"Сылнылык тӱня" рубрик, 2017 ий, Ага тылзын 29-ше кечыже

Йоча-влакым 75 ий куандарат

Статьян авторжо Анастасия Эманова

Йошкар-Оласе Курчак театрым почмылан 75 ий темын. 19 майыште театрыште лӱмгечылан пӧлеклалтше чапле пайрем кас эртен. 75-ше тургым могай лийме да театрын ончыкылык пашаж нерген художественный вуйлатыше Алексей Анатольевич Ямаев каласкален.

yamaev 500x333- Юбилей тургымым 1 сентябрьыште «Не болей, не кашляй, не чихай» премьер дене почмо. Тудым Дмитрий Войдакын пьесыж почеш самырык режиссёр Максим Белецкий шынден. Максим ятыр ий артист-кукловодлан пашам ыштен, но ӱмаште курчак театрын режиссёржо специальность дене Санкт-Петербургысо сценический искусство кугыжаныш институтым тунем пытарымеке, режиссёр пашам шукташ тӱҥалын.

Ик у спектакльым шындымеке, театрын коллективше вигак манаш лиеш вес премьерлан ямдылалтын. «Золотой ключик» спектакльым шындаш лӱмын Санкт-Петербург гыч режиссёр Николай Боровковым да художник-постановщик Алевтина Торикым ӱжмӧ. Спектакльын премьерже 16 ноябрьыште лийын. Постановкым поснак У ий каникул годым ончыктенна. Тенисе У ий кампанийна молгунамсе дене таҥастарымаште чот чапле лийын. Йоча-влакым тӱрлӧ интермедий , мастер-класс, модыш дене куандаренна.

Театрыште лӱмгечылан пӧлеклалтше кугу гастрольым эртаренна. Мемнан деке тӱрлӧ олала гыч курчак театр-влакын артистышт гастроль дене толыныт, шке спектакльыштым модын ончыктеныт.

WowiJVbv2YEАнтон Чеховын «Три сестры» пьесыж почеш шындыме «Прозоровы. Эпитафия» спектакль дене Челябинскыште эртаралтше «Соломенный жаворонок» Vтӱнямбал курчак театр фестивальыште участвоватленна. А мартыште Буинск олаш (Татарстан) «Золотой ключик» спектакль дене миен толынна. Тушто театр-влакын «Идель-Урал-Буа – Пространство диалога» икымше всероссийский фестивальышт эртен. Жюри постановкым сайын аклен. Артист-влак Анна Деркачын, Марианна Сильвестрован да Сергей Печенниковын устан модмыштым моктен ойленыт.  

Тений «Театральный Йошкар-Ола» фестивальыште самырык актрисына Сауле Этлис «Золотой ключик» спектакльыште Черепахын рольжылан «Курчак театрыште эн сай роль» номинацийыште сеҥен.

Лӱмгече тургымышто театрын пашаеҥже-влак кыртмен пашам ыштеныт. Спектакль-влакым ончыктымо деч посна шуко интермедий лийын. Тыгак «Мый тиде курчакым йӧратем» йоча кидпаша конкурсым эртарыме. Йоча-влак чолга улыт. Республикысе 82 йочасад гыч участник-влак конкурсыш ушненыт.

21 мартыште Тимофей Евсеев лӱмеш Национальный тоштерыште мемнан театрлан пӧлеклалтше экспозиций почылтын. Тушто шуко фотографийым, документым, афишым, тошто курчакым чумырымо. Марий Элысе аудиовизуальный документацийын кугыжаныш архивше дене пырля театрын историйже, артистше-влак нерген интерактивный дискым луктынна. (авт. «Кугарня» газет редакцийланат тудым пуыш). Тушко 261 фотографийым, 36 документым, 16 видеозаписьым, 37 савыктыме материалым пуртымо.D8GwzI9LZ-Y

Тенисе тургымышто ме чыла шонымынам шуктенна. Тидлан йӱдшӧ-кечыже манме гаяк тыршенна. Чот ноенна, но тиде сай нойымаш. Пашана дене йоча-влакым веле огыл, нунын ача-аваштым, коча-коваштым куандаренна, шонем.

А шукерте огыл театрнам UNIMAтӱнямбал курчак театр ушемыш пуртеныт.

- 2014 ийыште «Кутко сӱан» спектакль ончыкталтын. Ончыкшым репертуардам марий спектакль дене пойдараш шонеда?

- Кызыт «Кутко сӱан» спектакльым ончыктымым чарныме. Пӧръеҥ артист-влак огыт сите. Самырык актёр-влакым вучена. 2018 ийыште мый «Йӱд орол» спектакльым шындынем. Кызыт драматург дене (лӱмжым ойлаш але ом тошт) мутланена. Постановко, очыни, кугыеҥ-влаклан лиеш. Спектакльым марий йомак, мифологий негызеш шындынем, но тудо кызытсе саманланат келшыше лиеш. Тыгак «Зелёный великан» спектакльым ямдылынена. Тудым Максим Белецкий марла шындаш тӱҥалеш.

- Ончыч шындыме спектакльым репертуарыш пӧртылташ кумылда уло?

- Архивым нӧлталме годым пален налме: Курчак театрыште икымше спектакльым Сергей Преображенскийын «Петрушка у малышей» пьесыж почеш 1942 ийыште шындыме. У тургымышто ты спектакльым, уэмдымым, калык ончыко луктына.

- Вес тургымышто йоча-влаклан могай у спектакльым шындеда?

- Экологий дене кылдалтше йомакым шындаш шонена, лӱмжым але пуымо огыл. Тыгак «Цветик-семицветик»  спектакльым шындена. Кок постановкыжынат режиссёржо – Максим Белецкий. 1 сентябрьыште «Бамбуковый остров» у спектакльым ончыктена. Тудым Кострома гыч режиссёр Михаил Логинов шында. Постановко Китай тематике дене кылдалтын. Костюм, сем, дракон – чылажат йоча-влакым сымыстарышаш. Пьесым самырык драматург Анна Богачёва возен.

Комментарий-влак: Але нигӧат комментарийым коден огыл, те икымше лийын кертыда.

Комментарийым ешараш:

Войти с помощью: