"Рубрик деч посна", 2017 ий, Вӱдшор тылзын 21-ше кечыже

Георгиевский сорта-влакым Берлиныш колтымо

Статьян авторжо Светлана Кушакова

Сеҥымаш кече вашеш «Ночные волки» клубын байкерже-влак Берлинышке кудалыт. Нуно Йошкар-Олаште ыштыме Георгиевский сорта-влакым тушко наҥгаят. Тыгай сорта-влакым ышташ да Сеҥымаш кечын чӱкташ шонымаш кум ий ончыч Дмитрий Мишин темлен. Тудо кум ий ончыч «Единый Россий» партийын регионысо отделенийжын исполнительный комитетышкыже толын да ты шонымашыжым илышыш шыҥдараш полшаш йодын.

19 апрельыште клубын еҥже-влаклан сорта-влакым торжественно пуэныт. Сорта-шамычым Йошкар-Оласе 29-ше, 27-ше да 2-шо №-ан школлаште тунемше-влак сӧрастареныт. Нуно «Помним.Гордимся», «Спасибо деду за Победу» манын возеныт. Шке лӱмыштым ончыктеныт. Ик сортам лӱмын ямдылыме. Тушто шӧртньӧ тӱс дене «Для подвига забвения нет. От благодарных жителей Марий Эл» серыме. Йоча-влак ты пашам ответственно шуктеныт, палемден 27-ше №-ан школын туныктышыжо Т.Метелева. Сеҥымаш кечын 2-шо №-ан школышто нине сорта-влакым Ольга Тихомирован памятникше воктен чӱкташ шонат. Кугу Отечественный сарын геройжо тыште тунемын, школ тудын лӱмжым нумалеш.

«Ночные волки» клубын Йошкар-Оласе отделений гыч Сергей Малковлан нине сорта-влакым наҥгаяш ӱшаныме. «Берлиныш сеҥымаш корно» мотомарш кугу мер толкыныш савырнен. Тушто пеш шуко еҥ участвоватла. Мотомарш Российысе да Европысо этап гыч шога. «Ночные волки» клубын отделенийже-влак вес эллаштат улыт. Садлан ты толкыныш Белоруссий, Польшо, Словакий Болгарий, Чехий, Германий гыч еҥ-влак ушнат», — ойла байкер. Сергейын ачаже Андрей Алексеевич Малков сар корным эртен, сеҥымашым тапташ полшен. Берлиныште да Йошкар-Олаште сорта-влакым ик жапыште чӱкташ шонат. Байкер-влак шочмо кундемышкышт 14, 15 майыште толын шуыт.

Республикысе Кугыжаныш Погынышто «Единый Россий» политический партий фракцийым вуйлатыше В.Мухин тыгай паша ончыкылык тукымым патриотизм шӱлышеш кушташ полша манын палемден.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: