"Рубрик деч посна", 2017 ий, Ӱярня тылзын 24-ше кечыже

Школыштат, колонийыштат тыршен, чын корныш шогалаш полшен

Статьян авторжо Светлана Кушакова

светан004Сарын, пашан, Вооруженный вийын да правам аралыме орган-влакын ветеран советыштым ыштымылан тиде арнян 30 ий темын. 2003 ийыште уголовно-исполнительный системысе ветеран-влакат тыгаяк советым ыштеныт. Тудым Рудольф Семёнович Григорьев вуйлата.

Колонийлаште пашам ыштыше да пенсийыш лекше икмыняр еҥ дене пырля ведомствылан пайдам кондаш, шке опыт дене палдараш, шке кӱлешлыкым шижаш манын, советым ышташ йодмаш дене лекме. Кызыт УИС ветеран-влак советыште 1836 ветеран да пенсионер учетышто шогат. Тушечын — Кугу Отечественный сарын ветеранже 3, тылыште тыршыше 18, МВД-н ончычсо пашаеҥже 300, УИС пашаеҥ 1536 да молат. Советын тӱҥ пашаже – ветеран-влаклан социальный полышым пуаш, ончыкылык кадрым куштымаште полшаш. Ӱмаште совет юридический статусым налын”,- мане Р.Григорьев.

Дикторлан марий радиош ӱжыныт

Рудольф Семёнович 1940 ийыште Морко районысо Семисола ялыште шочын. Биографийже сар годым кушшо чыла йоча-влакын гаяк. Ачаже 1942 ийыште фронтышто колен. Рудольф изинек пашаште кушкын, кертмыж семын аважлан полшен.

Кандаш классым Нурӱмбал школышто тунемын, кугурак класслам Моркышто пытарен. 1958 ийыште Сталинградысе технический училищышке тунемаш пурен, ты оласе тракторный заводышто токарьлан пашам ыштен. “Коммунистический пашан ударникше” лӱмым налын.

Вара кум ий армийыште служитлен, “Отличник боевой службы” знак дене палемдалтын. Армий деч вара илыш корно шочмо кундемышке конден. Самырык рвезе кӱшыл образованийым налаш шонен да Марий педагогический институтын историй пӧлкашкыже тунемаш пурен.

Армий деч вара Морко ик рвезе Иван Иванов дене (кызыт Польшышто ила) палыме лийынам. Тудо телевиденийыште пашам ыштен. Марий радиошко диктор кӱлеш, пашаш тол манын каласен. Тунамсе тӱвыра министр Николай Рыбаков дене пырля мыйым колыштыныт. Министр “Дикцийже сай, но марла кутырен ок мошто” манын ойлен, садлан пашаш ышт нал. А мый тудо жаплан армий гыч толынам веле, марла шагал кутыренам. Кызыт коллегыда лиям ыле, — шыргыжалын, Рудольф Семёнович паша корныжым каласкалаш тӱҥале.

Лу еҥ кокла гыч иктыже

- Институтышко республикысе МВД-н кадр паша шотышто вуйлатышын алмаштышыже толын. Тунам “Об укреплении исправительно-трудовых учреждений МВД СССР” пунчал лукталтын. Тудын почеш исправительно-трудовой учрежденийлашке педагог специальностян пашаеҥ-влакым налшаш улыт улмаш. Тидлан кӧра пединститут, лу еҥым ойырен, направлений почеш тушко пашаш колтышаш ыле. Лу еҥ коклашке мыят логалынам. Направлений почеш мый Морко посёлкысо колонийышке логалшаш улам ыле. Сӱан кечын пелашемлан Моркышко колонийыш отрядым вуйлаташ колтат манын каласышым. Тудо ММЗ-ште пашам ыштен. Тудын дене нститутысо педагогический факультетыште кас отделенийыште тунеммыж годым палыме лийынна. Пелашем Моркыш илаш куснаш тореш лийын. Кызыт южгунам тидлан чаманенат колта. Кок ий гыч гына элгӧргӧ паша органлашке пашаш пурышым. Тылеч ончыч Марий краеведений тоштерыште научный сотрудник лийынам, школлаште пашам ыштенам. Медведево район Ошла школым вуйлаташ шогалтынешт ыле. Но тушто пашам ыштымем шуын огыл. Такшым пашам чӱчкыдын вашталтылме сай койышлан тунам шотлалтын огыл. Кок ий жапыште мыланем МВД гыч эре йыҥгыртеныт, кунам толмем йодыныт. 1970 ийыште Куяр колонийыште пашам ышташ тӱҥальым, — каласкала ветеран.

Педагог образованиян, илыш опытан Рудольф Семёнович неле пашалан писын тунем шуын. Законым пудыртышо-влак коклаште ӱшаныш пурен моштен. Пырля пашам ыштыше йолташ-влак коклаштат пагалымашым сулен.

Р.Григорьев чыла тӱрлӧ режиман колонийлаште пашам ыштен. Тудын вуйлатыме отряд-влак паша таҥасымашлаште эреак ончыл верыш лектыныт. 1974 ийыште Рудольф Семёнович Вологда олаште эртыше СССР МВД-се эн сай отрядлам вуйлатыше-влакын слетыштышт лийын. “Победитель социалистического соревнования” знак дене палемдалтын.

Уголовно-исполнительный системыште пашам ыштыме жапыште республикысе МВД-н исправительно-трудовой учреждений-влак пӧлкажым вуйлатышын алмаштышыже марте кушкын. 1994 ийыште подполковник званий дене отставкыш лектын.

Ветеран совет ончыкылык тукымым кушта

Р.Григорьев УИС ветеран-влак советым ыштымаште ятыр тыршен. Кызыт вуйлатыше семын наказанийым шуктышо федеральный службын республикысе управленийжын чыла гаяк мероприятийыштыже участвоватла, советыште улшо еҥ-влакын интересыштым арала.

Личный составым воспитатлыме пашаште ветеран-влакын рольышт поснак кӱкшын аклалтеш. Ветеран-влак самырык пашаеҥ-шамычын наставникыштлан шотлалтыт. Нуно пашан ойыртемже нерген каласкалат, неле ситуацийла гыч лекташ полшат. Самырык тукымым патриотизм шӱлышеш воспитатлыме пашалан кугу вер ойыралтеш. Школлаште тунемше, военно-патриотический клублашке коштшо йоча-влак дене эреак вашлийыт, тӱрлӧ конкурсым эртарат.

Еш — куан

Рудольф Семёнович ден пелашыже кок ӱдырым ончен куштеныт. Кугуракше, Татьяна, 11-ше №-ан школым тунем пытарымыж деч вара И.Палантай лӱмеш музыкальный училищыште тунемын, виолончель дене шокта. Астрахань оласе консерваторийым пытарен. Кызыт Астраханьыште филармонийыште пашам ышта. Пелашыже — композитор. Марий огыл гынат, кажне произведенийышкыже марий семым пуртен колта, тунам мурсем эшеат лишылла чучеш, кугешнен палемда Р.Григорьев.

Кокымшо ӱдыржӧ, Надя, республикысе правительствыште экономистлан тырша. Марий кугыжаныш университетын экономический факультетшым тунем пытарен. Ачажын ыштыме паша верышке налнешт улмаш, но тудо ойлышташ тӱҥалыт манын шоналтен да тушко каяш тореш лийын. Еш кажне кеҥежым иквереш чумырга, уныка-влак толыт.

Рудольф Григорьев “Ветеран труда”, кумшо степенян “За безупречную службу”, ведомствын вич медальже, почетан знак-влак дене палемдалтын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: