"Улам мый Рве-зы-лык!" рубрик, 2017 ий, Ӱярня тылзын 17-ше кечыже

Юрий Чавайнын илыш корныжым шымла

Статьян авторжо Анастасия Эманова

Книга – шинчымаш памаш веле огыл, тудо эше сай йолташ. Чон коржмо, неле годым сай книгам кидыш кучен, йӧратыме произведенийым, але иктаж-могай ужашым лудын, кумыл нӧлталтеш. Кызытсе саманыште библиотекыш я книга кевытыш коштмо олмеш шукынжо произведений-влакым интернет полшымо дене лудыт. Тидыже жапымат, оксамат аныкла. Но книгам лаштыклен, тудын пушыжым шижаш утларак сай, шонем. Тидын дене Морко ӱдыр Мария Архипова келша.

машаМашам шанче конференцийлаште, самырык-влакын тӱрлӧ форумлаштышт шуко гана ужынам. Икана участник лийын гын, вес гана волонтер семын мероприятийым эртараш полшен. Морко посёлко гыч чолга ӱдыр Марий кугыжаныш университетыште англичан да марий йылме  пӧлкаште тунемеш. Кызыт Йошкар-Оласе президент сымыктыш школышто практикым эрта. «Йоча-шамычым моткоч йӧратем. Изиэм годым кушкам да туныктышо лиям манын шонен коштынам. 2012 ийыште Морко посёлкысо икымше номеран школым тунем пытарымеке, йоча шонымашем илышыш шыҥдараш МарГУ-ш толынам. Икымше курс гычак, кызыт пытартыш курсышто тунемам, вузысо тӱрлӧ мероприятийлаште участвоватлаш тӱҥалынам. Шанче конференцийыш эреак кумылын ушнем. Тӱрлӧ темылан статьям, шымлыме паша-влакым возаш йӧратем. Ятыр форумышто лийынам, чылажым омат шарне. Йошкар-Олаште эртыше финн-угор студент-влакын «Богатство финно-угорских народов» тӱнямбал форумышт сай шарнымашым коден. Тыгак Чебоксарыште, Ижевскыште студент-влакын форумыштышт лийынам. Тыгак Эстонийыш финн-угор вики-семинарыш пашам-влакым колтенам. Нылымше ий поэт Юрий Чавайн, тудын илыш корныжо, творчествыж нерген материалым погем. Тудын нерген Марий Википедийыште лаштыкым возем да эреак у информаций дене тудым уэмдем», – ойла студентке.

Мария яра жапыштыже книгам лудеш. Ф.Достоевскийын, Э.Асадовын, С.Чавайнын, Н.Лекайнын, йот писатель-влак кокла гыч Д.Толкиен да У.Шекспирын произведенийыштым лудаш йӧрата. Немыч писатель Патрик Зюскиндын «Парфюмер» романжым пачаш-пачаш лудын. Кызыт «Куриный бульон для души: 101 история о любви» книгам лудеш. Тушто илышыште лийше йӧратымаш историй нерген кӱчык ойлымаш, эссе-влакым возымо. «Книгаште уш-ыҥ таклан огыл ойлат. А туныктышылан утларак шуко палыман, книга тидын шотышто эн сай полышкалыше», - манеш ӱдыр.

Айдеме ӱмыржӧ мучко молан-гынат тунемеш. А эше вес специальностят илышыште кӱлеш лиеш. М.Архипова тунемме да туныктымо деч посна маникюр шотышто мастер. Тудо кӱчым моторым ышта. Кертмыж семын Марий театрыш коштеш.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: