"Рубрик деч посна", 2017 ий, Вӱдшор тылзын 21-ше кечыже

Шошын моторжым ойыреныт

Статьян авторжо Светлана Кушакова

12 апрельыште ӱдырамаш-влаклан 7-ше №-ан исправительный колонийыште «Шошо мисс» моторлык конкурсым кумшо гана эртарыме. Эрык деч посна кодымо ӱдырамаш-влаклан тиде кугу пайрем лийын. Нуно кок тылзе ямдылалтыныт, шкаланышт тувырым, янлык да кушкыл тӱням ончыктышо костюмым ургеныт, плакатым сӱретленыт.

Мисс Весна в ИК-7 Марий Эл (1)Конкурсышто кандаш еҥ участвоватлен. Нуно шкешт дене палдареныт. Каласкалымышт гыч койын: кажныже, эрыкыш лектын, у илышым тӱҥалаш шона. Могай йоҥылыш ошкыл тышке конден, ты кечын шонкален огытыл. Палемдена: ты колонийыште, тӱҥ шотышто, наркотикым закондымын кучылтмо дене кылдалтше осал пашам ыштыше ӱдырамаш-влак шинчат. Шинчыме жапышт тӱҥ шотышто – 1,5 гыч 12 ий марте. Конкурсант-влакын моторлыкыштым да артист койышыштым колонийысе Попечительский советыш пурышо пӧръеҥ-влак акленыт. Тиде паша куштылгыжак лийын огыл.

Участнице-влак ныл гана сценыш лектыныт. Эн ончыч мотор тувырышт дене подиум мучко эртеныт, вара бурлеск куштымашым да Россий эстрадын шӱдыржӧ-влакым койдарыме сынан номерым ончыктеныт. Мыланем поснак «Флора и фауна» конкурс келшен. Тудым Экологий идалыкым палемдымылан кӧра ямдылыме. Мӱкш, кишке, поҥго, вишне, лыве да моло образ гоч янлык да кушкыл тӱням почын пуэныт. Тыгай костюм-влак дене эн чапле модельер-влакым ӧрыктараш лиеш, очыни. Нуным ӱдыр-влак шкеак ямдыленыт. Вет ятырынже колоний пеленысе профучилищыште ургаш тунемыт, ешартыш специальностьым налыт. Конкурсышко профессиональный парикмахерым, Санкт-Петербург гыч визажистым, Моско гыч фотографым ӱжыныт, хореографат пашам ыштен.

Пырля ыштыме паша лектышыж дене куандарен. Конкурс ик шӱлыш дене эртен. Поснак жюрилан чот шонаш логалын, конкурсантке-влакым утларак тургыжландарыктеныт.

Кажне участникым посна номинацийлаште палемдыме. А 2017 ийысе Шошо мисс лӱмым Ирина Аюпова налын. Тудлан тасмам ваче гоч сакеныт да короным чиктеныт.

Мисс Весна в ИК-7 Марий Эл (8)Ирина (снимкыште) тыгак «Вконтакте» социальный сетьыште эртарыме интернет-йӱклымаште эн шуко йӱкым поген да «Интернет мисс» номинацийыште сеҥен. Ириналан — 36 ий. Тудо наркотик дене кылдалтше осал пашалан шинча. Шкеже — Москва гыч. «Лийын мыйын илышыштем тыгай йоҥылыш, яклака корныш шогалынам. Очыни, тиде мыланем эн чапле урок лиеш. Эше латик ий шинчаш кодын, 2028 ийыште эрыкыш лекшаш улам. Но сай могырым шкем ончыктем гын, условно-досрочно лекташ шонем», — ойла тудо. Иринам мӧҥгыштыжӧ кок йочаже – 14 ияш эргыже да шым ияш ӱдыржӧ — вучат. Тудо нуным ончаш полшымыштлан, йӧратымашыштым, ныжылгылыкыштым пуымыштлан ача-аважлан таушта. Нунылан тазалыкым да кужу ӱмырым тылана. Конкурсантке-влакын шкешт нерген каласкалымышт годым тидым шекланышым: нуно сай ешыште шочын-кушкыныт, ятырынже кӱшыл образованиян улыт. Но осал пашам ышташ кажныжым мо таратен — чоныштышт пургедын веле умылаш лиеш, а палыдыме еҥлан тидын нерген каласкалаш тоштшо уке. Иринат университетым тунем пытарен. Налме специальностьшат тачысе саманыште ик эн кӱлешан. Англичан йылме гыч кусарышылан нефтеперегонный заводышто пашам ыштен.

Елена Карабасова (снимкыште) «Подиумын миссше» номинацийыште палемдалтын. Тудо подиумышто кошташ лӱмынак тунемын. Сценыште шкем пеҥгыдын куча, ончышо-влакын кумылыштым налын мошта. Елена изинек артист койышыж дене ойыртемалтын, садлан аваже «Ассорти» куштышо ансамбльыш колтен. Анасмбль дене чӱчкыдын выступатлаш логалын. Кызыт Еленалан — 26 ий. Шкеже Озаҥ ола гыч. Колонийышке шолыштмылан кӧра логалын. Эше ик ий да ик тылзе шинчашыже кодын, тыгак УДО почеш лекташ шона. Мӧҥгыштыжӧ пелашыже ден йочаже вучат. Еленан костюмжо ик эн ойыртемалтше лийын. Тудо моткоч сылнын Пеледышын рольжым пӱртӱсыштӧ почын пуэн.

Моторлык конкурсышто вице-мисс лӱмымат пуымо. Тудым Мурманск кундем гыч Ромена Садова налын. Ромена сымыктыш школым тунем пытарен, бальный куштымаш дене заниматлен. Икгана веле огыл тӱрлӧ конкурслаште таҥасен.

Чыла конкурсант-влаклан пӧлекым кучыктымо. Ты кечын жюри, уна-шамыч деч ятыр поро шомак йоҥген. Колонийын администрацийже участник-влакым посна палемдаш сӧрен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: