеш. Российыште Экологий идалыкым пайремлымылан пӧлеклалтын.

Профессионализмым ончыктымылан посна пӧлекым Елена Бурляевалан кучыктымо.

Сӱретлат, пӱчкедат, модышым ыштат

Куклы - тильды Н.КгязевойE (2)Эрык деч посна шинчыше-влак коклаште талантан ятыр еҥымужаш лиеш. Тидым ИЗО сымыктыш конкурсат пеҥгыдемдаш полшен. Тыгай конкурс кажне ийын эртаралтеш. Ончыч участник-влак регионысо этапыште танасат, вара сеҥыше-влакын пашашт Россий конкурсыштат аклалтеш.

Конкурсым уголовно-исполнительный системын попечительский советше Россий сӱретче-влак совет дене пырля эртара. Иктешлымашым кум номинацийыште: “Живопись”, “Декоративно-прикладной сымыктыш”, “Модыш” — ыштыме.

Конкурсыш 30 утла пашам аклаш лукмо. “Живопись” номинацийыште “Дом у реки” картине палемдалтын. Авторжо — 4-ше №-ан колонийыште шинчыше Алексей Воронцов. Декоративно-прикладной сымыктыш паша-влак кокла гыч эн сайлан пу гыч пӱчкеден лукмо “Пегас” пашам шотлымо. Автор – Иван Токарев (СИЗО-1). “Модыш” номинацийыште Наталья Князеван пашаже ойыртемалтын.

Наталья 7-ше №-ан исправительный колонийыште наказанийым эрта. Тудо Мурманск областьыште шочын-кушкын. Кидпашалан изинек шӱман кушкын. А тильде-курчак-влакым ышташ колонийыште тунемын. Кызытеш Наталья шӱдӧ утла тӱрлӧ модышым урген. Тудын пашаже-влак ведомствысе конкурслаште веле огыл палемдалтыныт. Наталья Йошкар-Ола историй тоштерын эртарыме декоративно-прикладной сымыктыш фестиваль-конкурсыштыжат диплом дене палемдалтын. Нине оҥай кручак-влак кажныжым моторлыкышт дене савырен кертыт.

Тильде – кид дене ыштыме оҥай изи курчак. Тудым ик выкройко почеш ыштет гынат, кажне еҥын тӱрлӧ лиеш. Садлан тӱняште икгай тильде йӧршын уке, манаш лиеш. Икымше тыгай курчакым норвежский дизайнер Тони Финнангер ыштен. Тильде янлыкат, иктаж йомакысе героят але айдемат лийын кертеш. А курчакым ышташ бязь, хлопок, меж, тасма, шӱртӧ, полдыш да эн тӱҥжӧ — кумыл кӱлыт. Выкройкым ямдымат кучылташ, шке шонен лукташат лиеш.

Моторлык конкурслан ямдылалтыт

7-ше №-ан исправительный колонийыште шинчыше ӱдырамаш-влак 12 апрельыште эртаралтшаш “Шошо мисс” моторлык конкурслан кыртмен ямдылалтыт. Ты шоу-программыште кандаш ӱдырамаш таҥасаш кумылым ончыктен. Ӱдыр-влак кызыт кажне яра жапышт годым репетицийым эртарат. Нунылан верысе клубым вуйлатыше Ирина Цветкова полша.

“Шошо мисс” конкурс тений кумшо гана эртаралтеш. Организатор-влакын палемдымышт почеш, тудо ты гана эшеат оҥай лийшаш. Икымше этап – подиумышто коштмаш, кокымшо “Флора и фауна” маналтеш. Кажне участницылан шерева почеш логалше образым ончыктыман. Образ-влакым Экологий идалыкым шотыш налын кычалме. Куштымаш конкурс капкыл лывыргылыкым ончыкта. Пытартыш конкурс иктаж-могай артистым койдарен модын пуымо дене кылдалтын. Икымше канал дене ончыктымо “Точь-в-точь” передаче сынан.

- Участнице-влаклан моло ӱдырамаш-влак полшаш тӱҥалыт — ойла воспитаний паша шотышто пӧлкам вуйлатыше О.Смирнова. — Поснак сценылан костюмым ыштыме кружокыш коштшо-влакын надырыштым палемдыман. Костюм эскиз-влак производственный училищыште ургалтыт.

Моторлык конкурсым сылне тувыр деч посна ужашат огеш лий. Кызыт икымше костюм-влак ямде улыт. Ӱдыр-влак уэш чиен ончен, ямде лиймешке сӧрастарат.

Жюриште пӧръеҥ-влак лийыт. Кажне участникым шкешотан пӧлек вуча. Палемдыман: 7-ше №-ан исправительный колонийыште шукынжо наркотикым закондымын кучылтмо дене кылдалтше осал пашалан шинчат. Шинчыме жапышт ик ият пеле гыч 10 ий марте.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: