"Рубрик деч посна", 2017 ий, Вӱдшор тылзын 10-шо кечыже

Марий Эл у вуйлатыше дене шошым вашлиеш

Статьян авторжо редактор

Марий Элыште республик вуйлатышын сомылжым шукташ Александр Евстифеевым шогалтыме. Йошкар-Олаште тудын дене икымше вашлиймаш 7 апрельыште лийын, у вуйлатыше дене Юл кундем федеральный округышто Россий президентын полномочный представительже Михаил Бабич палдарен. Евстифеев ончыч Москва областьысе арбитражный судышто вуйлатышылан шоген.

А.Евстифеев

А.Евстифеев


- Марий Элыште тудо пашам ыштен огыл гынат, мо-кузежым пала. 2000 гыч 2002 ий марте Юл кундемыште полномочный представительын алмаштышыже лийын, республик дене кылдалтше йодышлам ончен. Республикыште социальный да экономике могырым нелылык уло, парымат изи огыл. Вуйлатыше-влак деч тудлан кертме семын полшаш йодам, — каласен М.Бабич.
А.Евстифеев Россий президентын ӱшанжым сулаш уло вийын пашам ышташ тӱҥалмыж нерген ойлен.
- Тӱҥ шотышто элыштына могай нелылык уло, республикат тудын денак ила, мыланна тудым сеҥыман. Федеральный кучем дене кыл лийшаш, тудын полыш деч посна огеш лий, но шканат оксам ыштен моштыман, шийвундо кушко кайымыжат койшаш, — манын Александр Александрович.
Самырык-влак шотышто ойлымыж годым, нуно сай шинчымашым налшаш улыт, моштымашыштым кучылташ республикыште йӧным ыштыман, тыге нуно ӧрдыжкӧ огыт кай, тыштак пашам ышташ тӱҥалыт манын ойлен.
- Ме чылан тыршен пашам ыштышаш улына, тунам ик шонымашке шуын кертына, лектышнат кояш тӱҥалеш, — каласен А.Евстифеев.
Погынышо-влак ончылно М.Бабич Марий Элыште у федеральный инспектор Александр Ситников дене палымым ыштен. Ты марте тудо тиде пашамак Чукотко автономный округышто шуктен.
А.Евстифеев тыгак Марий Эл правительстве вуйлатышын пашажым шукташ тӱҥалеш. Кызыт тушто ыштыше-влаклан у правительствым ыштыме марте шке паша верыштак кодаш кӱштен, икмыняр министр дене посна вашлиймаште кутырен.
Э.Иманаев.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: