"Рубрик деч посна", 2017 ий, Вӱдшор тылзын 19-ше кечыже

Кумда тӱняште ила марий калык

Статьян авторжо Эльвира Терентьева

 

 Свердловск кундем Красноуфимск районышто  регион-влак кокласе

«Марий форум-2017: шошо сессий» эртен

Марий Мер Каҥашын черетан шошо сессийже Урал кундемыште икымше гана эртымым марий-влак куанен вашлийыныт ыле, садланак тидлан кӱлеш семын ямдылалтыныт. Тыге 7-8 апрельыште Свердловск область Красноуфимск районышто лийше сессийыш Марий Эл, Татарстан, Удмурт, Башкортостан республикыла, Киров, Угарман, Тюмень да Свердловск областьла, Пермь кундем гыч мер пашаеҥ, шанчызе, тӱвыра да туныктымо аланыште тыршыше еҥ деЮван журналист-влак погыненыт ыле.

Эн ончыч уна-влакым Красноуфимск район Юа селасе (илалшырак еҥ-влакын мутышт почеш, Ювам марлаже тыге маныт) «Марий кудо» этнографий тоштерыште вученыт. Тусо пашаеҥ-влак марий йӱлалан, тӱвыралан эҥертен, пашам ыштымышт, тоштерыш погымо арвер-влак нерген каласкаленыт, «Эрвий» лӱман ансамбльышт шке велысе муро-влакым мурен, уна ден тысе эрвелмарий-влак весела сем почеш пырля тавалтеныт да шудо чайым тамленыт. А вара Марий Эл Правительстве председательын икымше алмаштышыже, Тӱвыра, печать да калык-влакын пашашт шотышто министр М.З.Васютин Юа школым ончен коштын, школ тоштерыште лийын, тудым этнографийым ончыктышо моткоч сай вер семын аклен. Библиотекыште лиймыж годым тысе марий литературын чӱдылыкшым ужын, шке паша верыштыже улшо марий книга шӧрлыкшым ты школлан пуаш сӧрен.

Мер Каҥашын IV пленумжо Приданниково ялысе «Маяк» тӱвыра пӧртыштӧ почылтын. Тӱвыра пӧртым, Урал марий-влакын ойлымышт почеш, порын сӧрастарыме ыле. Сценыш вӱдышӧ лектын да пленум почылтмо нерген кугу йӱкын увертарен. А вара Мер Каҥашын гимнже йоҥгалтын. Президиумышто марий калыкын Оньыжаже Э.В.Александров ден Марий Эл делегацийым вуйлатыше М.З.Васютин дене пырля Красноуфимск район вуйлатыше О.В.Ряписов лийын. А шошо сессий деч ончыч тушто оргкомитет пашам шуктен. Чыла тидыже верысе администрацийын пашам сайын ыштымыжым, марий калыкым пагалымыжым ончыктен, марий-влакын тӱшкан илыме ик эн тора кундемыштышт иктеш чумыргымыштлан кугу акым пуаш полшен.

Соглашенийым подписатлыме

Пленарный заседанийыште кок йодыш лийын: Свердловск кундемысе марий общественностьын пашаж нерген мутланымаш да пленумын кокымшо кечысе паша радамжым каҥашымаш. А вес кечынже «Урал марий-влак: историй да кызытсе жап» конференций эртаралтын.

ЭЛЬВИРА ТЕРЕНТЬЕВА.

Умбакыже 2017 ий 14 апрельысе номерыште лудса.  DSCN6988

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: