"Сылнылык тӱня" рубрик, 2017 ий, Вӱдшор тылзын 14-ше кечыже

Ялозанлыкым нӧлтет — эл-влак тӱзланат

Статьян авторжо Анастасия Эманова

Тыге шона самырык узбек ӱдыр Нигора Чориева. Марий кундемна чынжымак тӱрлӧ тӱсан. Тудо яндар памашыже, кумда пасужо да олыкшо, Онар гай чодыраже да поро кумылан калыкше дене кеч-кӧмат сымыстара. Марий мландыш пытартыш ийлаште тӱрлӧ национальностян шуко ӱдыр-рвезе тунемаш, пашам ышташ толыт. Пырля келшен илаш манын, вашла сайын палыман. Тачысе номерыштына узбек ӱдыр дене палдарена.  чориеваНигора Чориева  Йошкар-Олаште кокымшо ий ила. Тудо Марий кугыжаныш университетысе Аграрно-технологический институтышто тунемеш. «Мый Ташкент областьысе Газалкент олаште шуко шочшан ешыште кушкынам. Ожно кундемыштына газель-влак ятыр лийыныт, садлан ола Газалкент лӱмым нумалеш. Пытартыш перепись почеш, олаштына коло ик тӱжем утла еҥ ила, - ойла Нигора. – Кызыт республикыштына ялозанлыклан кугу тӱткышым ойырат. Тидлан кӧра экспорт саемын, тидын дене элнат вияҥын. Ончыч хлопокым веле утларак куштат ыле, кызыт рисымат, кукурузымат, шыдаҥымат кугу кумдыкыш ӱдена. Пытартыш ийлаште сурткайыкым поснак чот ашнаш тӱҥалыныт. Кызыт элыштына ялозанлык аланыште пашам ышташ кугу чап. Тидлан кӧра Аргарно-технологический институтыш «агроинженерий» специальностьлан тунемаш пуренам.  Марий Элыште Узбекистан гыч толшо кок шӱдӧ утла ӱдыр-рвезе тунемеш. Мемнан дене университетыш тунемаш пураш конкурс моткоч кугу. Мый кӱлеш чыла документем МарГУ-ш колтенам. Иктешлымашым чон вургыжын вученам. Кызыт кокымшо курсышто тунемам. Агроинженер паша оҥай, но ончыкшым пӱрымаш кушко савыралеш, ойлаш ок лий. Чонем искусство деке шупшеш, можыч, илышем тӱвыра дене кылдем. Сӱретлаш, мураш, кушташ йӧратем. Газалкент оласе музыкальный школыш фортепиано классыш шым ий коштынам. А мураш-кушташ лач Марий Элыште тӱҥалынам. Калыкемын шкешотан улмыжым икымше курс гычак ончыктем. Ӱмаште тюрк калык-влакын куштымаш творчествышт «Шома бас» («Куштылгын куштен») икымше  тӱнямбал конкурсышто участвоватленам. Тудым Республикысе татар тӱвыра рӱдер эртарен. «Калык куштымаш» номинацийыште кокымшо степенян дипломым суленам. Тунамак МарГУ-што эртыше «Музыкальный март» конкурсышто мастарлыкем ончыктенам. Шочмо йылме дене мурымемлан икымше верым налынам. Тений «Келшымаш кӱвар» культур фестивальыште узбек ӱдыр-рвезе-влак дене национальный, но стилизованный куштымашым куштенна. Узбек национальный куштымаш-влак неле улыт. Мутлан, «Тановар» куштымаште кажне движений мом-гынат ончыкта. Тидым сайын палыман да сем почеш кажне движенийым ыштен шуктыман. Шке калык деке пагалыдымашым ынем ончыкто, садлан тыгай куштымашым кушташ ом тошт». Нигора шочмо эл, ешыж деч посна моткоч йокроклана. Туге гынат кок ийыште марий мландым йӧратен шынден.  «Йошкар-Ола сылне, тымык, тыште шуко национальностян еҥ-влак ваш келшен илат. Курбан-байрам, Ураза, Навруз пайрем-влакым элна деч тораште улына гынат, пайремлена. Тӱшкагудышто, шуэн гынат, шкенан национальный кочкышым ыштем. Пловым, самса когыльым, мантым (пельменьым ушештара) ямдылыме годым, пошкудо-влак толыт, пурлын ончалаш, а вара рецептымат каласкалаш йодыт. Мӧнгӧ гыч кажне гана казым кондем. Тиде – имне шоло да шыл гыч ямдылыме сокта. Тыгайым Марий Элыште огыт ыште», — каласыш ӱдыр.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: