"Рубрик деч посна", 2017 ий, Ӱярня тылзын 31-ше кечыже

Мураш шочшо мурышаш

Статьян авторжо Эльвира Терентьева

Апсадикова

Марий Турек районышто Раисия Петряевам шарныме лӱмеш “Ший оҥгыр” марий калык муро конкурсышто участник-влакым тӱрлӧ номинацийыште акленыт. Тений тышке республик гыч веле огыл, Удмуртий ден Пошкырт кундемла гычат яндар йӱкан мурызо-влак толыныт. Таче ик участнице – Пошкырт кундем Балтач район Нӧлпер ял гыч Анастасия Апсадикова (снимкыште) дене палдарена. Тудлан “Ший оҥгыр” конкурсын ӱшанже” номинацийыште дипломым кучыктеныт.

- Настя кок ияш годсек мура: телевизор ончыко шогалын да мурызо Валериян оҥай мурылажым мурен, — каласкала аваже Элени. — Тидым ужын, ме ӱдырланна музыкальный караокем налын пуышна. Тушто Настя эре 100 баллым поген. Музыкальный школыш ме ышна колто, паленна: Настялан талантым пӱртӱс пуэн. Но ик кечын туныктышыжо Рима Римовна, мемнан деч йодде, музыкальный школыш наҥгаен. Тушто ӱдырна шуко жап ыш тунем, арня коштмеке, икымше гыч кумшо классыш кусарышт. Талантан улмыжлан. А вара каласышт: музыкальный школыш арнялан але тылзылан ик гана коштын кертеш.

А 2014 ийыште ме ӱдырнам Уфаште эртаралтше “Вдохновение” V тӱнямбал конкурс-фестивальыш намийышна. Тушто 13-14 ияш-влак коклаште “Калык вокал” номинацийыште икымше степенян дипломым нале.

Тиде ийынак Настя Пошкырт кундемыште эртаралтше ятыр конкурсышто участвоватлен да эре икымше верыш лектын. А 2015 ийыште ик таҥасымаште кумшо верыш логалмеке, шуко шортын, тургыжланен да муро тӱня дене чеверласаш шонен пыштен. Очыни, тидыже самырык ӱдырын йӱк вашталтме пагытше дене кылдалтын улмаш. “Настя мурыде иленжат ок керт, — мане аваже. — Мӧҥгыштат кугу йӱкынак мурен коштеш, тудым иктат ок чаре, ме тунемынна”.

Ӱдырын сеҥымашыже-влакым шотыш налын, кок ий ончыч июньышто Балтач районысо администраций “Артек” лагерьыш путёвкым кучыктен. Чолга ӱдыр туштат творческий конкурслаште участвоватлымыжлан лауреат лӱмым сулен налын. Крымыште йолташыже-влаклан Настя татар мурым мурен.

Кызыт Настя Балтач школышто 9-ше “б”классыште сайын тунемеш. Мутым колыштшо, ару да мӧҥгыштӧ полышкалыше… Ешыште изаж дене коктын улыт. Кызыт Володя изаже армийыште служитла. Тудат яндарын мура да моторын кушта. Настян ачаже Сергей Садриевич музыкылан шӱман, баяным да вятский гармоньым устан шокта. Аважат изиж годым тӱрлӧ фестивальыште мурен да куштен. А такшым районысо калык Настян кочажым, Садри Апсадековичым, сайын шарна. Тудо гармонь дене шоктен мурен. Самега коважат мурым шуйдарен мошта. Настя кызытеш музыкым хоббижлан шотла, конкурслаште изирак акым пуымылан кӧра стоматолог лияш шонкала.

Но… Конкурс кечын тудым Марий Турекыште илыше Валентин Зайцев (ончычсо милиций пашаеҥ, икмыняр книган авторжо) Йошкар-Олам ончыктен коштын. А тудо “Кушто вара Палантай лӱмеш тӱвыра да сымыктыш колледжше?” манын йодде чытен огыл. Варажым Настя да Балтач район гыч пырля выступатлаш толшо Пётр Абдуловым “Сандал” кафешке пуртен. Тушто марий кочкышым кочмеке, эрвелмарий ӱдыр “Команмелна ден подкогыльын тамле улмыштым пален омыл” манын. А кастене изи шӱдыр шке яндар йӱкшӧ дене ончаш толшо калыкым куандарен. Такшым “Вконтакте” сетьыште “Ший оҥгыр” конкурсышто участвоватлыше видеоштым ончыктымо да интернет-йӱклымашым увертарыме улмаш. Тыгодым Настя эн шуко йӱкым поген. Но ончаш толшо еҥ-влакын ойлымышт почеш, тидлан посна призым ышт кучыкто.

Настюша, конкурслаште икымше от лий гынат, ойгырымо ок кӱл. Кӧлан шонет, тудлан тунем. А илыш моткоч оҥай: муро тӱняште чынжымак илаш да тыгодым ве пашам шукташ лиеш. Волгыдо шонымашым шукташ южгунам кугу чытышат кӱлеш.

Эльвира Терентьева.

В.Зайцевын фотожо.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: