"Саман" рубрик, 2017 ий, Вӱдшор тылзын 21-ше кечыже

Шӱдӧ утла тӱрлӧ услугым темлат

Статьян авторжо Светлана Кушакова

Икмыняр ий ончыч кӱлеш документым ышташ тӱрлӧ организацийлашке ик гана веле огыл кошташ логалын. Тидлан лӱмын палемдыме кечым вучаш, кужу жап черетыште шогаш, кӧланже паша гыч йодын каяш кӱлын.

Кызыт тыгай нелылык уке манаш лиеш. Вет чыла гаяк кугыжаныш да муниципальный услугым www.gosuslugi.ru сайт гоч налаш лиеш. Но компьютер дене мастарын чылан огыл пайдаланен моштат, садлан тыгай годым шуко функциян рӱдер-влак (МФЦ) полшат.Таче ты кугыжаныш органын пашаж нерген «Марий Эл Республикыште кугыжаныш да муниципальный услуго-влакым темлыше шуко функциян рӱдер-влакын дирекцийышт» автономный учрежденийым вуйлатыше Ирина Юрьевна Ефимюк дене мутланена.

- Ирина Юрьевна, кызыт республикыште мыняр рӱдер пашам ышта?

- Республикыште икымше тыгай рӱдер-влак 2012 ийыште почылтыныт. «Шуко функциян рӱдер-влакын дирекцийышт» автономный учрежденийымат тунамак ыштыме. Эн ончыч почто отделенийлаште окна-влак пашам ыштеныт, а 2014 ий годсек рӱдер шке сетьым ышташ тӱҥалын. Кызыт республикыште шуко функциян 16 рӱдер пашам ышта. Кокытшо эн кугужо – Йошкар-Олаште, молышт районлаште верланеныт. Рӱдер-влак тӱрлӧ улыт. Изиракше — кум окнан, Волжск олаште, мутлан, 12 окна, а Йошкар-Олаште 47 окна калыклан тӱрлӧ услугым темла. Тылеч посна «Мои документы» офис-влакым яллаште почмо. Тыгайже кызытеш – 71. Тидыже ялыште илыше-влаклан йӧнанрак лийже манын ышталтын. Кызыт ончычсо семын ЖКХ услугылан субсидийым налаш але йочасадыш коштмылан компенсацийым пӧртылташ райрӱдыш коштман огыл. Тидым илыме верыштак ышташ лиеш. Икманаш, республик мучко кугыжаныш да муниципальный услугым темлыше 180 окна пашам ышта. Россий президентын указыштыже палемдыме: 90 наре процент еҥ кугыжаныш услугым илыме кундемыштыже налшаш. Тиде йодмашым пӱтынек шуктымо. 92 процент еҥым авалтыме.

- Рӱдерлаште да офислаште калыклан услугым налаш йӧнан лийже манын, мо ышталтын?

- Чыла офис ден рӱдернам ик шотыш, ик стильыш кондымо. Пашаеҥ-влакын шке формышт уло. Тыге ты тӧнеж могай пашам шукта, вик пален налаш лиеш. Калыклан чыла шотыштат йӧным ыштыме. Эн ончыч электрон черетым чыла вере пуртымо. Черетым терминал гоч талон почеш налаш лиеш. Кажне рӱдерыште ава да йоча-влаклан лукым йӧнештарыме. Рӱдер-влак ик окна принцип дене пашам ыштат. Ик окнаштак кугыжаныш кучемын тӱрлӧ услугыжым налаш лиеш. Ынде ондаксе семын тӱрлӧ кугыжаныш органлашке кошташ огеш кӱл. Тылеч посна кастенат пашам ыштена. Вӱргечын МФЦ кандаш шагат кас, шуматкечын ик шагат кечывал марте пашам ышта. Тыгак ончылгоч возалташ лиеш.

- Мыняр тӱрлӧ кугыжаныш услугым шуко функциян рӱдер гоч налаш лиеш?

- Темлыме услуго-влакын спискышт пеш кумда,чылаже шӱдӧ утла погына. Услуго-влак шотышто информацийым mfc.mari-el.gov.ru сайтыште муаш лиеш. Ӱмаште «Изи да кокла предпринимательствылан полышым пуымо шотышто корпораций» акционерный обществын услугыжым темлаш тӱҥалме. Тушто эн ончыч предприниматель лияш шонышо-влак могай окса полышым налме, могай бизнес республикыште утларак кӱлмӧ шотышто тӱрлӧ информацийым муын кертыт.

Чыла кугыжаныш услуго кокла гыч кумдан кучылталтшылан Росреестр услуго-влак шотлалтыт. Собственностьлан правам регистрироватлаш, ЕГРН гыч выпискым налаш чӱчкыдын йодын толыт. Миграций службо услугым темлена. Тӱҥ шотышто палемдыме ийгот шумо, фамилийым вашталтыме годым паспортым вашталтена. Вес элласе граждан-влак миграций учет шотышто толыт. Калыкым социально аралымаш министерствын ЖКХ услугыжлан субсидийым налме, йочасадыш коштмылан компенсацийым пӧртылтымӧ услуго-влак дене чӱчкыдын пайдаланат. Тылеч посна рӱдерыште кугыжаныш услуго порталыш шке пураш да регистрацийым эрташ йӧным ыштыме. Тидыже пашам эшеат куштылемдаш да жапым аныклаш полша. Тений февраль гыч паспортым вашталташ документым погена веле огыл, тыгак ямде паспортым пуэдаш тӱҥалынна. Вашке тиде услуго районлашке миен шушаш. Тений гыч тыгак водитель удостоверенийым весылан вашталташ лиеш. Шушаш жапланат паша планым палемдыме. Калыклан паша верым ситарыме шотышто рӱдер дене кылым ыштынена. Тыгак вес эллаш каяш паспортым ямдылаш тӱҥалнена.

- Рӱдер калык дене пашам ышта. Тудын поро шомакше, мутат уке, эн сай ак. Пашаеҥ-влакат калык дене пашам ыштен моштышо лийшаш улыт.

- Калыклан йӧнлӧ лийже манын, пашанам эреак саемден колташ тыршена. Мемнан рӱдерлаште паша качествым аклаш йӧным ыштыме. Кажне еҥ специалистын пашажым икыт гыч вич балл марте аклен кертеш. Вара могай шӧрыныштӧ пашам саемдаш кӱлмым рашемдена, тидын шотышто анализ ышталтеш. Федеральный услугым налме годым телефоныш пашам аклаш йодмо шотышто смс толеш. Еҥым пашаш налме годымат тудын шкем кучен , калык дене мутланен моштымыжлан, поро кумылжылан тӱткыш утларак ойыралтеш. А молыжлан ме шке туныктена. Кажне тылзын пашаеҥ-влак тестированийым эртат, тыге шинчымашыштым тергена, могай направленийыште шинчымашыштым келгемдаш кӱлмым умылена. Кугыжаныш органла гыч специалист-влак дене вашлиймашым эртарена. Нуно услугым налмаште лекше вашталтыш дене палдарат. Районлаште пашам ыштыше специалист-влак видеоконференций йӧн дене тунемыт. Кажне кугыжаныш услуго почеш электрон курс-влакым ямдылыме. Тидыже яра жап годым тунемаш йӧным ышта. Курс тыгак пашаште лекше ситуаций-влакым лончылаш полша. Пашам палымаш, вуйшиймаш пурыдымаш, йоҥылышым шагал ыштымаш — эн сай специалист конкурсышто таҥасаш да шкем ончыкташ амал лиеш. Тыгай конкурс икымше гана 2015 ийыште лийын. Ончыч республикыште, вара Россий кӱкшытыштӧ эртен. Тунам эн сай специалист лӱмым Оршанке поселкысо рӱдерын пашаеҥже налын.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: