"Рубрик деч посна", 2017 ий, Ӱярня тылзын 31-ше кечыже

Пашам ышташ кумыл кӱлеш

Статьян авторжо Светлана Кушакова

29 мартыште наказанийым шуктышо федеральный службын республикысе управленийже пеленысе Общественный советын еҥже, калыклан паша верым ситарыме шотышто рӱдерын Йошкар-Оласе пӧлкажым вуйлатыше С.Чикризов 1-ше №-ан следственный изоляторышто шинчыше-влак дене вашлийын. Рӱдерын пашадыме-влаклан полышым пуымыж шотышто ойлен.

Республик мучко 15 пӧлка пашам ышта. Эрыкыш лекше кажне еҥ тушко, кӱлеш документым налын, паша верым йодын толын кертеш. Лу кече жапыште темлыме паша вер почеш пашашке налме огыл гын, айдеме пашадымылан шотлалтеш. Тунам 850 теҥге гыч 4900 теҥге марте пособий тӱлалтеш. Собеседованийыш кум кече жапыште кайыман, пашаш налын огытыл гын, тидын шотышто умылтарыме кагазым кондыман. Тений рӱдерыш 4917 еҥ полышым йодын толын, тушеч 1380 еҥжым учетыш шогалтыме.

Кызытеш 2629 вакансий уло, тушеч — 798-же пашазе-влаклан. Квалификацийдыме еҥ-влакым угыч тунемаш колтымо программе пашам ышта. Пашаш пурымаште нелылык лекме годым йодын толшылан шкаланже але изи группо дене профконсультаций-влак эртаралтыт.

«Эрыкыш лекше-влак коклаште рӱдерыш толшо-влак шагалын улыт. Тений 9 еҥ веле толын, кудытын паша верым муыныт, кумытым учетыш шогалтыме. Эрыкыш лекше ятыр еҥ судимость улмылан кӧра пашаш огыт нал манын шона. Паша пурымо годым шкем чын кучаш да кумылым ончыкташ гын, пашам муаш лиеш», — палемден Сергей Алексеевич.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: