"Илыш йогын" рубрик, 2017 ий, Ага тылзын 29-ше кечыже

Ила калык чонышто, ила калык ушышто

Статьян авторжо Анастасия Эманова

1 июньышто Марий АССР-ын икымше калык писательже, Морко мландын эргыже Никандр Лекайнын шочмыжлан 110 ий темеш. Тидын вашеш кодшо кугарнян писательын шочмо Кораксола ялыштыже аллейым почмо. 31 кедрым шындыме.

Ты поро пашалан ялысе калыкым Йошкар-Оласе Морко землячествын вуйлатышыже, Марий Элысе тӱвыра, печать да калык-влакын пашашт шотышто министрын алмаштышыже Александр Альбертович Иванов тарватен.

20170519_112137Уста писательым, журналистым «Калинин колхоз» очерковый повестьын да «Кугезе мланде», «Кӱртньӧ вий», «Кугу сарын тулыштыжо» трилогийын авторжо семын палена. Тудо кажне пашаштыже шочмо-кушмо аршаш гай ялжым, кугезе мландым моктен мурен, тыгодым жаплан келшыше пӱсӧ йодыш-влакым нӧлталын возен.

Кораксола ял шке шочшыжым шарна да тудын дене кугешна. Ялын ик уремже Лекайнын лӱмжым нумалеш, клуб ваштареш калык писатель лӱмеш стеле шога.

20170519_112225Мероприятий моткоч оҥай да шкешотан лийын. Тидын шотышто сценарийым ямдылыше, «пайремым» вӱдышӧ Елена Валерьяновна Григорьева тыршен. Морко посёлко гыч лӱмын велосипед дене «Морко мланде» газетын тӱҥ редакторжо А.Титов да туныктымо аланыште тыршыше ныл чолга ӱдырамаш толыныт. Аллейым почмаште тӱвыра министрын алмаштышыже А.Иванов, Кораксола ялын шочшыжо, Марий Элын заслуженный артистше С.Данилов лийыныт. Уна-влакым  ялысе калык кинде-шинчал, марий муро дене вашлийын.

Пушеҥгым шындыме деч ончыч ялысе рӱдӧ библиотекыш пурен онченна. Тудо клубын кокымшо пачашыштыже верланен. А клубын фойештыже тиде кечын Кораксола ялыште илыше, шӧртньӧ кидан еҥ Софья Николаевна Кириллован кидпашаже-влак ончыкталтыныт. Мом гына ыштен огеш мошто: пидме ончылсакыш, носки, пижерге, эсогыл пеледышыжат, кайыкшат, пакчасаскажат да мелнажат пидме –  чылт йомак тӱня.   20170519_120850

Библиотеке пашаеҥ-влак Лекайнлан пӧлеклалтше выставкым чумыреныт, презентацийым ямдыленыт. Александр Альбертович библиотекылан марла у книга-влакым пӧлеклен. Тидыже, библиотекым ятыр ий вуйлатыше Татьяна Ананьевна Кириллован мутшо почеш, лачеш толеш, вет пытартыш жапыште фонд марий книга дене шагал пойдаралтын.

Варажым стеле ончылно погыненна. Морко академический калык хор кум муро дене куандарен. Чылан пырля районын гимнжым муренна. Шӱргыял тӱҥ школын тунемшыже-влак оҥай номер-влакым ончыктеныт, Никандр Лекайнын илыш корныж нерген каласкаленыт, а 6-шо классыште тунемше Леонид Андреевын выступленийже эн сай шарнымашым коден. Тудо почеламутым моткоч чот сылнын лудын пуэн, кажне шомакшым шонен, раш ойлен.

20170519_124616Артист Сергей Данилов шке ыштыме шӱвырым шоктен, а хорын участникше, Шӱргыял школын туныктышыжо Валентин Изосимович Кириллов тӱмырым перкален, кумылым савыреныт.

31 кедрым ялын рӱдӧ паркыштыже шындыме. Тӱҥалтыш класслаште тунемше йоча-влаклан ты паша поснак чот оҥай лийын. Нуно варажым чыланат пушеҥгым шындыме верыш тоям кырен шогалтеныт да тушко шке лӱмыштым возен шынденыт. Ӱшанена: кушкыл одарлана да шке саскажым пуа, тидыже икымше марий писательын лӱмжым курымешлан арален кода.

А кастене М.Шкетан лӱмеш театрын артистше-влак «Кум кечылан у кува» спектакльым ончыктеныт. Ончаш толшо-влак пеш куаненыт, спектакльым ялыш шукертак конден огытыл ыле.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: